ދިވެހީންގެ އުފެއްދުންތެރިކަމުގެ މައުރަޒު 2025 މިރޭ ހުޅުވައިފި އެވެ.

ސެންޓްރަލް ޕާކުގައި ކުރިއަށްދާ މައުރަޒު ހުޅުވައި ދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ. މައުރަޒު ހުޅުވުމުގެ ރަސްމިއްޔާތުގައި ރައީސްގެ ދެކަނބަލުންގެ އިތުރުން ދައުލަތުގެ އިސް ބޭފުޅުން ބައިވެރިވެވަޑައިގެންނެވި އެވެ.

މައުރަޒު ހުޅުއްވައިދެއްވުމަށް ފަހު ރައީސްގެ ދެކަނބަލުން ވަނީ ސްޓޯލްތަކަށް ޒިޔާރަތް ކުރައްވާ އެ ސްޓްލްތައް ބައްލަވާލައްވާފަ އެވެ.

ދިވެހީންގެ އުފެއްދުންތެރިކަމުގެ މައުރަޒުގައި ޖުމްލަ 383 ފަރާތަކުން ބައިވެރިވެފައިވެއެވެ. އެއީ 14 ކެޓެގަރީއަކުންނާއި 82 ސަބް ގިންތިއަކުންނެވެ. މިގޮތުން އެންމެ ގިނައިން ބައިވެރިވެފައިވަނީ އަތްތެރި މަސައްކަތުގެ ދާއިރާއިންނެވެ. މި މައުރަޒުގައި ހދ އަތޮޅުން ފެށިގެން ލ އަތޮޅާއި ހަމައަށް ގިނަ ރަށްތަކަކުން ބައިވެރިވެފައިވެއެވެ.

މައުރަޒުގައި އެންމެ ގިނަ ތަކެތި ބައިވެރިކޮށްފައިވަނީ މާލެ އާއި ބ.ތުޅާދޫ އިންނެވެ. މައުރަޒުގައި 3600އަށް ވުރެ ގިނަ ތަކެތި ބައިވެރި ކޮށްފައިވެ އެވެ.

ދިވެހީންގެ އުފެއްދުންތެރިކަމުގެ މައުރަޒު ހުޅުވުން -- ފޮޓޯ: ރައީސް އޮފީސް

ދިވެހީންގެ އުފެއްދުންތެރިކަމުގެ މައުރަޒަށް މިރެއިން ފެށިގެން އާންމުންނަށް ޒިޔާރަތް ކުރެވޭނެ އެވެ. މިރޭ މަރުކަޒު ކުރިއަށް ދާނީ 11 ޖަހަން ދެނެ އެވެ.

އަދި މާދަމާ އިން ފެށިގެން މި މަހުގެ 31 ގެ ނިޔަލަށް މައުރަޒު ކުރިއަށް ގެންދަން ވަނީ ނިންމާފަ އެވެ.

ދިވެހީންގެ އުފެއްދުންތެރިކަމުގެ މައުރަޒުގެ ނަމުގައި މައުރަޒެއް ބޭއްވުމަށް ރައީސުލްޖުމްހޫރިއްޔާ ނިންމަވާފައިވަނީ، ވަޒީރުންގެ މަޖިލީހުގެ ލަފާފުޅާއެކު މެއި 20, 2024ގަ އެވެ. މިއީ ދިވެހިރާއްޖޭގެ އުފެއްދުންތެރިކަން އިތުރުކޮށް ވިޔަފާރި ފުޅާ ކުރުމުގެ މަގްސަދުގައި، ވިޔަފާރިއާއި އުފެއްދުންތެރިކަމަށް އަމާޒުކޮށް ބާއްވާ މައުރަޒެކެވެ.