ލޯންޗަކުން ޖެހި، ފީނަން އޮތް މީހެއްގެ އަތް ބުރިވެ ބޮޑެތި އަނިޔާތަކެއްވި މައްސަލާގައި އަދިވެސް މީހަކު ހައްޔަރު ނުކުރާ ކަމަށް ފުލުހުން ބުނެފިއެވެ.
ފުލުހުން ބުނީ، ނ. އަތޮޅުގައި ހިންގާ ރިސޯޓެއްގެ ނެރު ކައިރީ ފީނަން އުޅުނު ބަޔެއްގެ ތެރެއިން ބަންގްލަދޭޝް މީހެއްގެ ގައިގައި ލޯންޗަކުން ޖެހި ބޮޑެތި އަނިޔާވެފައިވާކަމަށެވެ.
މި ހާދިސާ ހިނގާފައިވަނީ، މިމަހު 12 ވަނަ ދުވަހުގެ ރޭ 10:30 ހާއިރުއެވެ. މި ހާދިސާގައި އަތްބުރިވީ ބަންގްލަދޭޝްގެ 30 އަހަރުގެ މީހަކަށެވެ. އެމީހާގެ ކަނާއަތުގެ އުޅަނބޮއްޓާ ހިސާބުން ބުރިވެފައިވާކަމަށް ފުލުހުން މީގެ ކުރިން ބުންޏެވެ.
ފުލުހުން މިއަދު ބުނީ، އެ މއްސަލައާއި ގުޅިގެން އެ ލޯންޗުގެ ކެޕްޓަން ހިމެނޭ ހެން ގިނަ އަދަދެއްގެ މީހުންނާ ސުވާލު ކުރެވި ބަޔާން ނެގިފައިވާ ކަމަށެވެ.
”މި މައްސަލައާ ގުޅިގެން ހާދިސާ ހިނގި ސަރަޙައްދު ދެ ފަހަރެއްގެ މަތިން ބަލައި ފާސްކުރެްކުރެވިފައިވޭ. ނަމަވެސް، އަނިޔާ ލިބުނު މީހާގެ ބުރިވި އަތް ފެނިފައި ނުވޭ“ ފުލުހުން ބުންޏެވެ.
ފުލުހުން އިތުރަށް ބުނީ، ތަޙުޤީޤުގައި މިހާތަނަށް ލިބިފައިވާ މަޢުލޫމާތުތަކާއި ހެކިތަކަށް ބަލައި މިހާތަނަށް އަދި ފިޔަވަޅެއް އަޅާފައި ނުވި ނަމަވެސް، ތަޙުޤީޤުގެ ފުރިހަމަ ކުރަންޖެހޭ ބައެއް ކަންކަން ފުރިހަމަ ކުރުމަށް ފަހު ފިޔަވަޅު އަޅާންޖެހޭ ފަރާތްތަކާ މެދު ފިޔަވަޅު އަޅާނެ ކަމަށެވެ.
Advertisement
This content is created and paid for by advertisers and does not involve Voice Journalists
