މިއަހަރުގެ ފުރަތަމަ ކުއާޓަރުގައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، (އެމްޓީސީސީ) އަށް 418.5 މިލިއަން ރުފިޔާގެ އާމްދަނީއެއް ލިބިއްޖެއެވެ.

އެމްޓީސީސީން ނެރެ އާއްމުކޮށްފައިވާ އެކުންފުނީގެ މިއަހަރުގެ ފުރަތަމަ ކުއާޓަރުގެ މާލީބަޔާނަށް ބަލާއިރު، މި ކުއާޓަރުގައި އާމްދަނީގެ ގޮތުގައި 418 މިލިއަނަށްވުރެ ގިނަ ރުފިޔާ ލިބުނުއިރު ޖުމްލަ ފައިދާ އުޅެނީ، 43.3 މިލިއަން ރުފިޔާގައެވެ. މި މުއްދަތުގެ ތެރޭގައި އެކުންފުނިން ވިއްކި މުދަލަށް ޖެހުނު އަގު ހުރީ 375 މިލިއަން ރުފިޔާގައެވެ.

މިއަހަރުގެ ފުރަތަމަ ކުއާޓަރުގައި ހަރަދުތައް ކެނޑުމަށްފަހު ވިޔަފާރި ހިންގައިގެން ވަނީ، 43.8 މިލިއަން ރުފިޔާގެ ގެއްލުމެއް ލިބިފައެވެ. އަދި މި މުއްދަތުގެ ތެރޭގައި އެކުންފުންޏަށް 62.1 މިލިއަން ރުފިޔާގެ ގެއްލުމެއް ވަނީ ލިބިފައެވެ.

Advertisement

އެމްޓީސީސީގެ މިދިޔަ ކުއާޓަރުގެ މާލީބަޔާނުގފެ ބެލެންޝީޓަށް ބަލާއިރު، ފުރަތަމަ ކުއާޓަރުގައި ގެއްލުންވިނަމަވެސް ވިޔަފާރީގެ ގޮތުން އެކުންފުންޏަށް ލިބެންޖެހޭ ފައިސާގެ އަދަދު 2.7 ބިލިއަން ރުފިޔާއަށް އަރައެވެ. 

ފުރަތަަމަ ކުއާޓަރުގެ ތެރޭގައި އެމްޓީސީސީން ކުރިއަށްގެންދަން ފަށާފައިހުރި މަޝްރޫޢުތަކަށް ބަލާއިރު، އެއާޕޯޓް ހެދުމުގެ 6 މަޝްރޫޢުއަކާއި، އިމާރާތްކުރުމުގެ 87 މަޝްރޫޢުއެއްގެ އިތުރުން 71 ބަނދަރާއި، ބިންހިއްކުމުެގ 32 މަޝްރޫޢުއެއްގެ މަސައްކަތް ފަށާފައިވާކަން ފާހަގަކޮށްލެވެއެވެ.