މުއާސަލާތީގޮތުން ދުނިޔެ މިދެކޭ ހަލުއި ކުރިއެރުމުގެ ބޭނުން ހިފަންވީ، ޤައުމަށް އާމްދަނީ ހޯދޭނެ މަގުތައް ފަހިކުރަންކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ބައިނަލްއަޤްވާމީ ގޮތުން މިއަދު ފާހަގަކުރަމުންދާ ދުނިޔޭގެ މުވާސަލާތާއި މަޢުލޫމާތުގެ ދާއިރާގެ ދުވަހުގެ މުނާސަބަތުގައި ސޯޝަލް މީޑިއާގައި ކުރެއްވި ޕޯސްޓެއްގައެވެ. ރައީސް ޑރ.މުއިއްޒު ވިދާޅުވީ، މުވާޞަލާތީ ގޮތުން ދުނިޔެ މިދެކޭ ހަލުވި ކުރިއެރުމުގެ ބޭނުން އަޅުގަނޑުމެން ހިފަންވީ ދިވެހިރާއްޖެ އިޝްތިހާރުކޮށް، މަޤްބޫލުކަން އިތުރު ކުރުމަށްކަމަށެވެ. ހަމަ އެއާއެކު ޤައުމަށް އާމްދަނީ ހޯދޭނެ މަގުތައް ފަހިކުރުމަށް ކަމަށްވެސް ރައީސް ވިދާޅުވިއެވެ.
މިދުވަހުގެ މުނާސަބަތުގައި ކުރެއްވި ޕޯސްޓްގައި ރައީސް ވަނީ، މުވާޞަލާތާއި މަޢުލޫމާތު ފެތުރުމުގެ ދާއިރާގެ އެކި މަސައްކަތްތައް ރާއްޖޭގައި ކުރައްވަވާ ހުރިހާ ޚިދުމަތްތެރީންނަށް، ތަހުނިޔާ ދަންނަވާފައެވެ. އަދި ޤައުމުގެ ތަރައްޤީއާއި މުސްތަޤްބަލަށް މުހިންމު މި ޚިދުމަތުގައި އިތުރު ކުރިއެރުމާއި ކާމިޔާބީއަށް ރައީސް ވަނީ އެދިވަދައިގަންނަވާފައެވެ.
ކޮންމެ އަހަރެއްގެވެސް މެއިމަހުގެ 17 ވަނަ ދުވަސް ބައިނަލްއަޤްވާމީ ފެންވަރުގައި ފާހަގަކުރަނީ، ދުނިޔޭގެ މުއާސަލާތާއި މައުލޫމާތު ފެތުރުމުގެ ދުވަހުގެ ގޮތުގައެވެ. މިފަހަރުގެ މި ދުވަހުގެ ޝިއާރަކީ "ޖެންޑަރ އިކުއަލިޓީ އިން ޑިޖިޓަލް ޓްރާންސްފޯރމޭޝަން" އެވެ.
ދުނިޔޭގެ މުއާސަލާތީ ދުވަސް ފާހަގަކުރަމުންދާއިރު، ރާއްޖެއިން ވަނީ "މޯލްޑިވްސް 2.0" ލޯންޗުކޮށް އައު އީޖާދީ ބަދަލަކާ ދިމާލަށް މިސްރާބް ޖަހާފައެވެ.
Advertisement
This content is created and paid for by advertisers and does not involve Voice Journalists
