ސުޕްރީމް ކޯޓުގެ އެތެރެއިންނާއި ބޭރުން އައި އެއްވެސް ނުފޫޒަކަށް ބޯލަންބަވާފައި ނުވާނެ ކަމަށާ، އެފަދައިން މަސައްކަތް ކުރެވުނު ކަމަށްޓަކައި އުފާ ކުރައްވާ ކަމަށް ސްޕްރީމް ކޯޓުގެ ފަނޑިޔާރު ކަމުގެ މަގާމުން މިއަދު ވަކިކުރެވުނު ފަނޑިޔާރު މަހާޒު އަލީ ޒާހިރު ވިދާޅުވެއްޖެއެވެ. 

ރައްޔިތުންގެ މަޖިލީހުގެ މިއަދުގެ ޖަލްސާގައި، މަހާޒް އަލީ ޒާހިރު ފަނޑިޔާރު ކަމުން ވަކިކުރަން ފެންނަ ކަމަށް 68 މެންބަރުން ވޯޓު ދެއްވިއިރު ނުފެންނަ ކަމަށް 11 މެންބަރުން ވޯޓު ދެއްވި އެވެ.

އެހެންކަމުން އޭނާ މަގާމުން ވަކިވެފައިވާކަން ރިޔާސަތުން ވަނީ އިއުލާން ކުރައްވާފައެވެ.  

Advertisement

އެކަމާއި ގުޅިގެން ފޭސްބުކުގައި ކުރެއްވި ޕޯސްޓެއްގައި މަހާޒު ވިދާޅުވީ، ސުޕްރީމް ކޯޓުގައި ކުރެއްވުނު މަސައްކަތްތަކާމެދު ހިތްހަމަޖެހިވަޑައިގަންނަވާ ކަމަށާ، ކުރެއްވި ހުރިހާ މަސައްކަތެއް ކުރެއްވީ ކުރާ ހިތުން ކަމަށެވެ.

މިއާއެކު މަހާޒު ވަނީ، އޭނާއަށް ހިތްވަރު ދެއްވި ހުރިހާ ފަރާތްތަކަށް ޝުކުރު އަދާކުރައްވާފައެވެ. އެގޮތުން، ނޫސްވެރިންނާއި ގާނޫނީ ވަކީލުންނާއި ޖަމިއްޔާ ޖަމާއަތްތަކުންނާއި ވަކިވަކި ފަރުދުންގެ ހައިސިއްޔަތުން ”ގާނޫނާ ޚިލާފަށް“ ހިނގަމުންދިޔަ ކަންކަމަށް ދެކޮޅުހައްދަވައި ފާޅު ކުރެއްވި އެންމެހައި ޝުއޫރުތަކަށް ޝުކުރު އަދާކުރައްވާ ކަމަށް އޭނާ ވިދާޅުވިއެވެ.

ަމަހާޒުގެ އިތުރުން ސްޕްރީމް ކޯޓުގެ ފަނޑިޔާރު ކަމުން އަޒްމިރަލްދާ ޒާހިރު ވަކިކުރަންވެސް މިއަދުގެ ޖަލްސާގައި ވަނީ ނިންމާފައެވެ. 

އެ ދެ ފަނޑިޔާރުން ވަކިކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ)ން ނިންމީ، އަޒްމިރަލްދާގެ ފިރިކަލުން އަދި އައިޖީއެމްއެޗުގެ ޑޮކްޓަރު އިސްމާއީލް ލަތީފް މަސާޖު ޕާލާއަކުން ހައްޔަރުކޮށް ބަންދުކުރުމާ މެދު ގޮތެއް ނިންމަން ކްރިމިނަލް ކޯޓަށް ގެންދިޔަ މަޖިލީހަށް އަޒްމިރަލްދާ އާއި މަހާޒު ނުފޫޒު ފޯރުވި ކަމަށް ބުނާ މައްސަލާގަ އެވެ.

އެ ދެ ފަނޑިޔާރުން ވަކިކުރަން ޖޭއެސްސީން ނިންމައި، މަޖިލީހަށް ހުށަހެޅުމުން ޖުޑިޝަރީ ކޮމިޓީގައި ވަނީ އެކަމާމެދު ބަހުސްކޮށް ދިރާސާ ކޮށްފައެވެ. އެމްޑީޕީން މެންބަރުން ބޭނުންވެވަޑައިގެންނެވީ ފަނޑިޔާރުން ކޮމިޓީއަށް ހާޒިކޮށް ޖަވާނުދާރީވާން ފުރުސަތު ދިނުމަށްފަހު އެކަމާމެދު ގޮތެއް ނިންމާށެވެ. ނަމަވެސް ކޮމިޓީން ނިންމީ އެގޮތަށް ކަން ނުކުރާށެވެ. 

އެގޮތުން، ކޮމެޓީގެ ނިންމުމުގައި ވަނީ ދެ ފަނޑިޔާރުން ވަކިކުރަން ޖޭއެސްސީ ނިންމި ނިންމުން ސައްހަ ކަމަށް ކޮމެޓީއަށް ގަބޫލު ކުރެވޭ ކަމަށެވެ. އެހެން ކަމުން ފަނޑިޔާރުން ވަކިކުރަން ފެންނަ ކަމަށް ނިންމާ މައްސަަލައާމެދު ގޮތް ނިންމަން މަޖިލީހުގެ ތަޅުމަށް ފޮނުވީއެވެ.