ކާޅަކީ މަރަން ޖެހޭ އެއްޗެއް ކަމަށާ އެއީ ތަރުބިއްޔަތު ކުރަން ޖެހޭ އެއްޗެއް ނޫން ކަމަށް ދީނީ އިލްމުވެރިޔާ އައްޝައިހް ޒަމްޒަމް ފާރިސް ވިދާޅުވެއްޖެ އެވެ.

ޒަމްޒަމް މިހެން ވިދާޅުވީ ކާޅާއި ވާލާއެކު އުޅެން ދަސްކުރަންޖެހޭ ކަމަށް ދިރޭތަކެއްޗާ ބެހޭ ވުޒާރާގެ ވަޒީރު ޑރ މަރިޔަމް މާރިޔާ ވިދާޅުވުމާއި ގުޅިގެންނެވެ.

ޝެއިހް ވިދާޅުވީ އިސްލާމީ ޝަރީއަތުގައި ކާޅު ހިމަނުއްވާފައިވަނީ، ނަގުލަންދާއްޓާއި، މީދާ ފަދަ މީސްތަކުންނަށް ދުއްތުރާކޮށް ފަސާދަކުރަނިވި ހައިވާނުންގެ ތެރެއިން ކަމަށެވެ. އަދި ނަބަވީ އިރުޝާދު ވެސް އައިސްފައިވަނީ އެތަކެތި މެރުމަށް ކަމަށް ވިދާޅުވި އެވެ.

Advertisement

ކަމަކާނުލާ އެހެން ޖަނަވާރުން މެރުން މަނާކުރެވިފައިވާ ހަރަމްފުޅު ފަދަ ތަންތަނުގައި ވެސް މި ފަދަ ފަސާދަކުރަނިވި ޖަނަވާރުން މެރުން ހުއްދަ ކަމަށް ވިދާޅުވި އެވެ.

އަދި ވިދާޅުވީ މިތަކެތި މެރުމަށް އިސްލާމް ދީނުގައި އަންގަވާފައިވަނީ ވަރަށް ބޮޑެތި ހިކުމަތްފުޅު އެ އަމުރުފުޅުގައި ހިމެނޭތީ ކަން ކޮންމެ މުސްލިމަކު ވެސް ގަބޫލުކުރަން ވާނެ ކަމަށެވެ. އެ އަމުރުފުޅުތައް ތަންފީޒުކުރެވޭތޯ ގަދައަޅައި މަސައްކަތް ކުރަންވާނެ ކަމަށް ވެސް ޝެއިހް ވިދާޅުވި އެވެ. އޭގެ އިތުރުން ކާޅު ފަދަ ތަކެއްޗަކީ ސިހުރުވެރިން ވަރަށް ގަޔާވާ ތަކެތި ކަމަށް ވެސް ވިދާޅުވި އެވެ.

މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަށް ޖަވާބު ދެއްވަމުން މާރިޔާ ވިދާޅުވީ، ކާޅާއި ވާ ދިރިއުޅެމުންދާ ތަން އިންސާނުންގެ ޢަމަލުތަކުގެ ސަބަބުން ކޮންމެވެސް ވަރަކަށް މިހާރު ހަލާކުވެފައިވާ ކަމަށެވެ. އޭގެ ސަބަބުން އެ އެއްޗެހި އަހަރެމެންގެ ގޭގޭގެ ގަހުގަހުގައި ހުންނަ މޭވާތައް ކައިބޮއި ހަދާ ކަމަށް ވަޒީރު ވިދާޅުވިއެވެ.

”މީގެ ދޭހަވަނީ އަޅުގަނޑުމެން ދިރޭ ތަކެތީގެ މާހައުލު ރައްކާތެރިކޮށް ނުބަލަހައްޓަންޏާ، އެ އެއްޗެހިވެސް ދާނެ ތަނެއް ހޯދަންޖެހެއޭ. މިކަހަލަ ކަންކަމާހުރެ އަޅުގަނޑުމެން މި ދަންނަވަނީ ކާޅާއި ވާލުގެ ހެބިޓެޓް ރައްކާތެރިކުރަންޖެހެއޭ.“ ވަޒީރު ވިދާޅުވިއެވެ.