އިންޑިއާގެ ލަކްޝަދީބުގައި މަހަލް ބަސް ނުވަތަ ދިވެހިބަހާއި އަރަބިބަސް ކިޔަވައިދިނުން ލަކްޝަދީބުގެ އިދާރާ އިން މަނާ ކުރުމުން މަލިކު މީހުން މުޒާހަރާކޮށްފި އެވެ.
މިދިޔަ އާދިއްތަ ދުވަހު މަލިކުގެ އާއްމުން ނުކުމެ މުޒާހަރާއަށް ނުކުމެފައިވައިރު، އެ މުޒާހަރާގެ ބައިވެރިން ބުނެފައިވާ ގޮތުން، އެ މީހުންގެ މާދަރީ ބަސް ކަމަށްވާ ދިވެހިބަސް ކިޔަވައިދިނުން ސްކޫލްތަކުގައި މަނާކޮށްފައިވާ ކަމަށާއި އެކަމާ ދެކޮޅަށް އަޑު އުފުލާނެ ކަމަށެވެ.
”އަހަރެމެންނަކީ ކޮން ބައެއްކަން ރަމްޒުކޮށްދެނީ އަހަރެމެންގެ މާދަރީ ބަހުން. އެކަން މަނާ ނުކުރެވޭނެ“ މުޒާހަރާގެ ބައިވެރިއަކު ބުނެފައިވެއެވެ.
މަލިކުގެ ކުދިބޮޑު އެންމެން ބައިވެރިވި މި މުޒާހަރާގައި އާއްމުން ވަނީ، ޝުޢޫރުތައް ލިޔެފައިވާ އެކިއެކި ބޯޑުތައް ހިފައިގެން ލަކްޝަދީބުގެ އެންގުމާ ދެކޮޅަށް އަޑު އުފުލާފައެވެ.
ލަކްޝަދީބުގެ އެޑްމިނިސްޓްރޭޝަނުން މި މަހު 14 ވަނަ ދުވަހު ސްކޫލްތަކަށް ފޮނުވި އެންގުމެއްގައި ބުނެފައިވަނީ، މަލިޔާލަމް ބަހުން ކިޔަވައިދޭ ސްކޫލްތަކުގައި، މަލިޔާލަމް ބަހާއި އިނގިރޭސި ބަހާއި ހިންދީ ބަސް ކިޔަވައިދޭން ޖެހޭނެ ކަމަށެވެ.
އަދި އިނގިރޭސި މީޑިއަމް ސްކޫލްތަކުގައި އިނގިރޭސި ބަހާއި މަލިޔާލަމް ބަހާއި ހިންދީ ބަސް ކިޔަވައިދޭން ޖެހޭނެ ކަމަށް ވެސް އަންގާފައިވެ އެވެ.
މިކަމާ ގުޅިގެން އިންޑިޔާގެ ގާނޫނުހަދާ މަޖިލީހުގައި މަލިކާއި ލަކްޝަދީބު ތަމްސީލުކުރައްވާ މެމްބަރު، ޙަމްދުއްލާ ސަޢީދު ވަނީ ދިވެހި ބަސް ކިޔަވައިދިނުން ހުއްޓާލުމަށް ނެރުނު އެންގުން ބާތިލުކޮށް އަލުން ދިވެހި ބަސް ސްކޫލު އޮނިގަނޑުގައި ހިމެނުމަށް ގޮވާލައްވައި ލަކްޝަދީބުގެ އެޑްމިނިސްޓްރޭޓަރަށް ސިޓީއެއް ފޮނުވާފައެވެ.
އެ ސިޓީގައި އޭނާ ވަނީ ދިވެހި ބަހާއި އަރަބި ބަސް ތްރީ ލެންގުއޭޖް ފޯމިއުލާގެ ދަށުން އަލުން ކިޔަވައިދޭން ފަށައި އެކަމުގައި ކަމާ ގުޅުންހުރި މީހުންގެ ޚިޔާލު ހޯދުމަށް އެދިފައެވެ. އަދި އިނގިރޭސި މީޑިއަމަށް ކިޔަވައިދޭ ސްކޫލުތަކުގައި އޮޕްޝަނަލް ލެންގުއޭޖް ފްލެކްސިބިލިޓީ ގާއިމްކުރުމަށް އެދިފައިވެއެވެ.
Advertisement
This content is created and paid for by advertisers and does not involve Voice Journalists
