ސަރުކާރުގެ މަގާމެެއްގައި ހުންނަވައިގެން ކޮރަޕްޝަންގެ އެއްވެސް އަމަލެއް ހިންގުމަށް އެއްވެސް ބޭފުޅަކަށް ފުރުސަތު ދެއްވައިގެން ނުހުންނާނެ ކަމަށް ވިދާޅުވާ ވިދާޅުވުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވެސް ތަކުރާރު ކުރައްވައިފި އެވެ.

މިއަދު ހެނދުނުން ފެށިގެން މިރެއާ ހަމައަށް ދެމިގެން ދިޔަ ނޫސްވެރީންގެ ބައްދަލްވުމުގައި ތަފާތު އެކި މައުލޫތަކުން ނޫސްވެރީން ވަނީ ގިނަ ސުވާލުތަކެއް ކޮށްފަ އެވެ. އޭގެ ތެރޭގައި ކޮރަޕްޝަންގެ ތުހުމަތު ކުރެވި ބައެއް ބޭފުޅުން މަގާމުތަކުން ވަކިކުރެއްވި ކުރެއްވުމާއި ގުޅޭގޮތުން ވެސް ސުވާލު ކޮށްފައިވެ އެވެ.

ރައީސް ވިދާޅުވީ އެމަނިކުފާނު ވެރިއަކަށް ހުންނަވާ ސަރުކާރުގެ ތެރެއިން ކޮރަޕްޝަންގެ އަމަލެއް ހިންގަން އެއްވެސް މީހަކަށް ފުރުސަތު ނުދެއްވާނެ ކަމަށެވެ. ދައުލަތުގެ އެއްވެސް އިދާރާއެއްގައި އަދި އެއްވެސް ކުންފުންޏަކުން ވެސް އެ ފުރުސަތު ނުލިބޭ ކަމަށް ވިދާޅުވި އެވެ.

"ކޮރަޕްޝަނަށް އެއްވެސް ފުރުސަތެއް ނުދޭނަން އަޅުގަނޑު އެއްވެސް ތާކު. އެކަން ކުރަން ބޭނުންވާ މީހަކު މި ސަރުކާރުުގެ ތެރެއިން އެކަން ހަނދާން ނައްތާލަން ޖެހޭނީ. ނުކުރެވޭނެ އަޅުގަނޑު މި ދަންނަވަނީ,"

ކުރީގެ ކޮންޓްރޯލާ ޝަަމްއާން ވަހީދު މަގާމުން ވަކިކުރައްވާ އޭނާގެ މައްޗަށް ޖިނާއީ ތަހުގީގެއް ހިންގަމުން ދަނީ އުސޫލުގެ ތެރެއިން ކަމަށް ރައީސް ވިދާޅުވި އެވެ. ރައީސް ވިދާޅުވީ ހޯމް މިނިސްޓަރު އަލީ އިހްސާންގެ ކޮރަޕްޝަންގެ މައްސަލަތަކެއް ޝަމްއާން, އެމަނިކުފާނުގެ ސަމާލު ކަމަށް ގެނައި ކަމަށް ބުނާ ވާހަކަ އަކީ ދޮގެއް ކަމަށެވެ.

އަދި ޝައްމާންއަށް އެމަނިކުފާނު މެސެޖު ކުރެއްވި ކަމަށް ބުނާ ބުނުމަކީ ވެސް ދޮގެއް ކަމަށެވެ.

ޝަމްއާންއާ މެދު އެއްވެސް ޒާތީ ކަމެއް ނެތް ކަމަށާ ކޮރަޕްޝަންގެ އަމަލެއް ހިންގަވާނަމަ ކޮންމެ ބޭފުޅަކާމެދު ވެސް ފިޔަވަޅު އަޅުއްވާނެ ކަމަށެވެ.

"އަޅުގަނޑުމެނަށް ތުހުމަތު ކުރެވޭ, ނޫނިއްޔާ ހެކިތަކާ އެކު ފެންނަން ހުރި ކަންތައްތަކެއް ހުރީމަ [ޝައްމާން] މަގާމުން ވަކިކުރަން ޖެހުނީ. ދެން ޑިއު ޕްރޮސެސްގެ ތެރެއިން ދިޔައީމަތާ އެ މައްސަލަ ނިމޭނީ. އެހެން ބޭފުޅު ނަމަވެސް އެގޮތައް ކަންކުރެއްވި ނަމަވެސް އެ ފިޔަވަޅު އެގޮތައް އަޅާނެ" ރައީސް މިއަދު ވިދާޅުވި އެވެ.