ކަރާގައި ހުންނަ އޮށްތައް އުކާލާނަމަ، އެކަން ހުއްޓާލަންޖެހޭ؛ މިއޮތީ ސަބަބުތައް
ރަހަމީރު އަދި ހަށިގަނޑަށް ތާޒާކަން ގެނެސްދޭ ކަރާ އަކީ ވަރަށް ގިނަ ޞިއްޙީ ފައިދާތަކެއް އެކުލެވޭ މޭވާއެކެވެ. ނަމަވެސް، އޭގެ އޮށްތައް އުކާލާ މީހުންވެސް އުޅޭއިރު އެއީ އެކަން ކުރާމީހުން ކަން ކުރުން ހުއްޓާލާހާ ފައިދާހުރި ކަމެކެވެ. އެހެންކަމުން މި ލިޔުމުގައި އަލިއަޅުވާލާނީ މި ކުދިކުދި ކަޅު އޮށްތައް އުކާނުލަންވީ ބައެއް ސަބަބުތަކަށެވެ.
ނޭޝަނަލް އިންސްޓިޓިއުޓް އޮފް ހެލްތުން ހެދި ދިރާސާއެއްގައިވާގޮތުން، ކަރާގެ އޮށްތަކުގައި ޕްރޮޓީނާއި، ފެޓްސްއާއި، އަދި މެދުމިނުގެ މިންވަރަކަށް އަޔަން (ދަގަނޑު) އަދި ޒިންކު އެކުލެވިގެންވެއެވެ. އޭގެ އިތުރުން، މި އޮށްތަކުގައި މެގްނީޒިއަމްގެ މިންވަރުވެސް ވަރަށް މަތިވެއެވެ. މެގްނީޒިއަމްއަކީ ހަށިގަނޑުގެ ގިނަ މަސައްކަތްތަކަށް ވަރަށް މުހިންމު މާއްދާއެކެވެ. މީގެ ތެރޭގައި މަސްތަކާއި ނާރުތަކުގެ މަސައްކަތް ބެލެހެއްޓުމާއި، ލޭގައި ހުންނަ ހަކުރުގެ މިންވަރު ބެލެހެއްޓުމާއި، ލޭގެ ޕްރެޝަރު ބެލެހެއްޓުމާއި، އަދި ޕްރޮޓީނާއި، ކަށްޓާއި އަދި ޑީއެންއޭ އުފެއްދުން ހިމެނެއެވެ.
ކަރާގެ އޮށްތަކަކީ މޮނޯއަންސެޗުރޭޓެޑް އަދި ޕޮލީއަންސެޗުރޭޓެޑް ފެޓީ އެސިޑްގެ ރަނގަޅު މަސްދަރެކެވެ. މި މާއްދާތަކުން ހިތުގެ ދުޅަހެޔޮކަމަށް ވަރަށް ގިނަ ގޮތްގޮތުން ފައިދާ ކުރެއެވެ. ދިރާސާތަކުން ދައްކާގޮތުގައި، ރަނގަޅު ފެޓްސްއިން ހިތުގެ ބަލިތަކާއި ސްޓްރޯކްއިން ރައްކާތެރިވުމަށް އެހީތެރިވެދެއެވެ. ކަރާގެ އޮށްތަކުގައި އެކުލެވޭ މެގްނީޒިއަމް އަދި ޕޮޓޭޝިއަމްއިންވެސް ހިތުގެ ދުޅަހެޔޮކަމަށް އެހީތެރިވެދެއެވެ. މި މާއްދާތަކުން ލޭގެ ޕްރެޝަރު ބެލެހެއްޓުމަށާއި ހިތުގެ ބަލިތަކަށް ހުށަހެޅުމުގެ ފުރުޞަތު ކުޑަކުރުމަށް އެހީތެރިވެދެއެވެ.
ކަރާގެ އޮށުގައި އެކުލެވޭ ފައިބަރުން ހަޖަމުކުރުމުގެ ނިޒާމުގެ ދުޅަހެޔޮކަން ދެމެހެއްޓުމަށް އެހީތެރިވެދެއެވެ. ފައިބަރުން ބޮޑުކަމުދިއުމަށް އެހީތެރިވެދޭއިރު އަދި ބަނޑުހަރުވުމުގެ މައްސަލައަށްވެސް ލުއި ލިއްބައިދެއެވެ.
ކަރާގެ އޮށްތަކުގައި ލައިކޮޕީން އެކުލެވިގެންވެއެވެ. މިއީ ދިފާޢީ ނިޒާމު ވަރުގަދަކުރުމަށް އެހީތެރިވެދޭ ވަރުގަދަ އެންޓިއޮކްސިޑެންޓެކެވެ. އެންޓިއޮކްސިޑެންޓްތަކުން އަހަރެމެންގެ ހަށިގަނޑުގެ ސެލްތައް ފްރީ ރެ ޑިކަލްތަކުގެ ގެއްލުމުން ރައްކާތެރިކޮށްދެއެވެ. މީގެ އިތުރުން ކަރާގެ އޮށްތަކުގައި ވިޓަމިން ސީވެސް އެކުލެވިގެންވާއިރު އެއީ ވެސް ދިފާޢީ ނިޒާމު ވަރުގަދަކުރުމަށް އެހީވެދޭ އެއްޗެކެވެ.
