ރ އަތޮޅުގެ ދެކުނު ބިތުގައި އެއާޕޯޓް އަޅާނެ ރަށެއް ނިންމަން ރައްޔިތުންގެ ވޯޓެއް ނަގަނީ
ރ އަތޮޅުގެ ދެކުނު ބިތުގައި އެއާޕޯޓް އަޅާނެ ރަށެއް ނިންމަން ރައްޔިތުންގެ ވޯޓެއް ނަގަން ނިންމައިފި އެވެ.
އެ ނިންމުން ނިންމީ ރ އަތޮޅު ކައުންސިލުން ބޭއްވި ބައްދަލްވުމުގަ އެވެ. އިއްޔެ އޮތް ބައްދަލްވުމުގައި ކައުންސިލުން މި ނިންމުން ނިންމިއިރު ސަރުކާރުން ވަނީ ރ. ފައިނުގައި އެއާޕޯޓް އަޅަން ނިންމާފަ އެވެ. އެ މަސައްކަތް ފެށުމަށް އެމްޓީސީސީ އާއި މޯލްޑިވްސް އެއާޕޯޓްސް ކޮމްޕެނީ ލިމިޓެޑް އެމްއޭސީއެލްއާ ދެމެދު ވަނީ އެއްބަސްވުމެއް ގާއިމުކޮށްފަ އެވެ.
ނަމަވެސް ކައުންސިލްގެ ބައްދަލްވުމުގައި ރަސްމާދޫ ކައުންސިލްގެ ރައީސް ވަނީ ރ އަތޮޅުގެ ދެކުނު ބިތުގައި އެއާޕޯޓް އަޅާނެ ރަށަކާ މެދު އަތޮޅު ކައުންސިލުން ދެކޭ ގޮތެއް ހާމަކުރުމަށާއި އެކަމާމެދު ގޮތްތަކެއް ނިންމަން ހުށައަޅުއްވާފަ އެވެ. އެ ހުށައެޅުމާއި ގުޅިގެން ކިނޮޅަސް ކައުންސިލްގެ ރައީސް ދެކުނު ބިތުގައި އެއާޕޯޓު އަޅާނެ ރަށެއް ނިންމުމުގައި ރައްޔިތުންގެ ވޯޓެއް މުހިންމު ކަން ފާހަގަ ކުރައްވާފަ އެވެ.
އެހެން ކަމުން މުޅި އަތޮޅުގެ ހުރިހާ ރައްޔިތުންގެ މެދުގައި ވޯޓެއް ނެގުމަށް ހުށައެޅި އެވެ. ހުށައެޅުމުގައި ވަނީ މާލެއާ އަތޮޅުގެ ހުރިހާ ރަށެއްގައި ވޯޓް ފޮށި ބަަހައްޓާ ރައްޔިތުންނަށް ފެންނަ ގޮތެއް ނިންމުމަށެވެ.
އެ ނިންމުމަށް 13 ކައުންސިލަރުންގެ ތެރެއިން ނުވަ ކައުންސިލަރުން ތާއީދުކުރި އެވެ.
ނަމަވެސް އެ ވޯޓް ނަގާނެ ތާރީހެއް ކަނޑައެޅުން އަދި އޮތީ ފަސްކޮށްފަ އެވެ.
Advertisement
This content is created and paid for by advertisers and does not involve Voice Journalists
