އިންޑިއާއިން ސްރީލަންކާއަށް ގާތްގަނޑަކަށް 3 ޓަނުގެ ޓީބީ އަށް ފަރުވާކުރާ ބޭސް ފޮނުވައި، އެ ގައުމުގެ އާންމު ސިއްހީ ނިޒާމަށް އެހީތެރިވުމުގައި ދެމިއޮންނާނެކަމުގެ ޔަގީންކަން އަލުން ދީފިއެވެ.
އިންޑިއާގެ އެކްސްޓަރނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރު ވިދާޅުވި ގޮތުގައި، މި ބޭސްތައް ކޮލަމްބޯއަށް ފޮނުވާފައިވަނީ އިންޑިއަން އެއަރ ފޯސްގެ ސީ130ޖޭ މަތިންދާބޯޓެއްގައެވެ.
މީގެ އިތުރުން، ސެޕްޓެމްބަރު 16 ގައި އިންޑިއާ ސަރުކާރުގެ މާލީ އެހީތެރިކަމާއެކު ސްރީލަންކާގެ މަންނާރު ޑިސްޓްރިކްޓް ޖެނެރަލް ހޮސްޕިޓަލުގައި ދެ ބުރީގެ އެމަރޖެންސީ ޔުނިޓެއް އިމާރާތްކުރުމުގެ މަސައްކަތް ވަނީ ފަށާފައެވެ. 600 މިލިއަން ސްރީލަންކާ ރުޕީސްގެ ހިލޭ އެހީގެ ދަށުން ކުރިއަށްދާ މި މަޝްރޫއުގެ ބިންގާއެޅުމުގެ ރަސްމިއްޔާތުގައި ސްރީލަންކާގެ ރައީސް އަނޫރާ ކުމާރަ ޑިސާނާޔަކަ އަދި އިންޑިއާއިން ސްރީލަންކާއަށް ކަނޑައަޅާފައި ހުންނަވާ ހައިކޮމިޝަނަރު ސަންތޯޝް ޖާ ބައިވެރިވެވަޑައިގެންނެވިއެވެ.
މި ފަހަކަށް އައިސް އިންޑިއާއިން ދަނީ ސްރީލަންކާގެ ތަރައްގީއަށާއި އިޖުތިމާއީ ކަންކަމަށް އެކި ދާއިރާތަކުން ބޮޑެތި އެހީތަކެއް ފޯރުކޮށްދެމުންނެވެ. އަދި ސިއްހީ އެހީތެރިކަމަކީ ނުވަތަ ހެލްތު ޑިޕްލޮމެސީއަކީ އިންޑިއާއިން އެހެން ގައުމުތަކާއެކު، ޚާއްސަކޮށް ސަރަހައްދީ ޤައުމުތަކާއެކު، ބާއްވާ ޑިޕްލޮމެޓިކް ގުޅުމުގެ މުހިއްމު ބައެކެވެ.
Advertisement
This content is created and paid for by advertisers and does not involve Voice Journalists
