އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު އަދާލަތު ޕާޓީއާ ގުޅިވަޑައިގަތުމަށް ނިންމެވި ނިންމެވުމަށް ޝަރުތަކާއެކު އެ ޕާޓީގެ މިހާރު ރައީސް އިމްރާން އަބްދުﷲ މަރުހަބާ ދަންނަވައިފި އެވެ.

ވޮއިސްއާ ވާހަކަ ދައްކަވަމުން މިނިސްޓަރު ވިދާޅުވީ އަދާލަތުގެ ސީނިއާާ އެއް މުއައްސިސްގެ ހައިސިއްޔަތުން އަހަރުތަކެއް ވަންދެން އެމަނިކުފާނު ހިދުމަތްކުރި އަދާލަތު ޕާޓީއަށް އަލުން ވަނުމަށް ނިންމާފައިވާ ކަމަށެވެ. އަދި މިއަހަރު ފަހުކޮޅުގައި އެ ޕާޓީގެ އާ ރައީސަކު ހޮވުމަށް ބާއްވާ އެތެރޭގެ އިންތިހާބުގައި ވާދަކުރައްވާނެ ކަމަށެވެ.

އެކަމާއި ގުޅިގެން އިމްރާން ކުރެއްވި ޕޯސްޓެއްގައި ވިދާޅުވީ ރައީސް މުއިއްޒުގެ ދޯހަޅިކަމާހުރެ ގައުމު ވެއްޓިފައި މިއޮތް ހާލަތުން ސަލާމަތް ކުރުމަށް، ރައީސް މުއިއްޒުގެ ކެބިނެޓް ދޫކުރައްވާ ހާލިސްކަމާއެކުގައި ޝަހީމް އަދާލަތު ޕާޓީގެ ލީޑާޝިޕަށް ވާދަކުރައްވާނަމަ އެކަމަށް އުފަލާއެކު މަރުހަބާ ދަންނަވާ ކަމަށެވެ.

އެކަމަށް މިނިސްޓަރު ޝަހީމް ވަނީ ރައްދު ދެއްވާފަ އެވެ. ވިދާޅުވީ އަދާލަތު ޕާާޓީގެ ލީޑާޝިޕަށް ވާދަކުރުމަށް ކެބިނެޓް ދޫކޮށްލަން ނުޖެހޭ ކަމަށެވެ. އަދި އަދާލަތުގެ މެންބަރުންނަށް މަގާމުގައި ހުންނަން ދުސްތޫރުން މަނާ ނުކުރާ ކަމަށެވެ. އަދާލަތު ޕާޓީގެ ރައީސް ކަމަށް މެންބަރުން އެމަނިކުފާނު އިންތިހާބު ކުރައްވައިފިނަމަ ކޮންގްރެސް އިން ނިންމާ ގޮތަކަށް ޕާޓީއައިގެން ކުރިއަށް ވަޑައިގަންނަވާނެ ކަމަށް ވެސް ޝަހީމް ވިދާޅުވި އެވެ.

އިމްރާން މިފަދަ ޝަރުތެއް ކުރިމަތި ކުރެއްވި ނަމަވެސް އަދާލަތު ޕާޓީގެ އިސް ބޭފުޅުން ވަނީ މިނިސްޓަރު ޝަހީމްގެ ނިންމެވުމަށް މަރުހަބާ ވިދާޅުވެފަ އެވެ. 

މިނިސްޓަރު އެކަން އިއުލާނު ކުރެއްވުމާއި ގުޅިގެން އަދާލަތުގެ އިސް މަގާމުތަކުގައި ތިއްބެވި ބައެއް ބޭފުޅުންނާއި އިލްމުވެރީންގެ މަޖިލީހުގެ ބައެއް މެންބަރުން ވަނީ އެ ނިންމެވުމަށް މަރުހަބާ ވިދާޅުވެފަ އެވެ. އޭގެ ތެރޭގައި އިލްމުވެރީންގެ މަޖިލީހުގެ ރައީސް ޑރ. އިލްޔާސް ހުސައިން އާއި ނާއިބު ރައީސް ޑރ, މުހައްމަދު އިޔާޒް އަބްދުލްލަތީފާއި އިލްމުވެރީންގެ މަޖިލީހުގެ އިތުރު މެންބަރުން ހިމެނިވަޑައިގަންނަވަ އެވެ.

