ޝަރުއީ ދާއިރާއަށް މި ސަރުކާރުން ނުފޫޒު ނުފޯރުވާނޭކަމުގެ ޔަގީންކަން ބޭރުގެ ފަރާތްތަކަށް ހާރިޖީ ވަޒީރު ޑރ.ޢަބްދުﷲ ހަލީލް މިއަދު ދެއްވައިފިއެވެ.
އެކްސްގައި ކުރެއްވި ޕޯސްޓެއްގައި ކޮމަންވެލްތުގެ އިސް ފަރާތްތައް ޓެގްކުރައްވައި ހާރިޖީ ވަޒީރު ވިދާޅުވީ، ރައީސުލުލްޖުމްހޫރިއްޔާ ޑރ.މުހައްމަދު މުއިއްޒު ޝަރުއީ ދައިރާއަށް ނުފޫޒު ނުފޯރުވާނޭކަމުގެ ޔަގީންކަން ދެއްވާކަމަށެވެ. ހަލީލް ވިދާޅުވީ ސްޕްރީމްކޯޓުގެ ދެ ފަނޑިޔާރަކު ވަކިކުރެއްވީ ޖުޑީޝަލް ސާވިސް ކޮމިޝަނުން ހިންގި ތަހްގީގަކަށްފަހު، ރައްޔިތުންގެ މަޖިލީހުން ކަމަށެވެ. އެހެންކަމުން ޝަރުއީ ދައިރާގެ އެއްވެސް ކަމަކަށް ރައީސްގެ ނުފޫޒެއް ނޯންނާނޭކަމުގެ ޔަގީންކަން ހަލީލް ވަނީ ދެއްވާފައެވެ.
ޝަރުއީ ދާއިރާގެ މިނިވަންކަން ކަށަވަރުކޮށްދިނުމަށް ސަރުކާރުން އަބަދުވެސް ދެމިއޮންނާނޭކަން ފާހަގަކުރައްވަމުން ހަލީލް ވަނީ އިދިކޮޅު ފަރާތްތަކުންވެސް އެކަމުގެ ފުރިހަމަ ތެދު މައުލޫމާތު ބޭރުގެ ފަރާތްތަކާ ހިއްސާކުރައްވާނޭކަމަށް އުއްމީދުކުރާކަމަށް ވިދާޅުވެފައެވެ.
ޖޭއެސްސީން ހިންގި ތަހުގީގުތަކަށްފަހު ސްޕްރީމްކޯޓުގެ ދެ ފަނޑިޔާރުންކަމަށްވާ ޑރ. އަޒްމިރަލްދާ ޒާހިރާއި ފަނޑިޔާރު މަހާޒް އަލީ ޒާހިރު މަގާމުން ވަކިކުރައްވާފައިވަނީ މިދިޔަ ބުދަދުވަހުއެވެ. އެ މައްސަލާގައި އިދިކޮޅު އެމްޑީޕީން ބުނެފައިވަނީ ސްޕްރީމްކޯޓުގެ ފަނޑިޔާރުން މަޤާމުން ވަކިކޮށްފައިވަނީ ސަރުކާރުން ނުފޫޒު ފޯރުވައިގެން ޤާނޫނީ އިމުގެ ބޭރުންކަމަށެވެ. އެގޮތުން އެމްޑީޕީން ވަނީ އެކަން ބައިނަލްއަޤްވާމީ ފަރާތްތަކާވެސް ހިއްސާކޮށްފައެވެ.
އެ ދެ ފަނޑިޔާރުން ވަކިކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ)ން ނިންމީ، އަޒްމިރަލްދާގެ ފިރިކަލުން އަދި އައިޖީއެމްއެޗުގެ ޑޮކްޓަރު އިސްމާއީލް ލަތީފް މަސާޖު ޕާލާއަކުން ހައްޔަރުކޮށް ބަންދުކުރުމާ މެދު ގޮތެއް ނިންމަން ކްރިމިނަލް ކޯޓަށް ގެންދިޔަ މަޖިލީހަށް އަޒްމިރަލްދާ އާއި މަހާޒު ނުފޫޒު ފޯރުވި ކަމަށް ބުނާ މައްސަލާގަ އެވެ.
ސްޕްރީމްކޯޓުގެ ދެ ފަނޑިޔާރަކު ވަކިކޮށްފައިވާއިރު، ފަނޑިޔާރު ހުސްނުއްސުއޫދުވެސް މިވަގުތު ހުންނެވީ ބަލަމުންދާ ސުލޫކީ މައްސަލައަކާ ގުޅިގެން ސަސްޕެންޝަނުގައެވެ.
Advertisement
This content is created and paid for by advertisers and does not involve Voice Journalists