ކަރާގެ އޮށްތަކުގައި އެކުލެވޭ ޕްރޮޓީނާއި ފައިބަރުން ގިނަ ވަގުތު ބަނޑުފުރިފައި ހުރުމަށް އެހީތެރިވެދެއެވެ. މިކަމުން އެމީހަކު ކާ މިންވަރު މަދުކުރުމަށް އެހީތެރިވެދޭނެއެވެ. އަދި މިއީ ބަރުދަން ބެލެހެއްޓުމަށް ވަރަށް މުހިންމު ކަމެކެވެ.
ކަރާގެ އޮށްތަކުގައި އެކުލެވޭ މެގްނީޒިއަމްއިން ހަށިގަނޑުގައި ހަކަތަ އުފެއްދުމުގެ މަސައްކަތަށް އެހީތެރިވެދެއެވެ. މިކަމުން ތިބާގެ ހަށިގަނޑުގެ ހަކަތަ އިތުރުވެ، ވަރުބަލިކަން ކުޑަވެގެންދާނެއެވެ.
ކަރާ މޭވާގެ އޮށްތަކުގައި އެކުލެވޭ ވިޓަމިން އީ އާއި އެހެނިހެން އެންޓިއޮކްސިޑެންޓްތަކުން ހަމުގެ ދުޅަހެޔޮކަމަށް އެހީތެރިވެދެއެވެ. މި މާއްދާތަކުން ހަމުގެ ސެލްތައް ގެއްލުމުން ރައްކާތެރިކޮށްދީ، ހަމުގެ ދުޅަހެޔޮކަމާއި ޒުވާންކަން ދެމެހެއްޓުމަށް އެހީތެރިވެދެއެވެ. ހަންގަޑުގެ އިތުރުން އިސްތަށިގަނޑަށްވެސް ކަރާ އޮށުން ކުރާ ފައިދާ ބޮޑެވެ.
ކަރާގެ އޮށުޮށުގައި އެކުލެވޭ މެގްނީޒިއަމް އަދި ފޮސްފަރަސްއަކީ ވަރުގަދަ އަދި ދުޅަހެޔޮ ކަށިތަކެއް ދެމެހެއްޓުމަށް މުހިންމު މާއްދާތަކެކެވެ. މި މާއްދާއަކީ ކަށި އުފެދުމަށާއި ކަށީގެ ބާރުގަދަކަމަށް ކޮންމެހެން ބޭނުންވާ މާއްދާތަކެކެވެ.
ކަރާގެ އޮށުގައި ޓްރިޕްޓޮފޭން އެކުލެވެއެވެ. މިއީ ސެރޮޓޮނިން އުފެއްދުމަށް މުހިންމު އެމިނޯ އެސިޑެކެވެ. ސެރޮޓޮނިންއަކީ، މޫޑާއި ނިދުމަށް އެހީތެރިވާ ނިއުރޯޓްރާންސްމިޓަރެކެވެ.
މި ފައިދާތައް ހުރި ނަމަވެސް، ބައެއް މީހުން އަދިވެސް ކަރާގެ އޮށް ކެއުމާމެދު ޖެހިލުންވެއެވެ. ނަމަވެސް، ކަރާގެ އޮށަކީ ކެއުމަށް ރައްކާތެރި އަދި ރަނގަޅަށް ތައްޔާރުކުރެވިއްޖެނަމަ ވަރަށް ރަހަ ރަނގަޅު އެއްޗެކެވެ.
އެގޮތުން އެންމެ މަޤްބޫލު އެއް ގޮތަކީ ކަރާގެ އޮށް ކުޑަ ލޮނުކޮޅަކާއެކު ހަނާކޮށްލައިގެން ސްނެކެއްގެ ގޮތުގައި ކެއުމެވެ. އަދި އޭގެ އިތުރުން، އޮށް މުގުރައިގެން، ސްމޫތީ، ސަލަޑު، ނުވަތަ ބޭކްކުރާ ތަކެއްޗަށް އަޅައިގެންވެސް ކެވިދާނެއެވެ.
ކަރާގެ އޮށަކީ ކެއުމަށް ފައިދާހުރި އަދި ރަހަ ރަނގަޅު، މޭވާގެ ބައެކެވެ. އެހެންކަމުން، ދެން ފަހަރަކު ތިބާ ކަރާ ކާއިރު، އޮށް ރައްކާކުރުމަށް ވިސްނާށެވެ - އެއީ ފަހަރެއްގައި ތިބާގެ ދުޅަހެޔޮކަން އިތުރުކުރުމުގެ ސިއްރު ކަމުގައި ވެދާނެއެވެ!
Advertisement
This content is created and paid for by advertisers and does not involve Voice Journalists