ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން އިތުރު 15 ރަށެއްގައި ހައުސިން ޔުނިޓްތައް އެޅުމަށް ހުޅުވާލައިފިއެވެ.

މިނިސްޓްރީ އޮފް ފިނޭންސް އެންޑް ޕްލޭނިން އިން ގެޒެޓްކުރި އިއުލާނެއްގައި މިއަދު ވަނީ ޑިޒައިން އެންޑް ބިލްޑް އުސޫލުން 15 ރަށެއްގައި ހައުސިން ޔުނިޓްތައް އަޅައިދޭނެ ބަޔަކު ހޯދުމަށް އިއުލާނުކޮށްފައެވެ.  ހައުސިން ޔުނިޓްތައް އެޅުމަށް ކުރިމަތިލާ ފަރާތްތައް ހޮވުމުގެ މަރުހަލާ ކުރިއަށްދާނީ އިންޓަނޭޝަނަލް ކޮމްޕެޓިޓިވް ބިޑިންގް އުސޫލުންކަމަށެވެ.

ހައުސިން ޔުނިޓްތައް އެޅުމަށް

- އައްޑޫސިޓީ ހިތަދޫގައި 100 ހައުސިން ޔުނިޓް

- ހދ.ނެއްލައިދޫ: 60 ހައުސިން ޔުނިޓް

- މ.ދިއްގަރު: 75 ހައުސިން ޔުނިޓް

- ހއ.އިހަވަންދޫ: 200 ހައުސިން ޔުނިޓް

- ހދ.މަކުނުދޫ: 100 ހައުސިން ޔުނިޓް

- ނ.ކެނދިކުޅުދޫ: 100 ހައުސިން ޔުނިޓް

- ރ.މަޑުއްވަރީ: 100 ހައުސިން ޔުނިޓް

- ރ.އިނގުރައިދޫ: 100 ހައުސިން ޔުނިޓް

- ބ.ތުޅާދޫ: 100 ހައުސިން ޔުނިޓް

- ޅ.ހިންނަވަރު: 100 ހައުސިން ޔުނިޓް

-  ތ.ވިލުފުށި: 100 ހައުސިން ޔުނިޓް

- ގދ.ގައްދީ: 100 ހައުސިން ޔުނިޓް

- އައްޑޫސިޓީ މަރަދޫ: 100 ހައުސިން ޔުނިޓް

- އައްޑޫސިޓީ މަރަދޫ ފޭދޫ: 100 ހައުސިން ޔުނިޓް

- އައްޑޫސިޓީ މީދޫ: 100 ހައުސިން ޔުނިޓް

ފިނޭންސުން ބުނީ ހައުސިން ޔުނިޓްތައް އެޅުމުގެ ޝައުގުވެރިކަން ހުރި ފަރާތްތަކުން އެކަން މެއިމަހުގެ 25 ވަނަ ދުވަހުގެ 1400 ގެ ކުރިން ހުށަހަޅަންޖެހޭނޭކަމަށެވެ. 

ސަރުކާރުން ވަނީ މިދިޔަ އޭޕްރިލްމަހުގެ 22 ވަނަ ދުވަހު 57 ރަށުގައި ހައުސިން ޔުނިޓްތައް އެޅުމަށް ހުޅުވާލާފައެވެ.

ސަރުކާރުން ވަނީ މިއަހަރުގެ ބަޖެޓް ޖުމްލަ ގޮތެއްގައި ބޯހިޔާވަހިކަމަށް ހާއްސަކޮށްފައެވެ. އެގޮތުން ރައީސް ޑރ.މުހައްމަދު މުއިއްޒު ރިޔާސީ ބަޔާނުގައި ވިދާޅުވެފައިވަނީ މިއީ ބޯހިޔާވަހިކަމުގެ ބަޖެޓް ކަމަށާއި، މި ބަޖެޓުން ރާއްޖޭގެ ތާރީހުގައިވެސް އެންމެ ފުޅާދާއިރާއެއްގައި ގެދޮރުވެރިކަމަށް މަގުފަހިކޮށްދޭނޭ ކަމަށެވެ. ސަރުކާރުން މި އަހަރަށް 56.6 ބިލިއަން ރުފިޔާގެ ބަޖެޓެއް ހުށަހަޅާފައިވާއިރު، ރާއްޖޭގެ އެކި ސަރަހައްދުތަކުގައި ބޯހިޔާވަހިކަމަށް ހާއްސަކޮށް 1.5 ބިލިއަން ރުފިޔާގެ މަޝްރޫޢު ވަނީ ހިންގުމަށް ނިންމާފައެވެ.