ލީގުގެ އެންމެ ފަހު މެޗުގައި ބްރައިޓަން 4-1 ކުން ބަލިކޮށް އިނގިރޭސި ޕްރިމިއާ ލީގުގެ ޗެންޕިއަންކަން މެންޗެސްޓާ ސިޓީ ހޯދައިފިއެވެ.

މެޗުގެ 27 ވަނަ މިނެޓުގައި ފުރަތަމަ ގޯލް ބްރައިޓަންއިން ޖަހާ ސިޓީގެ ސަޕޯޓަރުން ހާސްކަމުގެ ތެރެއަށް ވައްޓާލިއިރު ސިޓީވަނީ އޭގެ މިނެޓެއް ފަހުން 28 ވަނަ މިނެޓުގައި ގޯލެއް ޖަހާ ނަތީޖާ އެއްވަރު ކޮށްފައެވެ. މި ގޯލް ސިޓީއަށް ޖަހައިދިނީ އާޖެންޓީނާގެ ތަރި ސާޖިއޯ އަގުއޭރޯއެވެ.

ފުރަތަމަ ހާފުގެ ކުޅުން ނިމެން ގާތްވެފައިވަނިކޮށް މަހްރޭޒް ނަގައިދިން ކޯނަރަކުން ލަޕޯޓް ބޮލުން ގޯލު ތެރެއަށް ވައްދާލި ގޯލާއެކު ސިޓީވަނީ މެޗުގެ ކުރި ހޯދާފައެވެ.

ފުރަތަމަ ހާފެކޭ އެއްގޮތަށް ސިޓީވަނީ ދެވަނަ ހާފުގައިވެސް ގިނަ ހަމަލާތަކެއް އުފައްދާ މުޅި މެޗް ޑޮމިނޭޓް ކޮށްފައެވެ. އޭގެ ނަތީޖާއަކަށްވީ މަހްރޭޒް ޖެހި ގޯލާއެކު އެޓީމުގެ ލީޑް ދެ ގޯލަށް ފުޅާވެ މެޗުގެ ނަތީޖާ 3-1 ކަށް ބަދަލުވުމެވެ.

ސިޓީއަށް އިތުރު ހިތްހަމަ ޖެހުމެއް ލިބުނީ 72 ވަނަ މިނެޓުގައި ލިބުނު ހިލޭ ޖެހުމަކުން ގުންޑޮގަން ވަރަށް ރީތިކޮށް ފޮނުވާލައިގެން ކާމިޔާބު ކުރި ގޯލުންނެވެ.

ސިޓީއައި އެންމެ ގާތުން ވާދަކުރި ލިވަޕޫލް ކުޅުނު މެޗު އެޓީމް ކާމިޔާބު ކުރީ މި ސީޒަނުގައި ހައިރާން ކުރުވަނިވި ރަނގަޅު ނަތީޖާތަކެއް ނެރެފައިވާ ވުލްވްސްގެ މައްޗަށް ކުރި ހޯދައިގެންނެވެ. 2-0 ކުން ލިވަޕޫލް މޮޅުވި މި މެޗުގައި އެޓީމުގެ ގޯލުތައް ޖަހައިދިނީ މާނޭއެވެ.

ސިޓީ 98 ޕޮއިންޓް ހަމަކޮށްގެން ސިޓީ ލީގް ކާމިޔާބު ކުރި އިރު ލިވަޕޫލްއަށް ލިބިފައިވަނީ 97 ޕޮއިންޓެވެ.