ޗައިނާ ސަރުކާރުން ރާއްޖެއަށް ދޭ ޕީއެޗްޑީގެ 14 ފުރުޞަތާއި މާސްޓަރސް ޑިގްރީގެ 25 ފުރުޞަތަށް ކުރިމަތިލުމަށް ހުޅުވާލައިފިއެވެ.

މަތީ ތަޢުލީމާއި ބެހޭ ވުޒާރާއިން ކޮށްފައިވާ އިޢުލާނުގައި ބުނެފައިވާ ގޮތުން، މި ފުރުޞަތުގައި ޓިއުޝަން ފީ، އޮންކެމްޕަސް އެކޮމޮޑޭޝަން، ސްޓައިޕެންޑް، ރީސެޓްލްމަންޓް ފީ، މެޑިކަލް އިންޝުއަރެންސް، އަދި ދެކޮޅު ޓިކެޓު ހަމަޖައްސާނެއެވެ. އަދި މި ފުރުޞަތުތަކަކީ ދަރިވަރުން އަމިއްލައަށް ޚިޔާރުކުރާ ދާއިރާއަކުން ކިޔެވުމަށް ހުޅުވާލާފައިވާ ފުރުޞަތުތަކެކެވެ.

* އެޕްލައި ކުރާ ކޯހާއިގުޅޭ ދާއިރާއެއްގަިއ މަދުވެގެން 3 އަހަރުދުވަހުގެ މަސައްކަތުގެ ތަޖުރިބާ ލިބިފައިވުން

* ޕަބްލިކް ސެކްޓަރގައި މަސައްކަތްކުރާ ފަރާތަކަށްވުން

* ސެޕްޓެމްބަރ 2025ގެ ނިޔަލަށް އުމުރުން 45 އަހަރުވެފައި ނުވުން

* އަޕްލޯޑްކޮށްފައިވާ ޔުނިވަރސިޓީގެ އިންފޮމޭޝަން ޝީޓްގައި ކޯހާއި ގުޅިގެން އިތުރު ޝަރުތެއްވާނަމަ އެ ޝަރުތު ފުރިހަމަވެފައިވުން

މިސްކޮލަރޝިޕް ފުރުޞަތަށް ހުށައެޅޭނީ ވުޒާރާގެ ޕޯޓަލް myedu.egov.mv މެދުވެރިކޮށް، ބުރާސްފަތި ދުވަހުގެ 14:00ގެ ނިޔަލަށެވެ.

 މަތީ ތަޢުލީމާ ބެހޭ ވުޒާރާއިން ބުނީ މަތީ ތަޢުލީމު ހާސިލްކުރުމަށް ކުރިން ލޯނެއް ނަގައި އަދި އެލޯން ގަވާއިދުން ދައްކަމުންދާނަމަ، އެފަރާތްތަކަށްވެސް، މި ސްކޮލަރޝިޕަށް އެދެވޭނެކަމަށާ އަދި ސްޓޫޑެންޓް ލޯނު ސްކީމަކަށް ހޮވިފައިވާ ކެންޑިޑޭޓުންވެސް ލޯނު އެގްރިމަންޓްގައި ސޮއިނުކުރާނަމަ، މި ފުރުޞަތުގައި ބައިވެރިވެވޭނެއެވެ. ނަމަވެސް މިސްކޮލަރޝިޕަށް ނޮމިނޭޓްވުމުން ލޯނު ފުރުޞަތު ދޫކޮށްލަންޖެހޭނެކަމަށެވެ.

ނަމަވެސް އެހެން ސްކޮލަރޝިޕަށް ނޮމިނޭޓްވެފައިވާ ކެންޑިޑޭޓެއް، މި ސްކޮލަރޝިޕް ފުރުޞަތަށް ނޮމިނޭޓް ނުކުރެވޭނެކަމަށް ބުނެފައިވެއެވެ.