ބައްސާމުގެ މައްޗަށް އުފުލި ދައުވާތައް ނުގެނޭ، ގެނަަައުމުގެ ވިސްނުމެއް ވެސް ނެތް
އެފްއޭއެމް ހިޔާނާތުގެ މައްސަލާގައި އެ އެސޯސިއޭޝަނުގެ ކުރީގެ ރައީސް ބައްސާމް އަދީލް ޖަލީލުގެ މައްޗަށް އުފުލާފައިވާ އެއްވެސް ދައުވާއެއް އަނބުރާ ގެނެސްފައި ނުވާނެ ކަމަށް ޕީޖީ އޮފީހުން ބުނެފި އެވެ.
އެ އޮފީހުން މިހެން ބުނީ ބައްސާމްގެ މައްޗަށް އުފުލި ދައުވާތައް އަނބުރާ ގެންނަން ނިންމައިފި ކަމަށް ބުނެ ވާހަކަ ދެކެމުންދާތީ އެވެ.
ޕީޖީ އޮފީހުން ބުނީ ބައްސާމްގެ މައްޗަށް ވެސް އަދި އެފްއޭއެމްގެ ހިޔާނާތާއި ގުޅިގެން ދައުވާ އުފުލި އެއްވެސް މީހެއްގެ މައްސަލަ އެއް ވެސް އަނބުރާ ނެގުމަަށް ނިންމާފައިނުވާ ކަމަށެވެ. އެފަދަ ވިސްނުމެއް ވެސް ނެތް ކަމަށް ބުންޏެވެ.
އެފްއޭއެމްގެ ފައިސާތަކަށް ހިޔާނާތްތެރިވި ކަމަށް ތުހުމަތުކޮށް ބައްސާމްގެ މައްޗަށް ގިނަ ދައުވާތަކެެއް ވަނީ އުފުލާފަ އެވެ. ބައެއް މައްސަލަތައް ކްރިމިނަލް ކޯޓްގައި ކުރިއަށް ދެ އެވެ.
ބައެއް މައްސަލަތައް ތަހުގީގު ކުރުމާއި ޕްރޮސެކިއުޓް ކުރުމުގެ މަރުހަލާގައިވެސް ވެ އެވެ.
ފީފާއިން އެފްއޭއެމަށް ދިން ފައިސާތަކަށް ހިޔާނާތްތެރިވެ ބައްސާމް ވަނީ ފްލެޓް ގަނެ އަމިއްލަ ދިރިއުޅުމުގެ ކަންކަމަށް އެ ފައިސާ ހަރަދު ކޮށްފައި ކަމަށް ތަހުގީގަށް އެނގިފައިވެ އެވެ.
Advertisement
This content is created and paid for by advertisers and does not involve Voice Journalists
