މާޅޮސްމަޑުލު އުތުރުބުރީ، ނުވަތަ ރ.އަތޮޅުގެ އާބާދީ 25 ހާހުން މައްޗަށް އަރައިފިއެވެ.

ރ.އަތޮޅު ކައުންސިލުން ނެރެފައިވާ އެއަތޮޅު ރަށްރަށުގެ އާބާދީ ތަފާސްހިސާބަށް ބަލާއިރު، މިހިނގާ މެއިމަހުގެ 21 ވަނަ ދުވަހުގެ ނިޔަލަށް ރ.އަތޮޅުގެ ޖުމްލަ އާބާދީއަކީ 25،384 އެވެ. އޭގެ ތެރޭގައި ހިމެނެނީ، 13،030 ފިރިހެނުންނާއި، 12،354 އަންހެނުންނެވެ. 

ރ.އަތޮޅުގައި މީހުން ދިރިއުޅޭ 15 ރަށް އޮންނައިރު، އެއަތޮޅުގައި އެންމެ އާބާދީބޮޑު ރަށަކީ ދުވާފަރެވެ. އެރަށުގެ އާބާދީއަކީ، 5،044 މީހުންނެވެ. އެންމެ އާބާދީ މަދީ ފައިނުގައެވެ. އެރަށުގެ އާބާދީއަކީ، 526 އެވެ.

- އަލިފުށި: 3،050

- ވާދޫ: 661   

- ރަސްގެތީމު: 954

- އަނގޮޅިތީމް 549

- ހުޅުދުއްފާރު: 1،649

- އުނގޫފާރު: 1،889

- ދުވާފަރު: 5،044

- މާކުރަތު: 1،407

- ރަސްމާދޫ: 906

- އިންނަމާދޫ: 955

- އިނގުރައިދޫ: 2،161

- ފައިނު: 526

- ކިނޮޅަސް: 689

- މަޑުއްވަރީ: 2،650

- މީދޫ: 2،294

ރ.އަތޮޅު ކައުންސިލްގެ ރައީސް ހުސައިން ނާސިފް ވިދާޅުވީ، އެ މައުލޫމާތު އެކުލަވާލާފައިވަނީ ރަށްތަކުގެ ކައުންސިލުން ދީފައިވާ މައުލޫމާތުގެ މައްޗަށް ބިނާކޮށްކަމަށެވެ.  ރ.އަތޮޅުގެ އާބާދީ 25 ހާހުން މަތީގައި އުޅޭއިރު، އެއަތޮޅުގެ ގިނަ ބަޔަކު އެކި ބޭނުންތަކުގައި މާލެ ސަރަހައްދަށް ހިޖުރަކޮށް އުޅެމުންދެއެވެ. ރާއްޖޭގެ އަތޮޅުތަކުގެ ތެރެއިން ރ އަތޮޅު މަޝްހޫރުވެފައި އޮންނަނީ، އެންމެ ގިނައިން ވަޑާންކުރާމީހުން އުޅޭ އަތޮޅުގެ ގޮތުގައެވެ. 

ރ.އަތޮޅަކީ އުތުރުގެ އަތޮޅުތަކުގެ ތެރެއިން އެންމެބޮޑު އާބާދީއެއް އޮންނަ އެއް އަތޮޅެވެ. އުތުރުގެ އަތޮޅުތަކުގެ ތެރެއިން އެންމެބޮޑު އާބާދީއެއް އޮންނަނީ ހދ.އަތޮޅުގައެވެ. ހދ.އަތޮޅު ކައުންސިލުން އާއްމުކޮށްފައިވާ މައުލޫމާތަށް ބަލާއިރު، މިދިޔަ އަހަރުގެ ނިޔަލަށް އެ އަތޮޅުގެ ޖުމްލަ އާބާދީއަކީ، 29،289 އެވެ.