ޕާކިސްތާނުގެ އަސްކަރިއްޔާއިން ފަށާފައިވާ "އަލްބުންޔާނުލް މަރުސޫސް" އޮޕަރޭޝަނާއެކު އިންޑިއާއިން ސީރިއަސް ހާލަތަކަށް އަތުވެއްޖެއެވެ.

އިންޑިއާގެ އަސްކަރިއްޔާއިން ޕާކިސްތާނަށް ހަމަލާތައްދޭން ފެށުމާއެކު އެޤައުމުގެ އަސްކަރިއްޔާއިން ވަނީ ހާއްސަ އޮޕަރޭޝަނެއް ފަށާފައެވެ. ޕާކިސްތާނުން ތުހުމަތު ކުރާގޮތުގައި އިންޑިއާއިން މިވީ ދުވަސްތަކުގައި ޓެރަރިސްޓުންނަށް ހަމަލާދޭންކަމަށް ބުނެ ހަމަލާތައް އަމާޒުކޮށްފައިވަނީ، މިސްކިތްތަކަށާއި އާއްމުން ދިރިއުޅޭ ތަންތަނަށެވެ. އޮޕަރޭޝަން ސިންދޫރުގެ ނަމުގައި ފައިޓަރ ޖެޓުތަކުންނާއި ޑްރޯންތަައް މެދުވެރިކޮށް އިންޑިއާއިން ވަނީ ޕާކިސްތާނަށް ހަމަލާތައް ދީފައެވެ.

އިންޑިއާއިން ދިން ހަމަލާތަކުގެ ރަށްދުގައި ޕާކިސްތާނުގެ އަސްކަރިއްޔާއިން އޮޕަރޭޝަން ފަށާފައިވަނީ، "އަލްބުންޔާނުލް މަރުސޫސް" ގެ ނަމުގައެވެ. ޕާކިސްތާނުން އިންޑިއާއަށް ހަމަލާތަކެއް ދީފައިވާއިރު، އިންޑިއާއިންވެސް ބުނެފައިވަނީ ޕާކިސްތާނުން އަސްކަރިއްޔާއަށް ހަމަލާތައް އަމާޒުކުރުމުގެ ނަމުގައި ހަމަލާތައް ދީފައިވަނީ ދީނީ އަޅުކަންކުރާ ފައްޅިތަކާއި އެނޫންވެސް އެފަދަ ތަންތަނަށް ކަމަށެވެ. ޕާކިސްތާނުން ފެށި އޮޕަރޭޝަނާއެކު އިންޑިއާ ސަރުކާރުގެ އެންމެ އިސްވެރިންގެ ބައްދަލުވުމެއް ވަނީ އިއްޔެ ކުރިއަށް ގެންގޮސްފައެވެ. މި ބައްދަލުވުމުގައި އިންޑިއާގެ ބޮޑުވަޒީރު ނަރެންދުރަ މޯދީ އާއި ޑިފެންސް މިނިސްޓަރު ރަޖްނަތު ސިންގުގެ އިތުރުން އެއްގަމާއި ވައިގެ އިތުރުން ކަނޑުގެ ސިފައިންގެ ވެރިން ބައިވެރިވިއެވެ. 

މި ބައްދަލުވުމާ ގުޅޭގޮތުން އިންޑިއާގެ އޭއެންއައި ނޫހުން ބުނެފައިވަނީ، މި ބައްދަލުވުމުގައި ޕާކިސްތާނަށް ހަމަލާތައް ދޭނޭގޮތާއި ގުޅޭގޮތުން މަޝްވަރާކޮސްފައިވާކަމަށެވެ. އެގޮުތުން ކުރިއަށްއޮތް ތަނުގައި ހަމަލާތައް ދޭނޭގޮތާ ގުޅޭގޮތުން މި ބައްދަލުވުމުގައި މަޝްވަރާކުރެވުނުކަމަށް އެ ނޫހުން ބުންޏެވެ. 

ސްރީނަގަރުގައި އިންޑިއާ ސިފައިންގެ ޗެކްޕޮއިންޓެއް.. ފޮޓޯ: އޭޕީ

އަލްޖަޒީރާއިން މިއަދު ބުނެފައިވަނީ ޕާކިސްތާނުން އިންޑިއާގެ ސްރީނަގަރަށް ދެ ހަމަލާ ފޮނުވާލާފައިވާކަމަށެވެ. އެގޮތުން ސްރީނަގަރުގެ ތެރެއިން ދެ ފަހަރެއްގެ މަތިން ވަރަށް ބާރު ގޮވުމެއްގެ އަޑު އިވުނުއިރު، އެއީ މީގެ ކުރިން އެ ސަރަހައްދުގެ މީހުން ހަޔާތުގައިވެސް އަޑުއަހާފައިނުވާވަރުގެ ބާރުގަދަ ގޮވުމެއްކަމަށް އަލްޖަޒީރާއިން ބުންޏެވެ. މި ހަމަލާތަކުގައި ލިބުނު ގެއްލުމެއް އަދި ނޭނގޭކަމަށްވެސް އަލްޖަޒީރާއިން ބުންޏެވެ. 

ސްރީނަގަރަށް ޕާކިސްތާނު ސިފައިންގެ ހަމަލާއެއް އަމާޒުވެފައި.. ފޮޓޯ: ރޮއިޓާސް

ޕާކިސްތާނުން އިންޑިއާއަށް ހަމަލާތައްދޭން ފެށުމާއެކު، އެޤައުމުގެ ބައެއް ހިސާބުތައް މިހާރު ވަނީ ހުއްޓުމަކަށް އައިސްފައެވެ. މީގެ އިތުރުން ބައެއް ދާއިރާތަކުން ވަނީ ބޭއްވުމަށް ތާވަލްކުރި ހަރަކާތްތައްވެސް ހުއްޓާލާފައެވެ. އިންޑިއާ ޕާކިސްތާނު ހަމަލާތަކުގެ ސަބަބުން އިންޑިއާގެ އެންމެ ނަގާކިޔާ އެއް ދާއިރާކަމަށްވާ ބޮލީވުޑްގެ ހަރަކާތްތައްވެސް ވަނީ މުޅިންހެން ހުއްޓުމަކަށް އައިސްފައެވެ.

އިންޑިއާ އާއި ޕާކިސްތާނާ ދެ ޤައުމުގެ ދެމެދުގައި ހަމަލާތައް ބަދަލުކުރަން ފަށާފައިވާއިރު، ދެ ޤައުމުން ސުލްހަވެރިކަން އިސްކުރުމަށް ބައިނަލްއަޤްވާމީ މުޖުތަމައުއިން ވަނީ ގޮވާލާފައެވެ.