އަވައްޓެރި އިންޑިއާއިން ނަގާފައިވާ 50 މިލިއަން ޑޮލަރުގެ ލޯނު އަނބުރާ ދެއްކުމުގެ މުއްދަތު ރާއްޖެއަށް އިތުރުކޮށްދީފައިވާކަމަށް އެޤައުމުގެ ސަރުކާރުން ބުނެފިއެވެ.

ކުރީގެ ސަރުކާރުން 2019 ވަނަ އަހަރުގެ ތެރޭގައި ވަނީ ބަޖެޓް ސަޕޯޓަށް ބޭނުންވާ ފައިސާ ހޯދުމަށް އިންޑިއާއިން 50 މިލިއަން ޑޮލަރުގެ ލޯނެއް ހޯދާފައެވެ. މި ފައިސާ ހޯދާފައިވަނީ ޓްރެޒަރީބިލް ވިއްކައިގެންނެވެ. މީގެ ކުރިން މި ލޯނު ދައްކަންޖެހޭ މުއްދަތު އިތުރުކުރިނަމަވެސް މިއަދު ވަނީ އެ މުއްދަތުވެސް ހަމަވެފައެވެ.

އިންޑިއާ ސަރުކާރުން ވަނީ ރަސްމީކޮށް އެ ލޯނު އަނބުރާ ދެއްކުމުގެ މުއްދަތު އިތުރުކޮށްދިންކަމަށް ބުނެފައެވެ. މިކަމާ ގުޅޭގޮތުން ރާއްޖޭގައި ހުންނަ އިންޑިއާ އެމްބަސީން ނެރުނު ބަޔާނެއްގައި ބުނެފައިވަނީ، ސަރުކާރުގެ އެދުމުގެ މަތިން އެސްބީއައި މެދުވެރިކޮށް ނަގާފައިވާ ލޯނު އަނބުރާ ދެއްކުމުގެ މުއްދަތު އެއް އަހަރު ދުވަހަށް އިތުރުކޮށްދިނުމަށް ނިންމާފައިވާކަމަށެވެ.

މިއީ އިންޑިއާގެ ނެއިބަހުޑް ޕޮލިސީގެ ދަށުން ރާއްޖެއަށްދިން އިނާޔަތެއްކަމަށް އެމްބަސީން ބުންޏެވެ. އިންޑިއާ އެމްބަސީގެ ބަޔާނުގައި ވަނީ އެ ޕޮލިސީގެ ދަށުން ޓްރެޒަރީބިލްގައި އިންވެސްޓްކުރުމާއި، ރާއްޖެއަށް ބޭނުންވާ އަސާސީ ކާބޯތަކެތީގެ ކޯޓާވެސް އިތުރުކޮށްދީފައިވާކަން ފާހަގަކޮށްފައެވެ.

އިންޑިއާއިން ނެގި 50 މިލިއަން ޑޮލަރުގެ ލޯނު އަނބުރާ ދެއްކުން ފަސްކޮށްދިނުމާ ގުޅިގެން ރާއްޖޭގެ ހާރިޖީ ވަޒީރު ޑރ.ޢަބްދުﷲ ހަލީލް ވަނީ އިންޑިއާގެ ހާރިޖީ ވަޒީރަށް ޝުކުރު އަދާކުރައްވާފައެވެ.

ކުރީ ސަރުކާރުތަކުން ބޭރުގެ އެކި ފަރާތްތަކުން ނަގާފައިވާ ކުރު މުއްދަތުގެ ދަރަނީގެ މައްސަލައަކީ މި ސަރުކާރަށް ކުރިމަތިލާން ޖެހިފައިވާ ގޮންޖެހުމެއްކަމަށް ސަރުކާރުން ވަނީ މީގެ ކުރިން ބުނެފައެވެ. 

ކުރިއަށްއޮތް އަހަރު ވެގެންދާނީ ރާއްޖޭގެ ތާރީހުގައިވެސް އެންމެ ބޮޑު އަދަދަކުން ދަރަނިތައް ދައްކަންޖެހޭނެ އަހަރަށްކަމަށް މާލީ ވުޒާރާއިން ވަނީ ބުނެފައެވެ. އެގޮތުން ބޭރުގެ އެކި ފަރާތްތަކުން ނަގާފައިވާ ލޯނުތަކުގެ އިންޓަރެސްޓާއެކު 1 ބިލިއަނަށްވުރެ ގިނަ ޑޮލަރު ދައްކަންޖެހޭަނޭކަމަށް މާލީ ވުޒާރާއިން ފާހަގަކުރެއެވެ. އެއީ ދިވެހި ރުފިޔާއިން ބަލާނަމަ 15 ބިލިއަނަށްވުރެ ގިނަ ރުފިޔާއެވެ.

އަންނަ އަހަރު ދައްކަންޖެހޭ 1 ބިލިއަން ޑޮލަރުގެ ތެރޭގައި ހިމެނެނީ 2021 ވަނަ އަހަރު ވިއްކާފައިވާ ސަވަރިން ސުކޫކަށް ދައްކަންޖެހޭ 500 މިލިއަން ޑޮލަރެވެ.