ވ. އާރަށް ކުއްޔަށް ދިނުމާ ގުޅޭ ރިޝްވަތާއި މަނީ ލޯންޑަރިންގެ މައްސަލައިގައި ކުރީގެ ރައީސް ޢަބްދުالله ޔާމީން ޢަބްދުލްޤައްޔޫމުގެ މައްޗަށް ހިންގާ ޝަރީޢަތް، ގާތްގަނޑަކަށް އެއް އަހަރު ދުވަހުގެ މެދުކެނޑުމަކަށްފަހު އަންގާރަ ދުވަހު ކްރިމިނަލް ކޯޓުގައި ފަށައިފިއެވެ.

މިއަދުގެ އަޑުއެހުމުގައި ކުރިއަށް ގެންގޮސްފައިވަނީ ޝަރީޢަތް ފެށުމުގެ ކުރިން ހުށަހަޅާ ހުށަހެޅުންތައް އެހުމުގެ މަރުޙަލާއެވެ.

ރައްޔިތުންގެ މަޖިލީހުގެ ކުރީގެ ފެލިދޫ ދާއިރާގެ މެންބަރު ޔޫސުފް ނަޢީމުގެ އަތުން ރިޝްވަތު ނެންގެވި ކަމަށް ބުނެ، ޔާމީނުގެ މައްޗަށް 2022 ވަނަ އަހަރުގެ ޑިސެމްބަރު 25 ގައި އިއްވި 11 އަހަރުގެ ޖަލު ޙުކުމް ހައި ކޯޓުން ވަނީ 2024 ވަނަ އަހަރުގެ އެޕްރީލް 18 ގައި ބާޠިލުކޮށް، މައްސަލަ އަލުން ބެލުމަށް އަންގާފައެވެ.

ޝަރީޢަތުގައި އެ ފައިސާއަކީ ޑޮލަރު މާރުކުރުމުގެ މުޢާމަލާތަކުން ލިބުނު ފައިސާ ކަމަށް ވިދާޅުވެ ޔާމީން ދިފާޢީ ހެކި ހުށަހެޅުއްވުމުން، ދައުލަތުން ވަނީ އެ ހެކިތަކާ ދެކޮޅަށް އައު ހެކި ހުށަހަޅާފައެވެ. ނަމަވެސް އެ އައު ހެކިތަކަށް ރިޢާޔަތް ނުކުރުމަށް ހައި ކޯޓުން އެންގުމާ ގުޅިގެން ޕީޖީ އޮފީހުން ސުޕްރީމް ކޯޓުގައި އެ މައްސަލަ އިސްތިއުނާފު ކުރިއެވެ.

ސުޕްރީމް ކޯޓުން ޖުލައި 1 ގައި ނިންމީ ދައުލަތަށް އެ އައު ހެކިތައް ހުށަހެޅުމުގެ ފުރުޞަތު ނުދިނުމަށެވެ. މިގޮތުން ބޭރުކުރި ހެކިތަކުގެ ތެރޭގައި ދިފާޢީ މުހިންމު ހެކިވެރިއެއް ކަމަށްވާ އަޙްމަދު ނަރީޝްގެ އެމްއެންޑީއެފް ހާޒިރީ ރެކޯޑާއި، އިކޮނޮމިކް ޔޫތު ކައުންސިލްގެ ބައްދަލުވުންތަކުގެ ލިޔެކިޔުންތައް ހިމެނެއެވެ.

ސުޕްރީމް ކޯޓުގެ ނިންމުން އައުމާ ހަމައަށް މި މައްސަލައިގެ އިސްތިއުނާފް އޮތީ މެދުކެނޑިފައެވެ. މީގެއިތުރުން، ރ. ފުއްގިރި މައްސަލައިގައި ޔާމީންގެ މައްޗަށް ހިންގާ ޝަރީޢަތުގެ އަޑުއެހުމެއްވެސް މިއަދު ދުވަހަށް ތާވަލުކުރި ނަމަވެސް، ދައުލަތުގެ ވަކީލަކު އާލާސްކަންފުޅާ އުޅުއްވާތީ އެ އަޑުއެހުން ވަނީ ކެންސަލްވެފައެވެ.

އާރަށު މައްސަލައިގެ ޙުކުމް ބާޠިލުވުމަކީ ޔާމީނުގެ މައްޗަށް އިއްވި ޖިނާއީ ޙުކުމެއް ކޯޓަކުން ބާޠިލުކުރި ދެވަނަ ފަހަރެވެ. މީގެކުރިން 2021 ވަނަ އަހަރު ސުޕްރީމް ކޯޓުން ވަނީ ގއ. ވޮޑަމުލާ މައްސަލައިގައި އިއްވި ފަސް އަހަރުގެ ޖަލު ޙުކުމްވެސް ބާޠިލުކޮށްފައެވެ. އާރަށު ޙުކުމާ ގުޅިގެން 2023 ވަނަ އަހަރުގެ ރިޔާސީ އިންތިޚާބުގައި ޔާމީނަށް ވާދަކުރެއްވޭ ގޮތް ނުވުމުން، ފުރަތަމަ އިންތިޚާބު ބޮއިކޮޓް ކުރުމަށް ގޮވާލެއްވި ނަމަވެސް، ފަހުން އެމަނިކުފާނު ވަނީ ޕީޕީއެމް-ޕީއެންސީގެ ކެންޑިޑޭޓް ރައީސް ޑރ. މުޙައްމަދު މުޢިއްޒަށް ތާއީދު ކުރައްވާފައެވެ.

ރައީސް މުޢިއްޒު އިންތިޚާބު ކާމިޔާބު ކުރެއްވި ދުވަހުގެ ޖެހިގެން އައި 2023 އޮކްޓޫބަރު 1 ގައި ޔާމީން ގެއަށް ބަދަލުކުރެވުނު ނަމަވެސް، އައު ސަރުކާރު ވެރިކަމާ ހަވާލުވިތާ ހަފުތާއެއްގެ ތެރޭގައި ޔާމީން ވަނީ ޕީޕީއެމް ދޫކުރައްވައި ޕީޕަލްސް ނެޝަނަލް ފްރޮންޓް (ޕީއެންއެފް) އުފެއްދެވުމުގެ މަސައްކަތް ފައްޓަވާފައެވެ. އަދި ސަރުކާރަށް ފާޅުގައި ފާޑުވިދާޅުވަމުން ގެންދަވާ ޔާމީން ވަނީ 2028 ވަނަ އަހަރުގެ ރިޔާސީ އިންތިޚާބުގައި ވާދަކުރައްވަން ރާއްވަވާ ކަމަށް އިޢުލާނު ކުރައްވާފައެވެ.

އެހެންނަމަވެސް، އެ އިންތިޚާބާ ދެމެދު އެމަނިކުފާނުގެ މައްޗަށް އުފުލާފައިވާ މި ޤާނޫނީ މައްސަލަތައް އަދިވެސް މިވަނީ ނުނިމިއެވެ.