މި އަހަރު ޙައްޖުގެ އަޅުކަމަށް ސަޢުދީއަށް ދާ ދިވެހީންނަށް ހާއްސަ އިންތިޒާމުތަކެއް ހަމަޖައްސާފައިވާ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޑެޓް (އެމްއޭސީއެލް) އިން ބުނެފި އެވެ.

އެ ކުންފުނިން މި އިންތިޒާމުތައް ހަމަޖައްސާފައި ވަނީ އިސްލާމިކް މިނިސްޓްރީ އާއި މޯލްޑިވްސް ޙައްޖު ކޯޕަރޭޝަނާއި ކަމާގުޅުން ހުރި އެހެން އިދާރާތަކާ ގުޅިގެންނެވެ. މި އަހަރު ދިވެހި ޙައްޖުވެރީން ދަތުރުކުރާނީ ސަޢުދިއާ އަދި މޯލްޑިވިއަންގެ ފްލައިޓްތަކުގަ އެވެ. 

ހަތަރު ފްލައިޓެއްގައި 1000 ހައްޖުވެރީން ދަތުރުކުރާނެ އެވެ. ދަތުރުތައް އޮތީ މިއަދާއި މާދަމާ އަދި 29 ވަނަ ދުވަހާއި 30 ވަނަ ދުވަހު އެވެ.

މި ދުވަސްތަކުގައި ޓާމިނަލް ހަރަކާތްތައް ހަލުވިކަމާއެކު ކުރިއަށް ގެންދިއުމަށް އެއާޕޯޓް ހިންގާ އެމްއޭސީއެލް އިން ވަނީ ވީއައިއޭ ގައި ޓްރެފިކް ބެލެހެއްޓުމަށް ހާއްސަ ފިޔަވަޅުތަކެއް އަޅާފަ އެވެ. މި ގޮތުން ވެހިކަލްތަކަށް ވަދެވޭނީ އިންޓަނޭޝަނަލް ޓާމިނަލާއި ހަމައަށެވެ. އަދި އެމްއޭސީއެލްގެ މުވައްޒިފުން ހައްޖާޖީން ޓާމިނަލަށް ގެންދިއުމާއި ޗެކް-އިން ކުރުމުގައި އެހީތެރިކަން ފޯރުކޮށް ދޭނެ އެވެ.

މީގެ އިތުރުން ޙައްޖުވެރީންނާއެކު އަންނަ އާއިލާތަކަށް ޚާއްސަ ވެއިޓިން އޭރިއާއެއް ހަމަޖައްސާފައިވާއިރު ޙައްޖުވެރީންނާއި އާއިލާތަކަށް ފޮޓޯ ނެގުމަށް ޚާއްސަ ތަނެއް ވެސް އެއާޕޯޓްގައި ވަނީ ގާއިމުކޮށްފަ އެވެ.

އެ ކުންފުނިން އިތުރަށް ބުނީ މައްކާ ރޫޓް އިފްތިތާހު ކުުރުމާއި އެ ރޫޓްގެ ސަބަބުން ޙައްޖާޖީންނަށް ދެވޭނެ ޚިދުމަތްތައް ފޯރުކޮށްދިނުމަށް ވެސް އިންތިޒާމުތައް ހަމަޖައްސާފައިވާ ކަމަށެވެ.

އެ ގޮތުން ސައުދީގެ އިމިގްރޭޝަންގެ ޚާއްސަ ކައުންޓަރެއް މިހާރު ވަނީ ވީއައިއޭގައި ގާއިމުކޮށްފަ އެވެ.

އެމްއޭސީއެލް އިން ވަނީ ޙައްޖުވެރީން ފުރާ ވަގުތުތަކަކީ ވީއައިއޭއަށް ބާރު ބޮޑުވެގެންދާނެ ވަގުތުތަކަކަށް ވާނެތީ އެހެން ފަސިންޖަރުން ވީހާވެސް އަވަހަކަށް ޗެކް-އިން ނިންމުމަށް އިލްތިމާސް ކޮށްފަ އެވެ. އަދި އެއާޕޯޓްގެ ތޮއްޖެހުން ކުޑަކުުރުމަށާއި ޙައްޖުވެރީން ފުރުވުމަށް އަންނަ މީހުން އެމްއޭސީއެލްގެ މުވައްޒިފުންގެ އިރުޝާދާ އެއްގޮތަށް އަމަލު ކުރުމަށް ވެސް ވަނީ އިލްތިމާސް ކޮށްފަ އެވެ.