ދިވެހި ބަހާއި ސަގާފަތާއި ތަރިކައާ ބެހޭ ވުޒާރާއާ ގުޅިގެން ގައުމީ ފެންވަރުގައި މި އަހަރުގެ އަލްހާ އީދު ފާހަގަކުރާ ރަށްތައް ކަނޑައަޅައިފި އެވެ.
ބަހާ ބެހޭ ވުޒާރާއިން ހާމަކުރި ގޮތުގައި މި އަހަރު އަލްހާ އީދު ގައުމީ ފެންވަރުގައި ފާހަގަކުރުމަށް ހޮވުނު ރަށްރަށަކީ މި ހަރަކާތައް ޝައުގުވެރިކަން ފައުޅުކޮށް, ޕްރޮޕޯސަލް ހުށަހެޅި ރަށްތަކުގެ ތެރެއިން އެންމެ ގިނަ ޕޮއިންޓް ލިބިފައިވާ ރަށްރަށެވެ.
އެ ގޮތުން އެންމެ މަތިން ޕޮއިންޓް ލިބި, 1446 ވަނަ އަހަރުގެ އަލްހާ އީދު ފާހަގަކުރުމަށް ސަރުކާރުން ނިންމާފައިވާ ރަށްތަކަކީ ތިލަދުންމަތީ އުތުރުބުރީ ކެލަޔާއި މާލެ އަތޮޅު ގުރައިދޫ އަދި ހައްދުންމަތީ ގަމެވެ.
މީގެ އިތުރަށް ހުޅުމާލޭގައި ކުޑަކުދީންނާއި އާއިލާތަކަށް ހާއްސަ ކޮށް ވަރަށް ޝައުގުވެރި ހަރަކާތްތަކެއް ކުރިޔަށް ދާނެ އެވެ.
ސަރުކާރުގެ އަމާޒަކީ މި ފަދަ ކޮންމެ ކުލަގަދަ އީދަކީ ވެސް އިސްލާމީވަންތަ، އަދި ދިވެހީންގެ މުއްސަނދި ސަގާފަތް ދިރުވައި އާލާކުރެވޭ, ދިވެހީންގެ މެދުގައިވާ އެއްބައެއްވަންތަ ވިސްނުން ތަރައްގީ ކުރާނޭ އުފާވެރި އިހްތިފާލުތަކަށް ހެދުން ކަމަށް ވެސް ބުންޏެވެ.
އެގޮތުން މި އަހަރުގެ އަލްހާ އީދު ގައުމީ ފެންވަރުގައި ފާހަގަކުރުމަށް ނިންމާފައިވާ ރަށްރަށުގައި ކުރިއަށް ގެންދާ ހަރަކާތްތައް ވިލަރެސްކުރުމުގައި މި މިންގަނޑުން ބަލާނޭ ކަމުގައި ބަހާ ބެހޭ ވުޒާރާއިން ބުނެ އެވެ.
Advertisement
This content is created and paid for by advertisers and does not involve Voice Journalists
