ހުޅުމާލެ ސެންޓްރަލް ޕާކްގައި މިހާރު ކުރިއަށްދާ ދިވެހިރާއްޖޭގެ އުފެއްދުންތެރިކަމުގެ މައުރަޒު ވަރަށް ކާމިޔާބުކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު މިގޮތަށް ވިދާޅުވެފައިވަނީ، އުފެއްދުންތެރިކަމުގެ މައުރަޒުގެ ސްޓޯލްތައް ބައްލަވާލެއްވުމަށް ރޭ އެތަނަށް ކުރެއްވި ޒިޔާރަތަށްފަހު ދައުލަތުގެ މީޑިއާއާ ވާހަކަދައްކަވަމުންނެވެ. އުފެއްދުންތެރިކަމުގެ މައުރަޒު ރަސްމީކޮށް އިއްޔެރޭ ހުޅުވައިދެއްވީވެސް ރައީސް އެވެ.
ސްޓޯލްތައް ބައްލަވާލައްވައި ރައީސް މުއިއްޒު ވިދާޅުވީ، މައުރަޒު ބޭއްވުމުގެ މަޤްސަދަކަށްވީ، ދިވެހިންގެ އުފެއްދުންތެރިކަމަށް ފުރުސަތުދޭން ކަމަށާއި، އެ ދިން ފުރުސަތުގެ ބޭނުން މަސައްކަތްތެރިން ވަރަށް ރަނގަޅަށް ބޭނުންކުރި ކަމަށެވެ. ވަރަށް ގިނަ ދުވަސްތަކަށްފަހު މައުރަޒް ބޭއްވިގެންދިޔަކަން ފާހަގަކުރައްވައި ރައީސް ވިދާޅުވީ މިއީ އަދި ފެށުމެއް ކަމަށާއި، މިކަން އަލުން ފެށުނުއިރު ރައްޔިތުން މި މައުރަޒު ވަރަށް ރަނގަޅަށް ބަލައިގަތްފައިވާކަމަށެވެ.
އުފެއްދުންތެރިކަމުގެ މައުރަޒުގެ ތެރެއިން...
ރައީސް ޑރ.މުއިއްޒު ވިދާޅުވީ، ކްރިއޭޓިވް އިކޮނޮމީއަކީ މި ސަރުކާރުގެ މެނިފެސްޓޯގައި ހިމެނޭ ވަރަށް މުހިއްމު ވައުދެއްކަމަށައި، ރާއްޖޭގެ އުފެއްދުންތެރިކަމުގެ 15 އިންސައްތައަކީ މި އިންޑަސްޓްރީގެ ހިއްސާދާރުންގެ މަސައްކަތްކަމުގައި މި ސަރުކާރުން ހަދާނޭކަމަށެވެ. އެގޮތުން 2030 ވަނަ އަހަރު އަންނަން ވާއިރަށް އެ އަމާޒަށް ވާސިލްވުމަށް މަސައްކަތް ކުރާނޭކަން ރައީސް ފާހަގަކުރެއްވިއެވެ.
އަޅުގަނޑުގެ ޒިއްމާއަކީ މިކަންކުރުމަށް ފުރުސަތުދިނުން. މި ޓެލެންޓްތަކަށް ފުރުސަތު ދޭން އެބަޖެހޭ އެއީ އަޅުގަނޑުގެ މެނިފެސްޓޯގައިވެސް ހިމެނިފައިވާކަމެއް
ރައީސް ޑރ.މުއިއްޒު ވިދާޅުވިއެވެ
ރައީސް ވިދާޅުވީ ފުރިހަމަ ޕޭމަންޓް ގޭޓްވޭއެއްގެ ނިޒާމް ގާއިމްކޮށްދިނުމާއި ޑިޖިޓަލް ޕްލެޓް ފޯމެއްގެ ތެރެއިން ރާއްޖެއާއި ރާއްޖެއިން ބޭރުން ފުރުސަތުތައް ފަހިކޮށްދިނުމަށް ކުރަންޖެހޭ ކަންކަން ސަރުކާރުން ކުރާނޭކަމަށެވެ. އެގޮތުން ސަރުކާރުގެ މުއައްސަސާ އިދާރާތަކުން ޑިޖިޓަލް ދާއިރާގެ ހަރަކާތްތެރިންނަށް ފުރުސަތުތައް ފަހިކޮށްދޭނޭކަމަށް ރައީސް ފާހަގަކުރެއްވިއެވެ.
އުފެއްދުންތެރިކަމުގެ މައުރަޒުގެ ތެރެއިން...
ދިވެހީންގެ އުފެއްދުންތެރިކަމުގެ މައުރަޒުގައި ޖުމްލަ 383 ފަރާތަކުން ބައިވެރިވެފައިވެއެވެ. އެއީ 14 ކެޓެގަރީއަކުންނާއި 82 ސަބް ގިންތިއަކުންނެވެ. މިގޮތުން އެންމެ ގިނައިން ބައިވެރިވެފައިވަނީ އަތްތެރި މަސައްކަތުގެ ދާއިރާއިންނެވެ. މި މައުރަޒުގައި ހދ އަތޮޅުން ފެށިގެން ލ އަތޮޅާއި ހަމައަށް ގިނަ ރަށްތަކަކުން ބައިވެރިވެފައިވެއެވެ. މައުރަޒު މިމަހުގެ 31 ވަނަ ދުވަހުގެ ރޭގެ ނިޔަލަށް ކުރިއަށްދާނެއެވެ.
Advertisement
This content is created and paid for by advertisers and does not involve Voice Journalists
