ކުރީގެ ރައީސް ޔާމީން ޢަބްދުލްޤައްޔޫމްގެ ވެރިކަމުގައި ސަރުކާރުން ހުޅުމާލޭ ދެވަނަ ފިޔަވަހީގައި އެޅި ހިޔާ ފުލެޓް، ލިބޭނެކަމަށް އެ ސަރުކާރުން ކަނޑައަޅައި، ފުލެޓް ދިން މީހުންގެ ތެރެއިން، ނިމިދިޔަ ސަރުކާރުން ނުހައްގުން ފުލެޓް އަތުލި މީހުންނަށް، ފުލެޓް ދޭނެ ބޯހިޔާވަހިކަމުގެ މަޝްރޫޢު ރައީސް ޑރ މުޙައްމަދު މުޢިއްޒު އިޢުލާން ކުރައްވައިފިއެވެ.
މިސަރުކާރުން ފަށާ، އެންމެ ފުރަތަަމަ ގެދޮރުވެރިކަމުގެ މަޝްރޫއުއިން، ހިޔާ ފްލެޓް އަތުލި މީހުންނަށް ފުލެޓް ދެއްވާނެ ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވަޢުދުވެވަޑައިގެންނެވީ، ރިޔާސީ އިންތިޚާބުގެ ކެންޕެއިންގެ ތެރެއިން އެ ސަރަހައްދުގައި ދިރިއުޅޭ ފަރާތްތަކާއެކު ބޭއްވެވި ބައްދަލުވުމުގައެވެ.
”އަޅުގަނޑުމެންގެ ސަރުކާރުން ފަށާ އެންމެ ފުރަތަމަ ހައުސިންގް މަޝްރޫޢުގެ ތެރެއިން، ކުރީގައި ފުލެޓް ލިބޭނެ ކަމަށް ގެޒެޓް ކުރެވި، ނަން ހިމެނިފައި، އެހެން ނަމަވެސް ފުލެޓް ނުލިބޭނެ ކަމަށް ފަހުން ކަނޑައެޅުނު ހުރިހާ އެންމެނަށް އިރާދަކުރެއްވިޔާ، ފުލެޓް ހަމަޖައްސައި ދޭނަން. އެކަމުގެ ޔަގީންކަން ދެން.“ ރައީސް ވިދާޅުވިއެވެ.
އެ ފުލެޓްތައް ހަވާލު ކުރާ މަޝްރޫޢުއާއި ގުޅޭގޮތުން، އިއްޔެ ބޭއްވި ނޫސްވެރިންގެ ބައްދަލުވުމުގައި ވޮއިސް އިން ކުރި ސުވާލަކަށް ޖަވާބު ދެއްވަމުން ރައީސް މުޢިއްޒު ވިދާޅުވީ، އެކަން މިހާރު ފަށާފައި ބޯހިޔާ ވަހިކަމުގެ މަޝްރޫޢުގެ ތެރެއިން ކުރިއަށްދާނެ ކަމަށެވެ.
އަޅުގަނޑުމެން އުއްމީދު ކުރަނީ އިންޑިއަން އެލްއޯސީގެ ތެރެއިން އެޅޭ 4200 ފުލެޓްގެ ތެރެއިން އެކަން ހަމަޖެއްސޭނެ ކަމަށް.
ރައީސް ޑރ މުޢިއްޒު
އިންޑިޔާގެ އެގްޒިމް ބޭންކުގެ ލޯނުގެ އެހީގައި މާލެ ސަރަހައްދުގައި 4200 ފުލެޓް އެޅުމަށް ނިންމައި އެކަން ސަރުކާރުން އިއުލާން ކުރީ ނިމިދިޔަ އަހަރުގެ އޮގަސްޓް މަހުގެ ތެރޭގައެވެ. އެ މަޝްރޫޢު މި އަހަރުގެ ތެރޭގައި ފެށިގެންދާނެ ކަމަށް އިއްޔެގެ ނޫސްވެރިންގެ ބައްދަލުވުމުގައި ރައީސް މުޢިއްޒު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
