ބޭންކް އޮފް މޯލްޑިވްސް (ބީއެމްއެލް) އިން މަސްވެރިންނަށް ފަސޭހައިން ފައިނޭންސް ލިބޭނެ މަގުފަހިކޮށްދިނުމަށްޓަކައި މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއާއެކު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކުރެއްވީ މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަޙްމަދު ޝިޔާމް އާއި ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފެވެ.

ބީއެމްއެލްއިން ބުނިގޮތުގައި، މި އެއްބަސްވުމުގެ ދަށުން، ނެޝަނަލް ފިޝަރމަންސް ރެޖިސްޓަރީގައި ރަޖިސްޓަރީ ކޮށްފައިވާ މަސްވެރިންނަށް އެމީހުންގެ އާމްދަނީއަށް ބަލައި، އަމިއްލަ ފައިނޭންސިންގ، ކްރެޑިޓް ކާޑު އަދި ގެދޮރު ލޯނު ފަދަ އެކި ބާވަތުގެ ކްރެޑިޓް ފެސިލިޓީތައް ލިބުމަށް މަގު ފަހިވެގެންދާނެއެވެ.

Advertisement

އަދި މި އައު އިންތިޒާމުގެ ދަށުން، ޝަރުތު ހަމަވާ މަސްވެރިންނަށް ރަހުނެއް ނުވަތަ އިކުއިޓީއެއް ބޭނުންނުވެ 300,000 ރުފިޔާއާ ހަމައަށް އަމިއްލަ ފައިނޭންސިންގ ލިބޭނެ ކަމަށާ، ފުރަތަމަ ފަހަރަށް، މޫސުމާއެކު މަސްވެރިކަމުގެ އާމްދަނީއަށް އަންނަ ބަދަލުތަކަށް ރިޢާޔަތްކޮށް ލޯނު އަނބުރާ ދެއްކުމުގެ ތާވަލު އެކުލަވާލެވޭނެ ކަމަށް ބުނެފައިވެއެވެ.

މަސްވެރިކަމާ ބެހޭ ވުޒާރާއާއި ބީއެމްއެލްއާ ދެމެދު އެއްބަސްވުމުގައި ސޮއި ކުރުން: ފޮޓޯ/ މަސްވެރިކަމާބެހޭ ވުޒާރާ

ޕާސަނަލް ފައިނޭންސިންގ އަދި ލުއި ލޯނަށް އެދި ހުށަހެޅުމުގެ ފުރުޞަތު ބޭންކުގެ އިންޓަރނެޓް ނުވަތަ މޮބައިލް ބޭންކިންގ އެޕް މެދުވެރިކޮށް ރާއްޖޭގެ ކޮންމެ ހިސާބަކުން ވެސް ލިބިގެންދާނެ ކަމަށް ބޭންކުން ބުނެއެވެ. 

ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވީ، މި އެއްބަސްވުމުގެ މަޤްޞަދަކީ މަސްވެރިންނަށް ކްރެޑިޓް ފެސިލިޓީތައް ލިބުމުގެ ފުރުޞަތު ފުޅާކުރުން ކަމަށެވެ. މިކަމުގެ ސަބަބުން މަސްވެރިންގެ ޚާއްޞަ އާމްދަނީ އަދި މޫސުމީ ގޮންޖެހުންތަކަށް ރިޢާޔަތްކޮށް، އެ ފަރާތްތަކުގެ ދިރިއުޅުން ދެމެހެއްޓެނިވި ގޮތެއްގައި ބައްޓަންކުރުމަށް އެހީތެރިވެދޭ މާލީ ޙައްލުތައް ފޯރުކޮށްދެވޭނެއެވެ.

ޕާސަނަލް ފައިނޭންސިންގގެ އިތުރުން، ނެޝަނަލް ފިޝަރމަންސް ރެޖިސްޓަރީގައި ރަޖިސްޓަރީވުމަށްފަހު، މަސްވެރިންނަށް ގެ އިމާރާތްކުރުމުގެ ފައިނޭންސިންގ، ގެ ގަތުމުގެ ފައިނޭންސިންގ އަދި ގެ މަރާމާތުކުރުމުގެ ފައިނޭންސިންގއަށް އެދި ހުށަހެޅުމުގެ ފުރުޞަތު ވެސް ލިބިގެންދާނެ ކަމަށް ބޭންކުން ބުނެއެޗެ.