2025 ވަނަ އަހަރުގެ އެޕްރީލް މަހު ދައުލަތުގެ ބެލުމުގެ ދަށަށް 4 ކުދިން ނެގިފައިވާ ކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ބުނެފިއެވެ.  މިއީ 2 އަންހެން ކުދިންނާއި 2 ފިރިހެން ކުދިންނެވެ.

އެ ވުޒާރާގެ ތަފާސް ހިސާބުތަކުން ދައްކާ ގޮތުގައި މިއަހަރުގެ އެޕްރީލް މަހާ ހަމައަށް ދައުލަތުގެ ބެލުމުގެ ދަށުގައި ޖުމްލަ 146 ކުދިން ތިބިއެވެ. މީގެ ތެރޭގައި ހިމެނެނީ 83 ފިރިހެން ކުދިންނާއި 63 އަންހެން ކުދިންނެވެ.

އެޕްރީލް މަހު ވުޒާރާއަށް ހުށަހެޅުނު މައްސަލަތަކުގެ ތެރޭގައި ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 98 މައްސަލަ ހިމެނެއެވެ. މީގެ ތެރެއިން އެންމެ ގިނައީ އިހުމާލުވުމުގެ 32 މައްސަލައެވެ. ދެން ގިނައީ ޖިންސީ ހާނިކައިގެ 21 މައްސަލައެވަލައެވެ.

މީގެ އިތުރުން އާއިލީ މައްސަލަތަކާ ގުޅޭ 32 މައްސަލައާއި، ކުދިންގެ އަޚްލާޤީ މައްސަލަތަކާ ގުޅޭ 21 މައްސަލައާއި، ކުޑަކުދިންގެ ޙައްޤުތަކާ ގުޅުންހުރި 6 މައްސަލަ ވެސް ވަނީ ހުށަހެޅިފައެވެ.

ވުޒާރާގެ ހެލްޕްލައިންތަކަށް އެޕްރީލް މަހު ޖުމްލަ 2,150 ކޯލު ލިބިފައިވާއިރު، އޭގެ ތެރެއިން 1,778 ކޯލަކީ ޗައިލްޑް ހެލްޕްލައިނަށް ލިބުނު ކޯލުތަކެވެ.

މީގެ އިތުރުން، 2025 ވަނަ އަހަރުގެ އެޕްރީލް މަހު އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް އަންހެނުންނާއި ފިރިހެނުންނަށް ކުރާ އަނިޔާގެ ޖުމްލަ 44 މައްސަލަ ހުށަހެޅިފައިވެއެވެ.

މި ބާވަތުގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ ޖިސްމާނީ ގޮތުން ކުރާ އަނިޔާގެ މައްސަލައެވެ. އެގޮތުން މި ބާވަތުގެ 28 މައްސަލައެއްވަނީ ރިޕޯޓުކޮށްފައެވެ.

ހަމައެހެންމެ، އަންހެނުންނާއި ފިރިހެނުންނަށް ކުރާ އަނިޔާގެ ތެރޭގައި، ނަފްސާނީ އަނިޔާކުރުމާއި، އަނގަބަހުން ކުރެވޭ އަނިޔާގެ 08 މައްސަލައެއް ވެސް ހިމެނެއެވެ. އަދި، ބިރުދެއްކުމުގެ ގޮތުން ކުރެވޭ ކަންކަމުގެ 05 މައްސަލައާއި، ޖިންސީ ހާނިކަކުރުމުގެ 02 މައްސަލައާއި، ހިފެހެއްޓުމުގެ 02 މައްސަލައާއި، ގަދަކަމުން ޖިންސީ ގޯނާ ކުރުމުގެ 02 މައްސަލައިގެ އިތުރުން، މުދާ ހިފަހެއްޓުމާއި މުދަލަށް ގެއްލުން ދިނުމުގެ 01 މައްސަލަ ވަނީ މިއަހަރު އެޕްރީލް މަހު މި ވުޒާރާއަށް ރިޕޯޓުކޮށްފައެވެ.

އޭގެތެރޭގައި ހިމެނެނީ، އަންހެނުންނާއި ގުޅޭ 40 މައްސަލައަކާއި ފިރހެނުންނައި ގުޅޭ 04 މައްސަލައެކެވެ.