ދިވެހި ރައްޔިތުންނާއި ގައުމުގެ ހައްގުގައި ގާނޫނުއަސާސީ ދިފާއު ކުރަން ކުރަން ޖެހުނު ކޮންމެ ކަމެއް ކުރާނެ ކަމަށް ތައިލެންޑް ގައި މިވަގުތު ދިރިއުޅުއްވާ އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވެއްޖެ އެވެ.

އޭނާ މިހެން ވިދާޅުވީ ދެ ފަނޑިޔާރަކު ވަކިކުރުމުގެ މައްސަލައާ ގުޅިގެން އިދިކޮޅުގެ ކަންބޮޑުވުމާއި ފާޑުކިޔުން ސަރުކާރަށް އަމާޒު ވަމުންދާ ދަނޑިވަޅެއްގަ އެވެ.

އެކްސްގައި ކުރެއްވި ޕޯސްޓެއްގައި އިމްރާން ވަނީ ރައީސް މުއިއްޒަށް ވަރަށް ބޮޑަށް ފާޑު ވިދާޅުވެފަ އެވެ. އަދި އާންމު ގޮތެއްގައި އިމްރާންގެ ވާދަވެރީންނަށް ތުހުަމަތު ކުރައްވާ އުސޫލުން ތުހުމަތު ކުރެއްވި އެވެ.

ވިދާޅުވީ އަމިއްލަ ބާރާއި ވެރިކަމުގެ ދަހިވެތިކަމުގައި ރައީސް މުއިއްޒު އެ ވަޑައިގަންނަވަނީ ގާނޫނު އަސާސީގެ އެންމެ މުހިންމު އަސާސްތަކާއި ރުކުންތައް ސުންނާފަތިކޮށް މުޅި ގާނޫނުއަސާސީ މުގުރާ ބިމާ ހަމަކުރަމުން ކަމަށެވެ. އަދި އޭނާ އެދިވަޑައިގަތީ އޭނާގެ އެ ވާހަކަތައް ދިވެހި ރައްޔިތުން ގަބޫލު ކުރުމަށެވެ.

"ދިވެހި ގައުމާއި ތިޔަބޭފުންގެ ދަރިންގެ ހައްގު ގައި މިކަން މިގޮތަށް ކުރަން ދޫނުކުރައްވާ. ދިވެހި ރައްޔިތުންނާއި ގައުމުގެ ހައްގުގައި ގާނޫނުއަސާސީ ދިފާއުކުރަން ކުރަންޖެހުނު ކޮންމެ ކަމެއް އަޅުގަނޑު ކުރާނަން," އިމްރާން ވިދާޅުވި އެވެ.

މި ސަރުކާރުގައި ސުޕްރީމް ކޯޓްގެ ތިން ފަނޑިޔާރުން ވަކިކުރުމުގެ މަސައްކަތް ހިނގަމުންދާއިރު އިމްރާން ހޯމް މިނިސްޓަރު ކަން ކުރެއްވި ރައީސް ސޯލިހްގެ ވެރިކަމުގައި ސުޕްރީމް ކޯޓްގެ ހުރިހާ ފަނޑިޔާރުންނާއި ހައިކޯޓާއި ކްރިމިނަލް ކޯޓްގެ އެތައް ފަނޑިޔާރުނެއް ވަކި ކުރެއްވި އެވެ.