މޫސުން ގޯސްވާނެކަމަށް ލަފާކޮށް މުޅި ރާއްޖެއަށް ވައިޓް އެލާޓް މިއަދު ނެރެފިއެވެ.

މޫސުމާ ބެހޭ ޤައުމީ އިދާރާ، މޯލްޑިވްސް މީޓިއޮލޮޖޮކަލް ސެންޓަރުން ބުނީ، މިއަދު އިރުއޮއްސި 06:15 އާ ހަމައަށް މުޅި ރާއްޖެއަށް މޫސުން ގޯސްވާނޭކަމަށް ލަފާކުރެވޭކަމަށެވެ. ވައިޓް އެލާޓް ނެރެފައިވާ ގަޑިތަކުގައި ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހޭނޭ ކަމަށެވެ. އަދި ކަނޑުތައް ގަދަވާނޭކަމަށްވެސް މެޓް އޮފީހުން ވަނީ ލަފާކޮށްފައެވެ.

މެޓް އޮފީހުން ވަނީ މިއަދު ހެނދުނުން ފެށިގެން އެކެއް ޖެހުމާ ހަމަޔަށް ފ އަތޮޅުން ފެށިގެން އައްޑޫސިޓީއާ ހަމައަށްވެސް ވައިޓް އެލާޓް ނެރެފައެވެ.

Advertisement

ރާއްޖޭގެ ސަރަހައްދުގައި ހުޅަނގު މޫސުުމުގެ ބާރުގަދަވާނެތީވެ، ކުރިއަށްއޮތް ތިންދުވަހު ރާއްޖޭގެ އެކި ހިސާބުތަކަށް ވިއްސާރަކޮށް، ބައެއް ރަށްތަކަށް ބޯކޮށް ވާރޭވެހުމަކީ އެކަށީގެންވާ ކަމެއްކަމަށް މެޓް އޮފީހުން ވަނީ ބުނެފައެވެ. އެގޮތުން ވައިގަދަވެ ކަނޑުތައް ގަދަވާނޭކަމަށް ލަފާކޮށް މެޓް އޮފީހުން ވަނީ ކުރިއަށްއޮތް 3 ދުވަހު މޫސުމަށް ސަމާލުވުމަށް އިލްތިމާސްކޮށްފައެވެ.