ނުކުޅެދުންތެރިކަން ހުންނަ މީހުނަށް މާލީ އެހީތެރިކަމުގެ ގޮތުގައި ހުސްވި އޭޕްރިލްމަހު 50.2 މިލިއަން ރުފިޔާ ހޭދަކޮށްފައިވާކަމަށް  ނޭޝަނަލް ސޯޝަލް ޕްރޮޓެކްޝަން އެޖެންސީ، އެންސްޕާއިން ބުނެފިއެވެ.

އެންސްޕާއިްނ ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ، ނުކުޅެދުންތެރިކަން ހުންނަ މީހުންގެ ދަފްތަރުގައިވާ ފަރާތްތަކަށް އޭޕްރިލްމަހު އެކަނިވެސް މާލީ އެހީގެ ގޮތުގައި 50،220،000 މިލިއަން ރުފިޔާ ހޭދަކޮށްފައިވާކަމަށެވެ. އެންސްޕާއިން ބުނީ އޭޕްރިލްމަހުގެ ނިޔަލަށް ނުކުޅެދުންތެރިކަން ހުންނަ ފަރާތްތަކުގެ ދަފްތަރުގައި 14،188 މީހަކު ރަޖިސްޓްރީކޮށްފައިވާކަމަށެވެ.

މިދިޔަ މަހު އެކަނިވެސް އަލަށް 103 މީހަކު ވަނީ ރަޖިސްޓްރީކޮށްފައެވެ. އެންސްޕާގެ ދަފްތަރުގައި ތިބި 14،188 މީހުންގެ ތެރެއިން 14،024 މީހުނަށް މާލީ އިނާޔަތް ފޯރުކޮށްދެވިފައިވާކަމަށެވެ.

Advertisement

ނުކުޅެދުންތެރިކަން ހުންނަ ފަރާތްތަކަށް ދައުލަތުގެ ބަޖެޓުން އެލަވަންސް ދެމުންދާއިރު، މިދިޔަ އަހަރު އެފަރާތްތަކަށް 560 މިލިއަނަށްވުރެ ގިނަ ރުފިޔާ ވަނީ ހޭދަކޮށްފައެވެ. މިއަހަރުގެ ބަޖެޓަށް ބަލާއިރު، ނުކުޅެދުންތެރިކަން ހުންނަ މީހުންނަށް އެލަވަންސްގެ ގޮތުގައި 634.3 މިލިއަން ރުފިޔާ ދިނުމަށް ވަނީ ނިންމާފައެވެ.

ނުކުޅެދޭ މީހުންގެ ދަފްތަރުގައި 18 އަހަރުން ދަށުގެ 4،790 ކުދިން ތިބިކަމަށް އެންސްޕާއިން ވަނީ މީގެ ކުރިން ބުނެފައެވެ. ނުކުޅެދުންތެރިކަން ހުންނަ ކުދިންގެ ތެރެއިން ރާއްޖޭގައި އެންމެގިނައީ، "މަލްޓިޕަލް ޑިސެބިލިޓީ" ހުންނަ ކުދިންނެވެ. އޭގެ އިތުރުން ދެން އެންމެގިނައީ، ނަފްސާނީ ނުކުޅެދުންތެރިކަން ހުންނަ ކުދިންނާއި، ޖިސްމާނީ ނުކުޅެދުންތެރިކަން ހުންނަ ކުދިންގެ އިތުރުން ވިސްނުމުގެ ނުވަތަ ސިކުނޑީގެ ނުކުޅެދުންތެރިކަން ހުންނަ ކުދިންނެވެ.