ޑރ. އިޔާޒް, މިނިސްޓަރު ޝަހީމް, ޑރ. އިލްޔާސް

އިލްޔާސް ވިދާޅުވީ ޝަހީމްގެ އެ ނިންމެވުމަކީ އަދާލަތު ހަރުދަނާ ކުރެއްވުމަށް ވަރަށް ރަނގަޅު ނިންމެވުމެއް ކަމަށެވެ. ޝަހީމަށް ތާއީދު ކުރައްވާކަން ވެސް ހާމަ ކުރެއްވި އެވެ.

އަދި އެ ޕާޓީގެ ނާއިބު ރައީސް އަބްދުﷲ ރަޝީދު ވެސް ވަނީ މިނިސްޓަރު ޝަހީމަށް މަރުހަބާ ވިދާޅުވެފަ އެވެ.

އަދާލަތު ޕާޓީގެ މިހާރުގެ ރައީސަކީ އިމްރާން އަބްދުﷲ އެވެ. އޭނާ އަކީ މިދިޔަ ސަރުކާރުގައި ހޯމް މިނިސްޓަރެވެ.

ސަރުކާރު ބަދަލުވެ މަގާމު ގެއްލިވަޑައިގަަތުމުން އިމްރާންގެ ދިރިއުޅުއްވުން ވަގުތީ ގޮތުން ވަނީ ތައިލެންޑަށް ބަދަލު ކުރައްވާފަ އެވެ. އެ ގައުމުގައި ހުންނެވި ނަމަވެސް އަދާލަތު ޕާޓީގެ ރައީސްގެ މަގާމު ދޫކޮށްލައްވާފައެއް ނުވެ އެވެ.

އެ ޕާޓީގެ އިސް ބައެއް ބޭފުޅުން ވަނީ މަގާމުގެ މަސްއޫލިއްޔަތު އަދާ ނުކުރައްވާތީ މަގާމުން އިސްތިއުފާ ދެއްވުމަށް ކުރީން ވެސް އިމްރާންގެ ކިބައިން އެދިވަޑައިގެންފަ އެވެ. ނަމަވެސް މަގާމު ދޫކޮށްލެވުމަށް ދެކޮޅު ހެއްދެވި އެވެ.

މިނިސްޓަރު ޑރ. މުޙައްމަދު ޝަހިމް އަލީ ސައީދަކީ އަދާލަތު ޕާޓީގެ އެއް މުއައްސިސެވެ. އެ ޕާޓީ ވަރުގަދަ ކުރެެއްވި އެއް ލީޑަރެވެ.

އިމްރާނާއި ޝަހީމަކީ ވަރަށް ގާތް ދެ ބޭފުޅުންނެވެ. މީގެ ކުރީން އިމްރާންގެ ދިފާއުގައި އޭނާގެ ހައްގުގައި އެންމެ ބޮޑެތި ގުރުބާނީ ވެވަޑައިގެންނެވި އެއް ބޭފުޅަކީ ޝަހީމެވެ.

ރައީސް މުއިއްޒުގެ ކެބިނެޓުން އިސްތިއުފާ ދެއްވާ އަދާލަތަށް ވަޑައިގަތުމަށް އިމްރާން އެދިވަޑައިގެންނެވިއިރު ރައީސް ޔާމީންގެ ސަރުކާރުގައި ކެބިނެޓުގައި ހުންނަވާ ޝަހީމް އިސްތިއުފާ ދެއްވީ ވެސް އިމްރާންގެ ހައްްގުގަ އެވެ. އޭގެ ފަހުން އަލުން ރައީސް ޔާމީންގެ ރަނިންމޭޓަކަށް ވަޑައިގަތީ ވެސް އިމްރާނަށް ލުއިތަކެއް ހޯއްދަވައި ދެެއްވުމުގެ ބޭނުންފުޅާވެސް އެކު އެވެ.

އޭރު އިމްރާން ހުންނެވީ އޭނާ އިސްވެ މޭޑޭގައި ދެއްކެވި ވާހަކަތަކުން އުފެދުނު ބޮޑު ހަމަނުޖެހުމާއި ގުޅިގެން ދައުވާ އުފުލާ ދިގު މުއްދަތެއްގެ ޖަލު ހުކުމު ގަ އެވެ. ނަމަވެސް ޝަހީމްގެ މަސައްކަތްޕުޅުން އިމްރާން އެތައް ފަހަރަކު ގެއަށް ބަދަލުކޮށް ގިނަ ލުއިތަކެއް ހޯއްދަވައި ދެއްވި އެވެ.