ވާލާއި ކާޅު ފަދަ ދިރޭތަކެތީގެ ސަބަބުން ދަނޑުވެރިންނަށް ލިބޭ ގެއްލުންތަކަށް ހައްލު ހޯދަވައިދެއްވުމަށް އެންވަރމެންޓް ޕްރޮޓެކްޝަން އެޖެންސީ (އީޕީއޭ) އާއި އެކު ވަޒީރު މަޝްވަރާކޮށްފިއެވެ.

ދަނޑުވެރިކަމާ ބެހޭ ވުޒާރާއިން ބުނީ އެކަމަށް ހައްލު ހޯދުމަށް، އީޕީއޭ އާއި އެކު ބޭއްވި ބައްދަލުވުމުގައި، ކާޅު އަދި ވާލުގެ ދުއްތުރާތަކުން ދަނޑުތައް ސަލާމަތްކުރުމަށް، އެތަކެތި މެނޭޖު ކުރުމާއިގުޅޭގޮތުން މަޝްވަރާކޮށްފައިވާ ކަމަށެވެ.

މި ބައްދަލުވުމުގައި ވަޒީރުގެ އިތުރުން މި ވުޒާރާގެ ކަމާއި ގުޅުންހުރި ޑިޕާޓްމަންޓްގެ އިސްބޭފުޅުން ބައިވެރިވެލެއްވިއެވެ.

މި ބައްދަލުވުމުގައި އީޕީއޭ އިން ވަނީ ވާލާއި ކާޅުގެ އަދަދު ބަލައި ދެނެގަތުމަށްފަހު އެ އަދަދަށް ބަލައި، ޖަނަވާރުތައް ބެލެހެއްޓުމަށް އެންމެ ރަނގަޅު ގޮތަކީ ކޮބައިކަން އެ އިދާރާއިން ދެނެގަންނާނެކަމަށް ބުނެފައެވެ. 

އަދި ވާލާއި ކާލުގެ އުނދަގޫބޮޑުވެ، އެހެން ގޮތެއް ނެތް ނަމަ، ކޮންޓްރޯލްކޮށްގެން އުނިކުރުންކަމަށް ވިސްނިދާނެކަމަށާ އެހެން ނަމަވެސް އެއީ އެންމެ ފަހުކަމެއްގެ ގޮތުން ކުރަންވާނެ ކަންތައް ކަމަށްވެސް އީޕީއޭއިން ބުންޏެވެ. 

ދަނޑުވެރިކަމާ ބެހޭ ވުޒާރާއިން ބުނީ، އެ ވުޒާރާގެ މަޤްޞަދަކީ ދަނދުވެރިންނަށް ދަނޑުވެރިކަން ކުރުމަށް ރައްކާތެރި މާހައުލެއް ހޯދައިދިނުން ކަމަށާ އަދި އެއާއިއެކު އާންމު ސަލާމަތްތެރިކަން ޔަޤީންކޮށް، އަދި ރަނގަޅަށް މަޢުލޫމާތު ލިބިގެން ރޭވުންތެރިކަމާއެކު ކަންކަން ބައްޓަންކުރުން ކަމަށެވެ.