އިންޑިއާ އާއި ޕާކިސްތާނުން ހަމަލާތައް ބަދަލުކުރުން ހުއްޓާލުމަށް އެއްބަސް ވެއްޖެކަމަށް ދެ ޤައުމުން ބުނެފިއެވެ.

މިކަމާ ގުޅޭގޮތުން ޕާކިސްތާނުގެ ހާރިޖީ ވަޒީރު އިސްހާގު ދަރު ވިދާޅުވީ، ދެ ޤައުމުގެ ދެމެދުގައި ހިނގަމުންދާ ހަމަލާ ބަދަލުކުރުންތައް ވީ އެންމެ އަވަހަކަށް ހުއްޓާލުމަށް އެއްބަސްވެފައިވާކަމަށެވެ. އަދި އެއްބަސްވި ގޮތަށް އަމަލީ ސިފަ ގެނައުމުގެ ކަންކަން އަވަސްކުރުމަށް ނިންމާފައިވާކަމަށެވެ. ސަރަހައްދީ ސަލާމަތާ ރައްކާތެރިކަމަކީ ޕާކިސްތާނުން އެންމެ އިސްކަންދޭނޭ އެއް ކަންތައް ކަމަށްވެސް އިސްހާގް ވިދާޅުވިއެވެ.

އިންޑިއާގެ ހާރިޖީ ވަޒީރު ޑރ.ޖަޔަ ޝަންކަރު ވިދާޅުވީ، ދެ ޤައުމުން ކުރިއަށްގެންދާ އަސްކަރީ ހަމަލާތައް ބަދަލުކުރުން ހުއްޓާލުމަށް ނިންމާފައިވާކަމަށެވެ. ހަމަލާތައް ބަދަލުކުރުން ހުއްޓާލިނަމަވެސް އިންޑިއާއިން ޓެރަރިޒަމް ހުއްޓުވުމަށް ކުރިއަށްގެންދާ މަސައްކަތް ހުއްޓާނުލައި ކުރިއަށްދާނޭކަމަށް ޖަޔަ ޝަންކަރު ފާހަގަކުރެއްވިއެވެ.

ސްކައި ނިއުސްއިން ބުނެފައިވަނީ އިންޑިއާ އާއި ޕާކިސްތާނުން ހަމަލާ ބަދަލުކުރުން ހުއްޓާލާފައިމިވަނީ އެމެރިކާގެ ރައީސް ޑޮނާލްޑް ޓްރަމްޕް އިސްނަންގަވައިގެން ކުރިއަށްގެންދިޔަ މަޝްވަރާތަކަށްފަހު ކަމަށެވެ. އެގޮތުން ރޭ ވަރަށް ގިނައިރުވަންދެން ތިން ޤައުމު ހިމެނޭހެން ބައްދަލުވުމެއް ކުރިއަށް ގެންގޮސްފައިވާކަން ސްކައި ނިއުސްއިން ވަނީ ފާހަގަކޮށްފައެވެ.

އިންޑިއާ އާއި ޕާކިސްތާނުން ހަމަލާތައް ބަދަލުކުރުން ކުރިއަށްގެންގޮސްފައިވަނީ، މިދިޔަ މަހު ކަޝްމީރުގެ އިންޑިއާ ކޮންޓްރޯލްކުރާ ސަރަހައްދަށް ހަނގުރާމަވެރި ޖަމާއަތަކުންދިން ހަމަލާތަކާ ގުޅިގެންނެވެ. މި މައްސަލާގައި އިންޑިއާއިން އިނގިލި ދިއްކުރަނީ ޕާކިސްތާނަށެވެ. ނަމަވެސް ޕާކިސްތާނުން ބުނެފައިވަނީ އެކަމުގައި އެޤައުމުގެ ބައިވެރިވުމެއް ނެތްކަމަށެވެ. އެ ހަމަލާތަކުގައި 26 މީހަކު މަރުވިއެވެ.

ދެ ޤައުމުގެ ދެމެދުގައި އުފެދުނު ނުތަނަވަސްކަމުގައި އެންމެ ފުރަތަމަ ހަމަލާ ދީފައިވަނީ އިންޑިއާއިންނެވެ. އިންޑިއާގެ ފައިޓަރޖެޓްތަކުން ދިން ހަމަލާ ޕާކިސްތާނަށް އަމާޒުކުރިއިރު، އެޤައުމުން ބުނެފައިވަނީ އިންޑިއާއިން ދިން ހަމަލާތަކުގައި ފުރާނަ ގެއްލިފައިވަނީ އާއްމުރައްޔިތުން ކަމަށެވެ. އެގޮތުން އެ ހަމަލާތަކުގައި ޕާކިސްތާނުގެ ކުޑަކުއްޖަކު ހިމެނޭހެން 13 މީހެއްގެ ފުރާނަ ގެއްލި، އެތައް ބަޔަކު ޒަހަމްވެފައިވާކަމަށް ޕާކިސްތާނުން ވަނީ ބުނެފައެވެ.

ނަމަވެސް އިންޑިއާއިން ބުނެފައިވަނީ ހަމަލާތައް އަމާޒުކޮށްފައިވަނީ ޓެރަރިސްޓުން އުޅޭ ތަންތަނަށް ކަމަށެވެ. އިންޑިއާއިން ދިން ހަމަލާތަކުގެ ރައްދުގައި ޕާކިސްތާނުންވެސް ވަނީ އިންޑިއާއަށް ހަމަލާތައް ދީފައެވެ.