މިދިޔަ މަހުގެ 18 ވަނަ ދުވަހުގެ ފަތިހު, ގުދަނެއްގެ ފުރާޅު މައްޗަށް އަންހެނަކު ވެއްޓުނު ހާދިސާއާ ގުޅިގެން ދިވެހި ފުލުހުންގެ ހިދުމަތުން އެއްވެސް ގޯހެއް ހަދާފައި ނުވާ ކަމަށް ހޯމް މިނިސްޓަރު އަލީ އިހްސާން މިރޭ ވިދާޅުވެއްޖެ އެވެ.

"އަހާ" ފޯރަމް ގައި ވާހަކަ ދައްކަވަމުން އިހްސާން މިމޭރުމުން ވާހަކަ ދެއްކެވީ އަންހެނަކު ވެއްޓުނު ހާދިސާއާ ގުޅޭ ތުހުމަތު އޮތް އެންމެން ހައްޔަރު ނުުކުރާތީ އާންމުންގެ މީހަކު ކުރި ސުވާލަކާއި ގުޅިގެންނެވެ. މި މައްސަލާގައި ޝާމިލްވާ އެންމެން ހައްޔަރު ނުކުރެވި ވަނީ ކޮން ނުފޫޒެއްގެ ސަބަބުންތޯ އޭނާ ސުވާލު ކުރި އެވެ.

އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ އިމާރާތެއްގެ މަތީން ގުދަނެއްގެ ފުރާޅު މައްޗަށް އަންހެނަކު ވެއްޓުނު ހާދިސާއާ ގުޅޭ ތަހުގީގު އަދިވެސް ފުލުހުންގެ އިދާރާ އިން ކުރަމުންދާ ކަމަށެވެ. އެ ހާދިސާއާ ގުޅޭގޮތުން ސޯޝަލް މީޑިއާގައި ފުރަތަމަ ވާހަކަ ދެކެވުނީ ހަގީގަތާއި މުޅީން ހިލާފަށް ކަން އިހްސާން ފާހަގަ ކުރެއްވި އެވެ.

Advertisement

ވިދާޅުވީ ހާދިސާގެ ހަގީގަތަށް ވާސިލުވުމަށް ފުލުހުން ކުރި މަސައްކަތުން އެކަން ހޯދާ މިވަރުގެ މައްސަލައިގައި ތަހުގީގު ގައި ނުދޭހާ އަވަހަށް މައުލޫމާތު އާންމުކުރި ކަމަށެވެ. އަދި މި މައްސަލާގައި ފުލުހުން އަމަލު ކުރަމުން ގެންދަނީ މިންގަނޑުތަކާއި އެއްގޮތަށް ކަމަށް ވިދާޅުވި އެވެ.

"ފުލުހުން މި މައްސަލާގައި އަމަލު ކުރި ގޮތުގެ އެއްވެސް ގޯހެއް އަޅުގަނޑުމެންނަކާ ހިސާބަކަށް ފާހަގަވެފައެއް ނެތް,"

އެ މައްސަލާގައި އިހްސާން ވެސް އިސްތިއުފާ ދޭން ޖެހޭ ކަމަށް ބައެއް މީހުން ދެކެ އެވެ. އެކަމަށް އިޝާރާތް ކުރައްވާ އިހްސާން ވިދާޅުވީ މައްސަލާގައި އަމަލު ކުރި ގޮތް ގޯސްވެ ފުލުހުންގެ މައްސަލައެއް ފާހަގަވެއްޖެ ހާލަތެއްގައި ފިޔަވަޅު ނާޅާ ދޫކޮށްލައިފިނަމަ އިސްތިއުފާ ދޭން ޖެހޭނެ ހާލަތަކީ އެއީ ކަމަށެވެ. އެހެން ކަމުން މިއީ އޭނާ އިސްތިއުފާ ދޭން ޖެހޭ ހާލަތެއް ނޫން ކަމަށް ވިދާޅުވި އެވެ.

ގުދަނެއްގެ ފުރާޅު މައްޗަށް އަންހެނަކު ވެއްޓުނު ހާދިސާއާ ގުޅިގެން ފުލުހުން ފުރަތަމަ މައުލޫމާތު އާންމުކުރި ގޮތާމެދު މީޑިއާތަކާއި އާންމުންގެ ވެސް ބޮޑު ކަންބޮޑުވުމެއް އެބަ އޮތެވެ. ނަމަވެސް ފަހުން އެކަން ރަނގަޅުކޮށް ފުލުހުން ވަނީ މައްސަލައާ ގުޅޭ ގިނަ މައުލޫމާތުތަކެއް އާންމުކޮށްފަ އެވެ.