އަޟްހާ ޢީދާ ދިމާކޮށް ކުލަބޮކިފަތީގެ ޑިމާންޑް ބޮޑުވެފައިވާކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވުޒާރާއިން ބުނެފިއެވެ.
ކުރިއަށްއޮތް ޢީދު ފާހަގަކުރުމަށް އަތޮޅުތެރޭގެ ރަށްރަށުގައި ދަނީ ގިނަ ހަރަކާތްތަކެއް ހިންގަމުންނެވެ. ހާއްސަ ގޮތެއްގައި ޢީދަށް ރަށްތައް ދިއްލާލުމަށް ވަރަށްގިނަ ކައުންސިލް އިދާރާތަކުން ގެންދަނީ މަސައްކަތްކުރަމުންނެވެ. މިކަމާ ގުޅޭގޮތުން ސިޓީތަކާއި އިދާރީ ދާއިރާތައް ހިންގުމާއި ބެހޭ ވަޒީރު އެކްސްގައި ކުރެއްވި ޕޯސްޓެއްގައި ވިދާޅުވީ، ބޮޑު ޢީދަށް، އީދު ލައިޓް ބޭނުންވެގެން ވަރަށް ގިނަ ކައުންސިލްތަކުން އެދެމުންދާކަމަށެވެ. އެގޮތުން "އީދު ލައިޓްގެ ޑިމާންޑް ވަރަށް ހައި" ކަމަށް މިނިސްަޓަރުގެ ޕޯސްޓްގައި ވަނީ ފާހަގަކުރައްވާފައެވެ.
މި ޕޯސްޓްގައި މިނިސްޓަރު ވިދާޅުވީ ސަރުކާރުން ހަރަދުކޮށްގެން މިދިޔަ އަހަރުވެސް އަދި މިއަހަރުވެސް ބޮޑުއީދަށް އީދު ލައިޓް ހޯދާފައި ނުވާނޭކަމަށެވެ.
އީދު އަލި ނަމުގައި ސަރުކާރުން އީދުގެ އުފާ ފާހަގަކުރުމަށް ހިންގަން ފެށި އެ ހަރަކާތަށް ރައްޔިތުންގެ ބޮޑު ޝައުގުވެރިކަމެއް ވަނީ ލިބިގެންގޮސްފައެވެ. ހާއްސަ ގޮތެއްގައި މިކަމަކީ ކުދިވެރިންގެ ޝަގުވެރިކަން ވަރަށްބޮޑަށް ލިބިގެންދިޔަ ކަމެއްކަމަށް ރައްޔިތުން ބުނެއެވެ.
މިނިސްޓަރު އާދަމް ޝަރީފް ދައުލަތުގެ މީޑިއާއަށް ވިދާޅުވެފައިވަނީ އީދަށް ދިއްލުމަށް ލައިޓް ގެންނަނީ އަހަރަކު އެއްފަހަރު ކަމަށާއި، ޑިމާންޑަށް ބަލައި ކުރިއަށް އޮތްތަނުގައި އެކަމަށް ބަޖެޓް ކުރާނޭކަމަށެވެ. އީދު އަލި ޕްރޮގްރާމްގެ ދަށުން މީގެ ކުރިން ވެރިކަންކުރާ ރަށާއި އިތުރު ދެރަށް ދިއްލުމަށް ވަނީ ލައިޓް ފޯރުކޮށްދީފައެވެ.
ސަރުކާރުން މިފަހަރުގެ ބޮޑުއީދު ޤައުމީ ފެންވަރުގައި ފާހަގަކުރުމަށް ނިންމާފައިވަނީ، ތިލަދުންމަތީ އުތުރުބުރީ ކެލަޔާއި މާލެ އަތޮޅު ގުރައިދޫ އަދި ހައްދުންމަތީ ގަމުގައެވެ. އީދު ފާހަގަކުރުމުގެ ހަރަކާތްތައް އަތޮޅުތެރޭގެ ރަށްތަކުގެ އިތުރުން ކުލަގަދަ ހަރަކާތްތަކެއް މާލެ އަދި ހުޅުމާލޭގައިވެސް ކުރިއަށްދާނެއެވެ.
Advertisement
This content is created and paid for by advertisers and does not involve Voice Journalists
