ރާއްޖެއާ ކުވޭތުގެ ގުޅުން އިތުރަށް ބަދަހިކުރަން މަޝްވަރާ ކޮށްފި އެވެ.

މި މަޝްވަރާ ކުރެއްވީ މިނިސްޓާ އޮފް ފޮރިން އެފެއާޒް ޑރ. އަބްދުالله ހަލީލް މިހާރު ކުވޭތަށް ކުރައްވަމުން ގެންދަވާ ރަސްމީ ދަތުރުފުޅުގައި ކުވޭތުގެ މިނިސްޓާ އޮފް ފޮރިން އެފެއާޒް އަބްދުﷲ އަލީ އަލް ޔަހްޔާއާ ބައްދަލު ކުރައްވަ އެވެ.

މި ބައްދަލު ކުރެއްވުމުގައި، ދިވެހިރާއްޖެ އާއި ކުވޭތާ ދެމެދު އުފެދިފައިވާ ޒަމާންވީ އަހްވަންތަ ގުޅުމުގެ މައްޗަށް ދެ ބޭފުޅުން އަލިއަޅުވާލައްވައި، ދެ ގައުމުގެ ދެމެދު ގުޅުން އިތުރަށް ހަރުދަނާކޮށް ބަދަހިކުރުމުގެ މައްޗަށް މަޝްވަރާ ކުރެއްވި އެވެ.

Advertisement

އަދި އިސްލާމްދީނުގެ މަތިވެރި އަސާސްތަކުގެ މައްޗަށް ބިނާވެފައިވާ ދެ ގައުމުގެ ގުޅުން އިތުރަށް ބަދަހިކުރުމަށާއި އިގްތިސާދީ ރޮނގުންނާއި، ވިޔަފާރި އާއި އިންވެސްޓްމަންޓްގެ ދާއިރާއިންނާއި، ސިއްހީ ނިޒާމް ހަރުދަނާ ކުރުމުގެ ގޮތުންނާއި، އިޔާދަކުރަނިވި ހަކަތައިގެ ދާއިރާއިން ގުޅުން އިތުރަށް ހަރުދަނާކުރުމާ ގުޅޭގޮތުން މިނިސްޓަރު ހަލީލު، ކުވޭތުގެ ފޮރިން މިނިސްޓަރާއި މަޝްވަރާ ކުރެއްވި އެވެ.

އަދި ދެ ގައުމުގެ މަސްލަހަތުތައް ކުރިއެރުވުމަށާއި ދެމެހެއްޓެނިވި ތަރައްގީ ހާސިލު ކުރުމާއި ގުޅޭގޮތުން ދެ ބޭފުޅުން ވާހަކަ ދެއްކެވި އެވެ.

ރާއްޖޭގެ ތަރައްގީގެ ތަފާތު އެކި މަޝްރޫއުތަކަށް ކުވޭތު ސަރުކާރުން ފޯރުކޮށްދެމުންދާ އެހީތެރި ކަމަށް ކުވޭތު ސަރުކާރުގެ އިސްވެރިންނަށް ހަލީލު ޝުކުރު އަދާކުރެއްވި އެވެ. ހާއްސަ ގޮތެއްގައި ވެލާނާ އިންޓާނޭޝަނަލް އެއާޕޯޓް ތަރައްގީ ކުރުމުގެ މަޝްރޫއަށް ކުވޭތު ފަންޑް ފޯ އިކޮނޮމިކް ޑިވެލޮޕްމެންޓްގެ އެހީތެރިކަމާއި، ދިވެހިރާއްޖޭގެ ސިއްހީ ނިޒާމު ހަރުދަނާ ކުރުމަށް ދެއްވާ އެހީތެރިކަން ފާހަގަކޮށްލެއްވި އެވެ.