ރައީސްގެ ސާދާ ޖަވާބެެއް: ދިމްޔާތުން އެކި ކުލަކުލައިގެ ދަބަސްތައް ނެރޭނެ
މ. ދިމްޔާތުން އެކި ކުލަކުލައިގެ ދަބަސްތައް ނެރޭނެ ކަމަށް ވިދާޅުވެ ވާދަވެރީން ދައްކަވާ ވާހަކަތަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު, ސާދާ ޖަވާބެއް ދެއްވައިފި އެވެ.
ދިމްޔާތަކީ ރައީސް މުއިއްޒުގެ ގެކޮޅެވެ. އެއީ މާލޭގައި ހުރި އެންމެ އުސް އިމާރާތްތަކުގެ ތެރޭގައި ހިމެނޭ އިމާރާތެކެވެ.
ރައްޔިތުންގެ މަޖިލީހުގެ ޕީއެންސީ މެންބަރުންނަށް ކޮންމެ މަހަކު ބައިލައްކަ ރުފިޔާ ދެއްވާ ކަމަށާ އެ ފައިސާ އެމަނިކުފާނުގެ ދިމްޔާތުން ނެރެގެން ގެންދަނިކޮށް ފެނިފައިވާ ކަމަށް ބުނެ ނޫސްވެރިއަކު މިއަދު ވަނީ ސުވާލުކޮށްފަ އެވެ. ފައިސާ ނެރުނީ ކަޅު ދަބަހެއްގައި ކަމަށް ވެސް ބުނެފައިވެ އެވެ. އެ މަންޒަރުތައް ހިމަނައިގެން ވީޑިއޯއެއްވެސް ހަދާ އާންމުކޮށްފައިވާނެ ކަމަށް ބުނެފައިވެ އެވެ.
އެ ސުވާލަކަށް ޖަވާބު ދެއްވަމުން ރައީސް ފުރަތަމަ ވިދާޅުވީ މެންބަރުންނަށް ބައިލައްކަ ދެއްވާ ވާހަކަ އަކީ ދޮގު ވާހަކައެއް ކަމަށެވެ. އަދި ދިމްޔާތުން ކަޅު ދަބަހެއްގައި ފައިސާ ނެރުނު ވާހަކައަކީ ދޮގެއް ކަމަށް ވެސް ވިދާޅުވި އެވެ.
އޭގެ ފަހުން ދެން ރައީސް ސާފުކޮށް ދެއްވީ ދިމްޔާތަކީ ކޮން ގޮތަކަށް އޮޕަރޭޓް ކުރާ އިމާރާތެއް ކަމެވެ. ރައީސް ވިދާޅުވީ ކަންދިމާކުރި ގޮތުން މިއަދުވެސް ވެރިރަށުގައި ހުރި އެންމެ ބޮޑު ގެސްޓް ހައުސް އަކީ ދިމްޔާތު ކަމަށެވެ. ދިމްޔާތުގައި ކުއްޔަށް ދޭ 55 ކޮޓަރި އެބަ ހުރި ކަމަށް ވިދާޅުވި އެވެ.
އެހެން ކަމުން ދިމްޔާތުން އެކި ކުލަކުލައިގެ ދަބަސްތައް ނެރޭނެ ކަމަށް އެމަނިކުފާނު ވިދާޅުވި އެވެ. އެމަނިކުފާނު އެ ވިދާޅުވީ އެ ގެސްޓްހައުސްގައި ކުއްޔަށް ތިބޭ މީހުން ވައްދާ ނެރޭ އެކި ދަބަސްތަކަށެވެ.
ދިމްޔާތުގައި ދުވަހު ކުލީ ކޮޓަރީގެ ވިޔަފާރި ހިންގާތާ އެތައް އަހަރެއް ވެއްޖެ އެވެ. ރައީސްގެ ބައްޕާފުޅު ފެއްޓެވި އެ ވިޔަފާރި އެމަނިކުފާނު އިތުރަށް ފުޅާކުރައްވާފައި ވަނީ ބޮޑު އިމާރާތެއް އަޅުއްވާފަ އެވެ.
Advertisement
This content is created and paid for by advertisers and does not involve Voice Journalists
