ހިތްވަރު ދޭންވީ ޒުވާނުން މަސްތުވާތަކެތީން ދުރުހެލި ކުރުވުމަށް ކަމަށް އެމްޑީޕީގެ އަންހެނުންގެ ރޫހުގެ ރައީސާ ރޮޒައިނާ އާދަމް ވިދާޅުވެއްޖެ އެވެ.
އެކަމަނާ މިހެން ވިދާޅުވީ އެކްސް ގައި މިއަދު ކުރެއްވި ޕޯސްޓެއްގަ އެވެ.
އެކްސްގައި ނުފޫޒުގަދަ އެކައުންޓަކުން ވަނީ އެކި މައްސަލަތަކާމެދު ވާހަކަ ދައްކަން ޓޯކް ޝޯތަކެއް ފަށާފަ އެވެ. އެ ޝޯގައި މިއަދު ވާހަކަ ދައްކާނެ މައުލޫ އާންމުކޮށް ކޮށްފައިވާ ޕޯސްޓަކަށް ރޮޒައިނާ ކުރެއްވި ކޮމެންޓެއް ގައި ވިދާޅުވީ ހަގީގަތުގައި މުހިންމު ކަންކަމުގެ ވާހަކަ ދައްކާނަމަ އޭނާގެ އުންމީދަކީ ޒުވާނުން މަސްތުވާތަކެތިން ދުރުހެލި ކުރުމާމެދު ވާހަކަ ދައްކާނެ ކަމަށެވެ.
އަދި ދިރިއުޅުން ކޮންޓްރޯލް ކޮށް ވަށައިގެންވާ މާހައުލަށް ހޭލުންތެރިކުރުވުމަށް ހިތްވަރު ދޭން ވާހަކަ ދައްކާނެ ކަމަށް އުންމީދު ކުުރާ ކަމަށް ވިދާޅުވި އެވެ.
މިިދިޔަ މަހުގެ 18 ވަނަ ދުވަހުގެ އިމާރާތެއްގެ މަތީން އެ އިމާރާތާއި ޖެހިގެން ހުރި ގުދަނެއްގެ ފުރާޅު މައްޗަށް އަންހެނަކު ވެއްޓުނު ހާދިސާއެއް ހިނގި އެވެ. އެ ހާދިސާ ތަހުގީގު ކުުރުމާއި މައުލޫމާތު އާންމު ކުުރުމުގައި ފުލުހުން ފުރަތަމަ އަމަލު ކުރި ގޮތުން މައްސަލަ ހޫނުވެ ބޮޑު ބަހުސެއް ވަނީ އުފެދިފަ އެވެ. އަދި ސިލްސިލާ މުޒާހަރާތަކެއް ވަނީ ފެށިފަ އެވެ.
އެ މުޒާހަރާތަކަކީ އަނިޔާވި އަންހެން މީހާއަށް އިންސާފު ހޯދާ ދިނުމަށް ގޮވާލާ ފަށާފައިވާ މުޒާހަރާތަކެކެވެ.
އެ ހާދިސާ ހިނގުމުގެ ކުރީން އަންހެން މީހާއާ އޭނާއާއެކު އެންމެ ފަހު ވަގުތާއި ހަމައަށް އުޅުނު ފިިރިހެން މީހާއާ ޒުވާން އިތުރު ބަޔަކު މަސްތުވެ ޕާޓީ ކުުރިކަމުގެ ތުހުމަތު އެބަ އޮތެވެ. އަންހެން މީހާއާ ފިރިހެން މީހާ މަސްތުވާތަކެއްޗަށް ޕޮޒިޓިވް ވި ކަމަށް ވެސް ފުލުހުން ބުނެ އެވެ.
ނަމަވެސް މަސްތުވުމާއި ޕާޓީ ކުރުން ފަދަ ފާހިޝް އަދި ގާނޫނާއި ހިލާފު ކަަންކަމުގެ ވާހަަކަ ނުދައްކާ ހަމައެކަނި އެއް ކަމަކަށް ވާހަކަ ދައްކާތީ ގިނަ ބަޔަކު ދަނީ މުޒާހަރާ ކުރާ މީހުންނާއި އަންހެން ކުއްޖާގެ ދިފާއުގައި ވާހަކަ ދައްކާ މީހުންނަށް ފާޑު ކިޔަމުންނެވެ. އަދި ޕާޓީ ކުރުމާއި މަސްތުވުމަކީ އާދައިގެ ކަމަކަށް ހެދުމަށް ބަޔަކު މަސައްކަތް ކުރާ ކަމުގެ ތުހުމަތު ވެސް ވަނީ ކުރެވިފަ އެވެ.
Advertisement
This content is created and paid for by advertisers and does not involve Voice Journalists
