އިންޑިއާއާއި ޕާކިސްތާނުން ދެގައުމުގައި ތިބި އަނެއް ގައުމުގެ ބައެއް ޑިޕްލޮމެޓުން ބޭރުވާން އަންގައިފިއެވެ.

މިކަން ފެށުނީ އިންޑިއާގެ ވެރިރަށް ދިއްލީގައި ހުންނަ ޕާކިސްތާނު ހައިކޮމިޝަންގައި މަސައްކަތްކުރާ ޑިޕްލޮމެޓަކުން އެގައުމު ދޫކޮށް ދިއުމަށް އިންޑިއާއިން އެންގުމުންނެވެ. ރަސްމީ މަސައްކަތުން ބޭރުން ހަރަކާތްތެރިވާކަމަށް ބުނެ އިއްޔެ އިންޑިއާއިން ވަނީ ޕާކިސްތާނުގެ އެ ޑިޕްލޮމެޓަށް ގައުމުން ބޭރުވާން 24 ގަޑިއިރުގެ މުހުލަތެއް ދީފައެވެ. އެހެންނަމަވެސް އެއީ ކޮން އޮފިޝަލެއްކަމާއި، އޭނާއާއިމެދު ކުރެވެނީ ކޮން ތުހުމަތެއްކަން އިންޑިއާއިން ހާމައެއް ނުކުރެއެވެ.

އެއާއެކު މިއަދު ޕާކިސްތާނުން ވަނީ ޑިޕްލޮމެޓިކް އިމްތިޔާޒުގެ ބޭނުން ނަހަމަ ގޮތުގައި ހިފާކަމަށްބުނެ އިންޑިއާގެ ޑިޕްލޮމެޓަކު 24 ގަޑިއިރު ތެރޭ އިސްލާމްއާބާދުން ދިޔުމަށް އަންގާފައެވެ. އަދި ޕާކިސްތާނުގައި ހުންނަ އިންޑިއާގެ ހައިކޮމިޝަން ހިންގުމާ ހަވާލުވެހުރި ޑިޕްލޮމެޓް ޕާކިސްތާން ފޮރިން މިނިސްޓްރީއަށް މިއަދު ހާޒިރުކޮށް، އެކަމާ ގުޅޭ ގޮތުން ޕާކިސްތާނުން ދެކޭ ގޮތް ހާމަކޮށްފައިވާނެކަމަށް ޕާކިސްތާނުން ބުނެއެވެ.

މީގެ ކުރިން ނެތް މައްސަލައެއް ކުއްލިއަކަށް ޕާކިސްތާނުން އެޅުމުން، މިއީ ޑިޕްލޮމެޓިކް އިމްތިޔާޒުގެ މައްސަލައަކަށްވުރެ ބޮޑަށް ބަދަލު ހިފުމުގެ އަމަލެއްކަމަށް މުރާސިލުން ސިފަކުރެއެވެ.

އެޕްރީލް މަހުގެ 22 ވަނަ ދުވަހު ކަޝްމީރުގެ ޕަހަލްގަމްގައި ދިން ޓެރަރިސްޓް ހަމަލާއަށްފަހު އިންޑިއާއިން ވަނީ އެގައުމުގައި ހުންނަ ޕާކިސްތާން ހައިކޮމިޝަންގެ މުވައްޒަފުންގެ އަދަދު މަދުކުރުމަށާއި، އެގައުމުގައި ތިބި ޕާކިސްތާނުގެ އަސްކަރީ އޮފިޝަލުން ގައުމު ދޫކޮށް ދިއުމަށް އަންގާފައެވެ. ރައްދުގައި ޕާކިސްތާނުންވެސް ވަނީ މިފަދަ ފިޔަވަޅުތަކެއް އަޅާފައެވެ.

ޕަހަލްގަމްގެ ހަމަލާއާއި އޭގެ ބަދަލިހިފުމެއްގެ ގޮތުން އިންޑިއާއިން އޮޕަރޭޝަން ސިންދޫރްގެ ނަމުގައި ޕާކިސްތާނަށް ހަމަލާދިނުމާއި ގުޅިގެން ދެގައުމުގެ ގުޅުން ވަނީ ވަރަށް ބޮޑަށް ގޯސްވެފައެވެ.