މިހުރީ އިހްތިޖާޖުކުރާ ޒުވާނުންނާއެކު؛ މުޒާހަރާ ރޫޅާލުން ކުށްވެރި ކުރަން: ރައީސް ޞާލިޙް
ގުދަނެއްގެ ފުރާޅު މައްޗަށް އަންހެނަކު ވެއްޓުނު ހާދިސާއާ ގުޅިގެން ޒުވާނުން ސިލްސިލާކޮށް ކުރިއަށް ގެންދާ އިހްތިޖާޖު ރޫޅާލުމަށް ފުލުހުން ބާރުގެ ބޭނުންކޮށްފައިވާތީ އެކަން ކުރީގެ ރައީސް އިބްރާހިމް މުޙައްމަދު ޞާލިޙް ކުށްވެރިކުރައްވައިފިއެވެ.
އަންހެން މީހާ ވެއްޓުނު ހާދިސާއާ ގުޅިގެން ޒުވާނުން މުޒާހަރާ ކުރަނީ މަޖީދީމަގުން ބައެއް ބަންދުކޮށްގެން ބޯޑުތައް ހިފައިގެން ތިބެއެވެ. ރޭވެސް އިންސާފު ހޯދުމަށް ނުކުމެ ތިބި މުޒާހަރާގެ ބައެއް ބައިވެރިން މަގުމަތީ އިށީންދެގެން ތިބި އިރު އެތަނުން ބައެއް މީހުން ތިބީ ކެރަމް ކުޅޭށެވެ. އަނެއް ބަޔަކު މިއުޒިކު ކުޅެ ނަށަމުން ދިޔަ އިރު، ޓީޓީ ކުޅެމުންދިޔަ ބަޔަކުވެސް އެތަނުގައި ތިއްބެވެ.
އެ މުޒާހަރާ ފުލުހުން ވަނީ ބާރުގެ ބޭނުން ކޮށްގެން ރޫޅާލައި، އެމީހުން ބޭނުން ކުރަމުންއައި ސްޕީކަރުވެސް ފުލުހުންގެ ބެލުމުގެ ދަށަށް ގެންގޮސް، އަންހެނަކާއި ފިރިހެނަކުވެސް ހައްޔަރު ކޮށްފައެވެ.
އެކަމާއި ގުޅިގެން ރައީސް ޞާލިޙް އެކްސްގައި ކުރެއްވި ޕޯސްޓެއްގައި ވިދާޅުވީ، މުޅި ޤައުމު ސިއްސުވާލި މައްސަލައަކާ ގުޅިގެން، ކަމާބެހޭ އިދާރާތައް ޖަވާބުދާރީކުރުވުމަށާއި، އަންހެން މީހާއަށް އިންސާފު ހޯދުމަށް ގޮވާލައި ޒުވާނުން ކުރަމުންދާ ސުލްޙަވެރި އިހްތިޖާޖު ރޫޅާލުމަށް ފުލުހުން ވަނީ ޙާލަތާ ނުބައްދަލު ބާރުގެ ބޭނުން ކޯސްފައި ކަމަށެވެ. އަދި އެކަން ހަރުކަށި އިބާރާތުން ކުށްވެރި ކުރައްވާ ކަމަށް ވިދާޅުވިއެވެ.
މިއާއެކު އެމަނިކުފާނު ވިދާޅުވެފައިވަނީ، ސިޔާސީ ޕާޓީތަކެއްގައި ނޫޅޭ ޒުވާނުންތަކެއް ކުރި މި އިހްތިޖާޖު ރޫޅާލުމަށް ސަރުކާރުން މިފަދަ ހަރުކަށި ފިޔަވަޅުތަކެއް އަޅަން ޖެހުނުކަމީ، މި މައްސަލައިގައި ސަރުކާރުގެ ނިޔަތް ރަނގަޅު ނޫންކަމުގެ ހެއްކެއް ކަމަށެވެ.
ސުލްޙަވެރިކަމާއެކު އެއްވެ އުޅުމުގެ ޙައްޤާއި، ޤާނޫނުގެ ކުރިމަތީގައި އެންމެން ހަމަހަމަވުމާއި، އިންސާފު ލިބިގަތުމުގެ ޙައްޤަކީ ދިވެހިރާއްޖޭގެ ޑިމޮކްރަސީގެ އަސާސީ ބައިތަކެއް. އިންސާފު ހޯދުމަށާއި ސަރުކާރު ޖަވާބުދާރީ ކުރުވުމަށް މަސައްކަތްކުރާ ޒުވާންނާއެކު އަޅުގަނޑު މިހުރީ ވަރަށް ސާބިތުކަމާއެކު
ކުރީގެ ރައީސް އިބްރާހީމް މުޙައްމަދު ޞާލިހް
ރޭގ އިހްތިޖާޖު ރޫޅާލި ސަބަބު ހާމަކޮށް ފުލުހުން ނެރުނު ބަޔާނެއްގައި ބުނީ، އެ އިހްތިޖާޖުގެ ސަބަބުން އެ ސަރަހައްދުގައި ދިރިއުޅޭ ރައްޔިތުންނާއި ވިޔަފާރިތަކަށް ނޭދެވޭ އަސަރު ކުރާކަމުގެ ޝަކުވާ ކެނޑިނޭޅި ދިޔައީ ލިބެމުން ކަމަށެވެ.
މި އިހްތިޖާޖުގައި މަޖީދީމަގު ފަދަ މުހިންމު މަގެއް ދަތުރުފަތުރަށް ބަންދުކޮށް މިއުޒިކު ކުޅުމާއި ޓޭބަލް ޓެނިސް އަދި ކެރަމް ކުޅުން ފަދަ އާންމު މަސްލަހަތަށް ފުށުއަރާ ކަންތައްތަކެއް ކުރަމުން ގެންދާތީ އެކަންކަން ނުކުރުމަށް ތަކުރާރުކޮށް ނަސޭހަތްތެރިވެފައިވާނެ ކަމަށެވެ.
މީގެ އިތުރުން މާދަމާއަކީ ޖީސީއީ އޯލެވަލް އިމްތިހާނަށް ގިނަ ދަރިވަރުން ހާޒިރުވާން ޖެހޭ ދުވަހަކަށް ވާތީ އެކިރޭ މަތީން ތަކުރާރުކޮށް ނަސޭހަތްތެރިވެ ގާނޫނީ އިންޒާރު ދިނުމަށް ފަހު މިރޭގެ އިހްތިޖާޖު ރޫޅާލާފައިވާ ކަމަށް ފުލުހުން ބުންޏެވެ.
މި ފިޔަވަޅު އަޅާފައިވަނީ ދަރިވަރުންގެ ތައުލީމީ މަސްލަހަތާއި އާންމު ރައްޔިތުންގެ ދިރިއުޅުމަށް ކުރާ އަސަރުތަކަށް ރިއާޔަތް ކުރުމަށް ފަހު ކަމަށް ވެސް ފުލުހުން ބުންޏެވެ.
Advertisement
This content is created and paid for by advertisers and does not involve Voice Journalists
