ޒުވާނުންނަށް އަމާޒުކޮށްގެން ކުރިއަށް ގެންދާ އަލް ޢަސްރުގެ ޔެޕް (ޔޫތް އެމްޕަވަމަންޓް ޕްރޮގްރާމް) "YEP by Al Asr" ޕްރޮގްރާމްގައި ބައިވެރިވުމުގެ ފުރުސަތު ހުޅުވާލައިފިއެވެ. 

ޔެޕް އަކީ ޒުވާނުންގެ ތެރެއިން ލީޑަރުން ބިނާކުރުމަށާއި ޒުވާނުން ބާރުވެރި ކުރުމަށް ހިންގޭ ތަފާތު ޕްރޮގްރާމެކެވެ.

މި ޕްރޮގްރާމްގައި ބައިވެރިވާން ބޭނުންވާ ފަރާތްތަކުން ފުރިހަމަ ނަމާއި، އުމުރު އަދި ގުޅޭނެ ނަންބަރެއް، ވައިބާ މެދުވެރިކޮށް 7925277 އަށް ފޮނުވުމަށް އަސްރުން އެދެއެވެ. އަދި ބައިވެރި ވެވޭނީ 15 އަހަރުން މަތީގެ ފަރާތްތަކަށް ކަމަށްވެސް ބުންޏެވެ. 

އަލް އަސްރުން އިތުރަށް ބުނީ، މިފަހަރުގެ ޕްރޮގްރާމް އޮންނާނީ، މިމަހު 30 ވަނަ ދުވަހުގެ ރޭ 20:30 ގައި ފަރުކޮޅުފުށީގައި ކަމަށެވެ. 

”ޒުވާނުންނަށް“ ނަމުގައި ކުރިއަށް ގެންދާ މި ސެޝަން ނަގައިދެއްވާނީ ދިވެހިރާއްޖޭގެ އިސްލާމީ ޔުނިވަރސިޓީގެ ވައިސް ޗާންސެލަރ ޑރ. ޢަލީ ޒާހިރު ބިން ސަޢީދު ޤާޞިމެވެ. 

ޔެޕްގެ ސެޝަންތައް ކުރިއަށްދާނީ ސީރީޒެއްގެ ގޮތުގައި ކަމަށް ވެސް އަލް އަސްރުން ބުނެފައިވއެވެ. އެގޮތުން، މިދިޔަ މާރިޗް މަހުގައިވެސް މީގެ ޕްރޮގްރާމެއް ވަނީ ކުރިއަށް ގެންގޮސްފައެވެ.

ޔެޕް ޕްރޮގްރާމަކީ ޒުވާނުންގެ ހުނަރުތައް ތަރައްޤީކޮށް، އަމިއްލަ ނަފްސަށް އިތުބާރު އުފެއްދުމަށް އަމާޒުކޮށްގެން ކުރިއަށްގެންދާ ޕްރޮގްރާމެކެވެ.