ދިވެހިރާއްޖޭގައި މީޑިއާގެ މިނިވަންކަމާއި މުސްތަޤިއްލުކަން ކަށަވަރުކޮށްދިނުމުގައި ދެމިތިބޭނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު މިމޭރުމުން ވިދާޅުވެފައިވަނީ ބައިނަލްއަޤްވާމީގޮތުން މިއަދު ފާހަގަކުރަމުންދާ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތުގައި ސޯޝަލް މީޑިއާގައި ކުރެއްވި ޕޯސްޓެއްގައެވެ. ރައީސް ވިދާޅުވީ ރާއްޖޭގައި ނޫސްވެރިކަމުގެ މިނިވަންކަމާއި، ޒިންމާދާރު މީޑިއާއެއް ކަށަވަރުކޮށްދިނުމުގައި ދެމިތިބޭނޭކަމަށެވެ.
އަހުލާގުގެ ހަމަތަކުގެ މަތިން ޒިންމާދާރު ނޫސްވެރިކަމެއް އޮތުމުގެ މުހިއްމުކަން ފާހަގަކުރައްވައި ރައީސް ވިދާޅުވީ، އިންސާނީ ކަރާމާތް ރައްކާތެރިކުރުމާއި އަދުލުއިންސާފް ކުރިއެރުވުމަށް ކުރެވޭ މަސައްކަތުގައި މީޑިއާގެ މުހިއްމުކަން ރައީސް ފާހަގަކުރެއްވިއެވެ. މި ޕޯސްޓްގައި ރައީސް ވަނީ، "ރިޕޯޓިން އިން ދަ ބްރޭވް ނިއު ވަރލްޑް: ދަ އިމްޕެކްޓް އޮފް އާޓިފިޝަލް އިންޓެލިޖެންސް އޮން ޕްރެސް ފްރީޑަމް އެންޑް ދަ މީޑިއާ" މި ޝިއާރުގެ މައްޗަށް އަލިއަޅުއްވާލައްވައި ބައެއް ކަންކަން ފާހަގަކުރައްވާފައެވެ. މިގޮތުން އާއްމުނާއި ހަމަޔަށް ހަޤީޤަތާއި އެއްގޮތަށް މައުލޫމާތު ފޯރުކޮށްދިނުމުގައި އާޓިފިޝަލް އިންޓެލިޖަންސް (އޭއައި) ގެ މުހިއްމުކަންވެސް ރައީސްގެ ޕޯސްޓްގައި ވަނީ ފާހަގަކުރައްވާފައެވެ.
މި ޕޯސްޓްގައި ރައީސް ޑރ.މުއިއްޒު ވަނީ ދުނިޔޭގެ އެކި ކަންކޮޅުތަކުގައި ހަރަކާތްތެރުވާ ނޫސްވެރިންގެ ހިތްވަރާއި ކެރުމަށް ތައުރީފް ކުރައްވާފައެވެ. އެގޮތުން ޑިމޮކްރަޓިކް މުޖުތަމައުއެއްގެ ދުޅަހެޔޮކަން ކަށަވަރުކުރުމުގައި މީޑިއާގެ ދައުރު ވަރަށްބޮޑުކަމަށް ރައީސް ވިދާޅުވިއެވެ.
ކޮންމެ އަހަރެއްގެވެސް މެއިމަހުގެ 3 ވަނަ ދުވަސް ފާހަގަކުރަނީ ބައިނަލްއަޤްވާމީގޮތުން ފާހަގަކުރާ ނޫސްވެރިކަމުގެ މިނިވަންކަމުގެ ދުވަހުގެ ގޮތުގައެވެ. ނޫސްވެރިކަމުގެ މިނިވަންކަމުގެ ދުވަސް ފާހަގަކުރަމުންދާއިރު، ރިޕޯޓާސް ވިތްއައުޓް ބޯޑާސް އިން ގައުމުތަކުގެ ނޫސްވެރިކަމުގެ މިނިވަންކަން ބަލައި، ނެރޭ ވޯލްޑް ޕްރެސް ފްރީޑަމް އިންޑެކްސްއަށް ބަލާއިރު، ރާއްޖެ ވަނީ 2 ދަރަޖަ ކުރިއަށް ޖެހިލާފައެވެ.
Advertisement
This content is created and paid for by advertisers and does not involve Voice Journalists
