ނ. ހޮޅުދޫގައި ޒަޚަމްތަކަކާއެކު މަރުވެފައި އޮއްވާ ފެނުނު ޒަކިއްޔާ މޫސާ މަނިކުގެ އޮޓޮޕްސީ ނުހަދަން ނިންމި ނިންމުމަކީ ގޯސް ނިންމުމެއް ކަމަށް ދެކެވަޑައިނުގަންނަވާ ކަމަށް ހޯމް މިނިސްޓަރު އަލީ އިހްސާން މިރޭ ވިދާޅުވެއްޖެ އެވެ.
މިދިޔަ އަހަރުގެ ސެޕްޓެމްބަރ 10 ވަނަ ދުވަހުގެ ހެނދުނުގެ ވަގުތެއްގައި ޒަކިއްޔާ މަރުވި މައްސަލަ ތަހުގީގުކުރުމުގައި ފުލުހުން އިހުމާލުވި ކަމަށް ބުނެ، އާންމު ރައްޔިތުން ފުލުހުންގެ މައްޗަށް ސީރިއަސް ތުހުމަތުތަކެއް ކޮށްފައިވެ އެވެ. އަދި ޒަކިއްޔާ މަރުވީ އަމިއްލައަށް ނޫން ކަމަށާ އެއީ ބަޔަކު / މީހަކު ކުރި ކަމެއް ކަމަށް އާއިލާގެ ގިނަ މީހުންނާއި އެ ރަށުގެ ގިނަ ބަޔަކު ދެކެ އެވެ.
މީގެ ކުރީން އެ މައްސަލާ ގައި އެ ރަށުގައި ސިލްސިލާ ކޮށް މުޒާހަރާ ވެސް ކޮށްފައިވެ އެވެ.
ޒަކިއްޔާގެ މަރާއި ގުޅިގެން އޮޓޮޕްސީ ހަދާފައި ނުވާތީ އެކަމުގެ ކަންބޮޑުވުން ވެސް އެބަ އޮތެވެ. މިރޭ އޮތް "އަހާ" ފޯރަމް ގައި މިނިސްޓަރު ވިދާޅުވީ އެ ރަށަށް ފުރަތަމަ ދިޔަ ފުލުހުންގެ ތަހުގީގު ޓީމުން ނިންމީ އޮޓޮޕްސީ ހެދުމަށް ކަމަށެވެ. ނަމަވެސް ޒަކިއްޔާގެ ހަށިގަނޑު މާލެ ގެނައުމުން އެ ވަގުތު ރާއްޖޭގައި ހުންނެވި ބޭރުގެ ވަރަށް ތަޖުރިބާކާރު ޕެތޮލޮޖިސްޓެއްގެ ލަފާ އެ މަރާއި ގުޅިގެން ލިބުނު ކަމަށެވެ.
އެ ޕެތޮލޮޖިސްޓަކީ ޑޮކްޓަރުކަން ކިޔަވާ ކުދީންނަށް ކިޔަވައިދޭން އައިސްހުރި ބޭފުޅެއް ކަމަށާ އެއީ އެތައް ހާސް އޮޓޮޕްސީއެއް ހަދާފައިވާ ވަރަށް ތަޖުރިބާކާރު ބޭފުޅެއް ކަމަށް ވެސް ވިދާޅުވި އެވެ.
މިރޭގެ ފޯރަމްގައި މިނިސްޓަރު އިހްސާން ވާހަކަ ދައްކަވަނީ -- ފޮޓޯ: ވޮއިސް
"ޒަކިއްޔާއަށް ލިބިފައި ހުރި އަނިޔާތަކާއި ހުރިހާ ކަމެއް ބަލާފައި އޭނާގެ އެކްސްޕީއަރަންސް ގައި އަޅުގަނޑުމެންނަށް ދިން ލަފާ, ޕްރޮފެޝަނަލް ލަފާ މި ދެނީ. ދީފަ އެ މީހާ މި ބުނަނީ އިތުރަށް ބޭރަށް ގެންގޮސްގެން ހަށިގަނޑު އިތުރަށް ފަޅައިގެން ބެލިއަކަސް އެ ކޯޒް އޮފް ޑެތާއި އޭނަ އެ ދިން ޕްރޮފެޝަނަލް އޮޕީނިއަން ތަފާތު ވާނެ ކަމަކަށް އޭނާ ޤަބޫލު ނުކުރާކަމަށް,"
މިނިސްޓަރު ވިދާޅުވީ ޕެތޮލޮޖިސްޓް ދެއްވީ ޕްރޮފެޝަނަލް ލަފައެއް ކަމަށާ އޭނާގެ ފަންނީ ލަފައާ ތަފާތެއް ނުވާނެ ކަމުގެ ވިދާޅުވުން އޮޓޮޕްސީ ނުހަދަން ނިންމީ ކަމަށެވެ.
ނަމަވެސް ރައްޔިތުންގެ ކަންބޮޑުވުންތަކާ އެކު ފަހުން ޑިޖިޓަލް އެޓޮޕްސީއެއް ހަދާފައިވާ ކަމަށެވެ. ޑިޖިޓަލް އެޓޮޕްސީން ވެސް އައީ އެއް ނަތީޖާއެއް ކަމަށް ވިދާޅުވި އެވެ. އޭގެ ފަހުން އެފްބީއައި އާއި އިނގިރޭސިވިލާތުގެ ފުލުހުންގެ އެހީތެރިކަމާއި އިންޑިއާގެ ކަމާބެހޭ ފަރާތްތަކުގެ ފަންނީ ލަފާވެސް ހޯދާފައިވާ ކަމަށް މިނިސްޓަރު ވިދާޅުވި އެވެ. އެ ހުރިހާ ފަރާތްތަކަކުން ވެސް ދިނީ އެއް ލަފައެއް ކަމަށް ވިދާޅުވި އެވެ.
"އަޅުގަނޑުމެންނަށް ގަބޫލެއް ނުކުރެވޭ އޭރު ނެގި ޑިޒިޝަން ގޯސް ކަމަކަށް," ޒަކިއްޔާގެ އޮޓޮޕްސީ ނުހަދަން ނިންމި ނިންމުން ރަނގަޅު ކަން ފާހަގަ ކުރައްވާ މިނިސްޓަރު އިހްސާން މިރޭ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
