14 ރުފިޔާއަށްދޭ ޗޮކޮލެޓެއް ވަގަށް ނަގައިގެން ކެއި މީހަކު 15 ދުވަހަށް ބަންދު ކުރަން ކްރިމިނަލް ކޯޓުން ހުކުމް ކޮށްފިއެވެ.  

މި މައްސަލާގައި ބަންދު ކުރީ 37 އަހަރުގެ ދިވެހި ފިރިހެނެކެވެ.

ބަންދު އަމުރުގައިވާގޮތުން އޭނާ ވަނީ، ރެޑްވޭވް ޕްލާޒާއިން ސްކިނާ ބްރޭންޑްގެ 50 ގްރާމްގެ ޗޮކްލެޓެއް ވަގަށް ނަގައި، ޗޮކްލެޓް ކާލާފައެވެ.

އަދި އޭގެ ކަރުދާސްގަނޑު ޖީބަށްލިތަން އެވަގުތު ފިހާރައިގެ ކެމެރާ ފުޓޭޖު ބަލަން އިން މީހާއަށް ފެނުމުން އައިސް މީނާ ހުއްޓުވިކަމަށް އެ މީހާ ފުލުހުންނަށް މަޢުލޫމާތު ދިން ކަމަށް ދިވެހި ފުލުހުންގެ ޚިދުމަތުން ބުނެފައިވާ ކަމަށް ބަންދު އަމުރުގައި ވެއެވެ. 

ދިފާއުގައި ވާހަކަ ދައްކަމުން، ވައްކަން ކުރި މީހާ ވަނީ، އޭނާ ވަގަށް ނެގި ކަމަށް ތުހުމަތު ކުރަނީ ޗޮކުލެޓެއް ކަމަށާއި އެއީ 14 ރުފިޔާއަށްދޭ އެއްޗެއް ކަމަށް ބުނެފައި ކަމަށް އަމުރުގައިވެއެވެ. އެހެންކަމުން ގިނަ ދުވަސް ބަންދު ނުކުރުމަށްވެސް އޭނާ އެދުނު ކަމަށް ބުނެފައިވެއެވެ.

ނަމަވެސް ކޯޓުން ވަނީ އޭނާ 15 ދުވަހަށް ކުރުމަށް އަމުރު ކޮށްފައެވެ.

އޭނާގެ ބަންދު އަމުރުގައިވާ ގޮތުން، މިއީ މީނާގެ ބަންދާމެދު ގޮތެއް ނިންމުމަށް ހާޒިރުކުރެވުނު ފުރަތަމަ ފަހަރެވެ. އަދި މީނާ ހައްޔަރުކޮށްފައިވަނީ އިޖުރާއަތާއި އެއްގޮތަށް ކަމަށް ވަނީ ކަނޑައަޅާފައެވެ.