ނިމިދިޔަ ރޯދަ މަހު ރާއްޖެއިން އުމްރާއަށް ދިޔަ އުމްރާވެރީންނަށް މިލިއަނަކަށް ވުރެ ގިނަ ޑޮލަރު ދޫކޮށްފި އެވެ.

އުމްރާވެރީންނަށް ފަސޭހައިން ޑޮލަރު ލިބޭނެ އިންތިޒާމު ހަމަޖެއްސުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެދިވަޑައިގަތުމުން ބޭންކް އޮފް މޯލްޑިވްސް އިން ވަނީ ޑެބިޓް ކާޑަށް 1500 ޑޮލަރުގެ ލިމިޓެއް އިތުރަށް ހަމަޖައްސަވައި ދީފަ އެވެ.

ބީއެމްއެލުން ބުނީ ރޯދަ މަހު އުމްރާގެ އަޅުކަމަށް ދިޔަ ދިވެހީންނަށް 1،005،172.82 ޑޮލަރު 15.42ގެ ރޭޓުން ދޫކޮށްފައިވާ ކަމަށެވެ. މި ފައިސާ އުމްރާވެރިންނަށް ފޯރުކޮށްދިނީ، 8،979 ޓްރާންސެކްޝަން މެދުވެރިކޮަށެވެ.

Advertisement

ރައީސް މިހާރު ވަނީ ހައްޖުވެރީންނަށް ޑޮލަރު ލިމިޓް ބޮޑުކޮށް ދެއްވުމަށް އެދިވަޑައިގެންފަ އެވެ. ރައީސްގެ އެދިވަޑައިގަތުމާއި ގުޅިގެން 2000 ޑޮލަރަށް ލިމިޓް މަތިކޮށްފަ އެވެ.

ސަރުކާރުން ބުނީ ދިވެހި ރުފިޔާގެ އަގު ހިފަހައްޓައި، ބޭރު ފައިސާގެ ބާޒާރަށް ދިމާވެފައިވާ މައްސަލަތަކަށް ދާއިމީ ހައްލެއް ގެނައުމަށް އަންނަނީ ގިނަ މަސައްކަތްތަކެއް ކުރަމުން ކަމަށެވެ. އެގޮތުން، ބޭރު ފައިސާއާބެހޭ ގާނޫނެއް އެކުލަވާލައި، ފާސްކޮށް، ތަންފީޒު ކުރަން ފެށުން ފާހަގަ ކުރެއްވި އެވެ.

ނަތީޖާއެއްގެ ގޮތުން ފާއިތުވި 2024 ވަނަ އަހަރު ނިމުނުއިރު ދައުލަތުގެ ރަސްމީ ރިޒާވް އިތުރުވެފައިވާ ކަމަށް ވެސް ސަރުކާރުން ބުންޏެވެ. އަދި، 2025 ވަނަ އަހަރުގެ ސެޕްޓެންބަރު މަހުން ފަށައިގެން ސަރުކާރު ހިއްސާވާ ކުންފުނިތަކުން ޕެރަލަލް މާކެޓަށް ނުގޮސް ރަސްމީ ރޭޓްގައި ޑޮލަރު ލިބޭނެ އިންތިޒާމެއް ގާއިމްކުރުމުގެ މަސައްކަތްވެސް ސަރުކާރުން ފަށާފައިވާ ކަން ވަނީ ހާމަކޮށްފަ އެވެ.