އިންފޮމޭޝަން ކޮމިޝަނަރުގެ އޮފީސް (އައިކޮމް) ހިންގާ އިމާރާތުގެ ހާލަތު ދަށްވެ، އެ އޮފީހުގެ މަސައްކަތްތައް އޮންލައިންކޮށް ކުރިއަށް ގެންދަން ނިންމައިފި އެވެ.
އައިކޮމް އިން މިއަދު އެކްސްގައި ކުރި ޕޯސްޓެއްގައި ބުނީ، އެ ކޮމިޝަން ހިންގާ އޮފީސް އިމާރާތުގެ ހާލަތު ހުރި ގޮތުން އޮފީހުގައި މަސައްކަތް ކުރެވޭނެ ހާލަތެއް މިވަގުތު ނެތް ކަމަށެވެ.
އެހެންކަމުން، މާދަމާއިން އިން ފެށިގެން އައިކޮމްގެ މަސައްކަތްތައް ކުރާނީ އޮންލައިންކޮށް ކަމަށްވެސް ބުންޏެވެ.
އައިކޮމްގެ އޮފީސް ހިންގަމުންދަނީ ބިއްލޫރިޖެހި ގޭގައެވެ. އެ އޮފީސް އިމާރާތް ހަލާކުވެގެން މަރާމާތު ކުރި ނަމަވެސް، ގިނަ ދުވަސްވަންދެން ރަނގަޅު ހާލަތެއް ނުހުންނާތީ، އެކަމަށް ދާއިމީ ޙައްލެއް ހޯދުމަށް ކަމާ ގުޅުންހުރި އިދާރާތަކުގައި އެދުނު ކަމަށް އައިކޮމްގެ މިދިޔަ އަހަރުގެ އަހަރީ ރިޕޯޓްގައި ފާހަގަކޮށްފައިވެއެވެ.
އެހެން ނަމަވެސް މައްސަލައަށް ހައްލެއް ނުލިބޭ ކަމަށްވެސް ބުނެފައިވެއެވެ.
މީގެ އިތުރުން، އަހަރުގެ އަހަރީ ރިޕޯޓުގައި ވެސް އެ ކޮމިޝަން ހިންގާ އިމާރާތުގެ ހާލަތު ދަށް ކަމުން މަސައްކަތް އެންމެ އެކަށީގެންވާ ގޮތަށް ކުރިއަށް ގެންދަން ދަތި ކަމަށާ، ތަނުގެ ޖާގައިގެ ދަތިކަންވެސް ހުރުމުން، ބައެއް މުވައްޒަފުންނަށް މީޓިން ރޫމުގައިވެސް މަސައްކަތް ކުރަން ޖެހުނު ކަން ފާހަގަކޮށްފައިވެއެވެ.
Advertisement
This content is created and paid for by advertisers and does not involve Voice Journalists
