ފަތުރުވެރިންނަށް އިޒްރޭލު ޕާސްޕޯޓުގައި ރާއްޖެއަށް އެތެރެނުވެވޭގޮތަށް ގާނޫނަށް ގެނައި އިސްލާހާ ގުޅިގެން މެލޭޝިއާގެ ބޮޑުވަޒީރު އަންވަރު އިބްރާހިމް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ތަޢުރީފު ކުރައްވައިފި އެވެ.

ރައީސުލްޖުމްހޫރިއްޔާ މެލޭޝިއާއަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން ދެ ޤައުމުގެ ދެމެދުގައި ވެވުނު އެއްބަސްވުންތަކަށްފަހު ވާހަކަފުޅު ދައްކަވަމުން މެލޭޝިއާގެ ބޮޑުވަޒީރު އަންވަރު އިބްރާހިމް ވިދާޅުވީ، ފަލަސްޠީނުގައި މިހާރު ހިނގަމުންދާ ކަންތައްތަކާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ސިޔާސަތަކީ ހިތްވަރު ގަދަ ސިޔާސަތެއް ކަމަށެވެ. އަދި ރައީސުލްޖުމްހޫރިއްޔާގެ މި ނިންމެވުމަށް މެލޭޝިއާގެ ސަރުކާަރުންނާއި މެލޭޝިއާގެ ރައްޔިތުން އިހުތިރާމުކުރާކަމަށް ވެސް ވިދާޅުވިއެވެ.

މީގެ އިތުރުން، ފަލަސްތީނުގައި ހިނގަމުންދާ ހަމަނުޖެހުމުގައި މެލޭޝިޔާގެ ސަރުކާރުންވެސް ގެންގުޅުއްވަނީ ރާއްޖެއާއި އެއް ސިޔާސަތެއް ކަމަށްވެސް ވިދާޅުވިއެވެ.

އިޒްރޭލަކީ ދައުލަތެއް ކަމަށް މެލޭޝިއާއިން ބަލައިނުގަންނަ ކަން ފާހަގަކުރައްވައި ބޮޑުވަޒީރު ވިދާޅުވީ މެލޭޝިއާއިން އެގޮތަށް ނިންމެވީ އިންސާނީ ޙައްގުތަކަށް އިޒްރޭލުން އިހުތިރާމު ނުކުރާތީ އާއި ބައިނަލްއަގުވާމީ އެއްބަސްވުންތަކާ ޚިލާފުވާތީ ކަމަށެވެ. އަދި މީގެއިތުރުން އެއީ ފަލަސްޠީނުގައި، ޚާއްސަކޮށް ޣައްޒާގައި ޒަޔަނިސްޓުން ހިންގަމުންދާ ގަތުލުއާންމު ހުއްޓާލުމަށް އިޒްރޭލުން ދެކޮޅުހަދާފައިވާތީ ނިންމެވި ނިންމެވުމެއް ކަމަށްވެސް މެލޭޝިއާގެ ބޮޑުވަޒީރު ވިދާޅުވިއެވެ.