ހެންވޭރު ގެއެއްގެ ފުރާޅު މައްޗަށް ހައްވާ ޔުމްނު ނަމަކަށް ކިޔާ އަންހެނަކު ވެއްޓިފައި އޮއްވާ ފެނުނު މައްސަލައިގައި ހައްޔަރު ކުރި ރައުދު އަހުމަދު ޒިލާލް ދޫކޮށްލައިފި އެވެ.
ކްރިމިނަލް ކޯޓުން ރައުދުގެ ބަންދު މުއްދަތު ޖެހުމުން އެ ކޯޓު އަމުރު ރައުދުގެ ފަރާތުން ވަނީ ހައި ކޯޓުގައި އިސްތިއުނާފްކޮށްފައެވެ.
ނަމަވެސް، މިއަދު ހައި ކޯޓުން ނެރުނު އެ މައްސަލައިގެ ރިޕޯޓުގައި ބުނެފައިވަނީ އިސްތިނާފްގެ މައްސަލަ އަނބުރާ ގެންދިއުމަށް ރައުދުގެ ފަރާތުން ހުށަހަޅާފައިވާ ކަމަށެވެ.
އަދި މައްސަލަ އަނބުރާ ގެންދިޔުމަށް ރައުދު ހުށަހަޅާފައިވަނީ، އިސްތިއުނާފް ކުރި ބަންދު އަމުރުގެ ދަށުން އޭނާ ބަންދުގައި ހުއްޓާ، މިއަދު ހެނދުނުގެ ވަގުތެއްގައި އޭނާ ބަންދުން ދޫކޮށްލުމުން ކަމަށްވެސް ބުނެފައިވެއެވެ.
އެހެންކަމުން، އެ އިސްތިއުނާފް މައްސަލަ ބާޠިލުކޮށްފައިވާ ކަމަށް ހައިކޯޓްގެ އަމުރުގައިވެއެވެ.
ޔުމްނު ވެއްޓުނު މައްސަލާގައި ރައުދު ހައްޔަރުކުރީ މިދިޔަ މަހުގެ 24ވަނަ ދުވަހުގެ ރޭ 18:20ގައެވެ. އެފަހުން ކްރިމިނަލް ކޯޓަށް ހާޒިރުކޮށް، އެންމެ ފުރަތަމަ އޭނާގެ މައްޗަށް ޖެހީ ފަސް ދުވަހެވެ.
އޭގެފަހުން، އިތުރު ދިހަ ދުވަސް ޖަހައި، އެ މުއްދަތު ހަމަވުމުން ފަސް ދުވަސް ޖަހެމަށްފަހު، މިދިޔަ ބުރާސްފަތި ދުވަހު ވަނީ 20 ދުވަސް އިތުރުކޮށްފައެވެ. އެ މުއްދަތު ހަމަ ނުވަނީސް ރައުދު ބަންދުން ދޫކޮށްލި ސަބަބު އަދި ހާމަކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
