ކެންސަރު ބައްޔަށް ބޭނުންކުރާ ބޭހެއްކަމަށްވާ "އިމްފިންޒީ"ގެ ފޭކް އުފެއްދުންތަކެއް ބައިނަލްއަޤްވާމީ މާކެޓުގައި ދައުރުވަމުން ދާތީވެ އެކަމަށް ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ އެދިއްޖެއެވެ.

އެމްއެފްޑިއޭއިން ބުނީ، އިމްފިންޒީ އިންޖެކްޝަނުގެ 10 އެމްއެލް އަދި ފޯލްސިފައިޑް 3 ބެޗެއް، އިސްލާމިކް ރިޕަބްލިކް އޮފް އިރާން އާއި ތުރުކިޔޭ ގައި ދައުރު ވަމުންދާތީވެ، ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އިން އެކަން ސަމާލުކަމަށް ގެނެސްފައިވާކަމަށެވެ. ޑަބްލިއުއެޗްއޯގެ މިއެލާޓާއި ގުޅިގެން ބެލިބެލުމުން، މިބޭހުގެ ފޯލްސިފައިޑް އެއްވެސް ބެޗެއް، ބޭސް އިމްޕޯޓްކުރުމަށް ކަނޑައަޅާފައިވާ އެއްވެސް އުސޫލެއްގެ ދަށުން، ރާއްޖެ އިމްޕޯޓްކޮށްފައި ނުވާކަން ޔަގީން ކުރެވިފައިވާކަމަށް އެމްއެފްޑީއޭއިން ބުނެއެވެ.

ފޮޓޯ: އެމްއެފްޑީއޭ

އެމްއެފްޑީއޭއިން ބުނީ ރައްކާތެރިކަމުގެ ފިޔަވަޅެއްގެ ގޮތުން ބޭސްސިޓީއަށް ރާއްޖެއަށް އިމްޕޯރޓް ކުރާ ބޭސް ހާއްސަ ސަމާލު ކަމެއްދީގެން ޕޯރޓްތަކުގައި ބަލައިފާސް ކުރަމުން ގެންދާނެ ކަމަށެވެ.