އުއްތަމަ ފަނޑިޔާރު ގުޅުއްވި ކަމަށް ބުނެ ރާއްޖެޓީވީން ފެތުރީ ބުހުތާނު ދޮގު: ނަޝީދު
ސުޕްރީމް ކޯޓަށް ހުށައަޅާފައިވާ މައްސަލައަކާއި ގުޅޭގޮތުން އުއްތަމަ ފަނޑިޔާރު އަހްމަދު މުއުތަސިމް އަދުނާނު, ކުރީގެ ރައީސް މުހައްމަދު ނަޝީދާއި މުއާމަލާތް ކުރެއްވި ކަމަށް ބުނެ ރާއްޖެއެމްވީ ގައި ހަބަރަކީ ކަނޑައެޅިގެން ބުހުތާނު ދޮގު ކަމަށް އެމަނިކުފާނު ވިދާޅުވެއްޖެ އެވެ.
އެ ވާހަކަތައް ދޮގުކޮށް ރައީސް މުހައްމަދު ނަޝީދުގެ އޮފީހުން ވަނީ ބަޔާނެއް ނެރެފަ އެވެ.
އެ ބަޔާނުގައި ބުނެފައި ވަނީ "އަލިފުން ޔާޔަށް އޭގައި ހުރި ހުރިހާ ވާހަކަތަކަކީ ކަނޑައެޅިގެން ދޮގު" ކަމަށެވެ.
އެ ބަޔާނުގައި ބުނީ މުއުތަސިމް އަދުނާނަކީ އެމަނިކުފާނުގެ ނަޒާހަތްތެރިކަމާމެދު ދުވަހަކު ވެސް ސުވާލު އުފެދިފައިވާ ބޭފުޅެއް ނޫން ކަމަށެވެ. އަދި ތެދުވެރިކަމާއި އަމާނަތްތެރިކަމާ އެކުގައި މަގާމުގެ މަސްއޫލިއްޔަތުތަކާއި ވާޖިބުތައް އުފުއްލަވާނެ ބޭފުޅެއް ކަމާމެދު ވެސް ކުޑަވެސް ޝައްކެއް އުފެދިފައިވާ ބޭފުޅެއް ނޫން ކަމަށެވެ.
އެމަނިކުފާނު އުއްތަމަފަނޑިޔާރުގެ މަގާމަށް އައްޔަނު ކުރީވެސް އެ ސަބަބުތަކުގެ މައްޗަށް ބިނާކޮށް ކަމަށް ނަޝީދު ވިދާޅުވި އެވެ.
އެ ބަޔާން ރައީސް ނަޝީދު ވަނީ އެކްސްގައި ވެސް ހިއްސާ ކުރައްވާފަ އެވެ. އަދި ވިދާޅުވީ އެ ބާވަތުގެ ބޮޑުވެގެންވާ ފިތުނަވެރި ދޮގު ވާހަކަރައް ފެތުރުން ހުއްޓާލަން ދަންނަވާ ކަމަށެވެ.
Advertisement
This content is created and paid for by advertisers and does not involve Voice Journalists
