އެސްޓީއޯ ހުޅުމާލޭ ސްމާޓް ސްޓޯރު، ފާމަސީއަކަށް ބަދަލުކުރަނީ
އެސްޓީއޯއިން ހުޅުމާލޭ ފޭސް އެކެއްގެ ފިހާރަބަރި ހުންނަ ސަރަހައްދުގައި ހެދި ސްމާޓް ސްޓޯރު، އެންމެފަހުން ބޭސްފިހާރައަކަށް ބަދަލުކުރުމަށް ނިންމައިފިއެވެ.
އެސްޓީއޯގެ އަހަރީ އާއްމު ޖަލްސާގައި ވާހަކަދައްކަވަމުން އެކުންފުނީގެ މެނޭޖިންގ ޑިރެކްޓަރު ޝިމާދު އިބްރާހީމް ވަނީ އެކަން ހިނގަމުންދާކަމަށް ވިދާޅުވެފައެވެ. ޝިމާދު ވިދާޅުވީ، ސްމާޓް ޝޮޕް، ފާމަސީއަކަށް ބަދަލުކުރުމަށް ނިންމީ ހުޅުމާލޭގައި ދިރިއުޅެމުންދާ ރައްޔިތުންނަށް ބޭސް ލިބިމުގައި މިހާރު އޮތް އުނދަގޫތަކަށް އިތުރު ލުއިތަކެއް ހޯދައިދިނުމުގެ ބޭނުމުގައިކަމަށެވެ. އެގޮތުން ހުޅުމާލޭ ހޮސްޕިޓަލުގައި މިހާރު ހުންނަ ބޭސްފިހާރައިން ހިދުމަތް ހޯދުމަށް ރައްޔިތުން ގިނައިރު އެތަނުގައި ހޭދަކުރަންޖެހޭކަމަށް ޝިމާދު ފާހަގަކުރެއްވިއެވެ.
ބޭސް ލިބުމުގައި ރައްޔިތުންނަށް އޮތް ދަތިކަން ހައްލުކުރުމަށް މަސައްކަތްތަކެއް ކުރަމުންގެންދާކަމަށް އަހަރީ އާއްމު ޖަލްސާގައި އެސްޓީއޯގެ އެމްޑީ ވަނީ ވިދާޅުވެފައެވެ. މިގޮތުން ހުޅުމާލޭ ފޭސް ދޭއްގައިވެސް ފާމަސީއެއް ޤާއިމްކުރުމަށް ކުރަންޖެހޭ މަސައްކަތްތައް ކުރަމުން އަންނަަކަމަށް ޝިމާދު ވަނީ ވިދާޅުވެފައެވެ.
އެސްޓީއޯއިން ހުޅުމާލޭގައި ޤާއިމްކުރި ސްމާޓް ސްޓޯރު ހުޅުވާފައިވަނީ 2023 ވަނަ އަހަރުގެ ޖުލައިމަހުގެ 27 ވަނަ ދުވަހުއެވެ. މިއީ ކޭޝިއަރަކާ ނުލައި ރާއްޖޭގައި ވިޔަފާރި ކުރެވޭގޮތަށް ހެދި މިފަދަ ފުރަތަމަ ސްމށާޓް ސްޓޯރެވެ. އެ ފިހާރައިން ވިޔަފާރިކުރެވެނީ އެކަމަށް ހައްސަ އެޕްލިކޭޝަނެއް ފޯނަށް އަޅައިގެންނެވެ.
Advertisement
This content is created and paid for by advertisers and does not involve Voice Journalists
